سه‌رۆکى هه‌رێم هێزه‌کانى پێشمه‌رگه‌ له‌ میحوه‌رى که‌رکووک به‌سه‌ر ده‌کاته‌وه‌

7/28/2014 8:27:00 PM
وێنەکان
سه‌رۆکى هه‌رێم هێزه‌کانى پێشمه‌رگه‌ له‌ میحوه‌رى که‌رکووک به‌سه‌ر ده‌کاته‌وه‌
جەماوەر نیوز
جه‌ماوه‌رنیوز

ئه‌مڕۆ دووشه‌ممه‌ 28ى  ته‌مموزى  2014 له‌ یه‌که‌م ڕۆژى جه‌ژنى ڕه‌مه‌زانى پیرۆزدا به‌ڕێز مه‌سعود بارزانى سه‌رۆکى هه‌رێمى کوردستان به‌ره‌کانى ڕووبه‌ڕووبوونه‌وه‌ و هێزه‌کانى پێشمه‌رگه‌ى کوردستانى له‌ میحوه‌رى که‌رکووک به‌سه‌ر کرده‌وه‌. 

له‌سه‌ردانه‌که‌یدا بۆ به‌ره‌کانى ڕووبه‌ڕووبوونه‌وه‌ و هێزه‌کانى پێشمه‌رگه‌ى کوردستانى له‌ میحوه‌رى که‌رکووک سه‌رۆکى هه‌رێم سه‌ردانى یه‌کێک له‌ باره‌گاکانى هێزى پێشمه‌رگه‌ى له‌ ناوچه‌ى دوبز کرد و له‌ لایه‌ن به‌رێز محه‌مه‌دى حاجى مه‌حمود به‌رپرسى میحوه‌رى که‌رکوکى هێزه‌کانى پێشمه‌رگه‌ و مسته‌فاى سه‌ید قادر وه‌زیرى پێشمه‌رگه‌ و و شێخ جه‌عفه‌ر شێخ مسته‌فا و ژماره‌یه‌ک به‌رپرسى سیاسیى باڵاى کوردستان و به‌رپرس و فه‌رمانده‌ و ئه‌فسه‌رى سه‌ربازى پێشوازى لێ کرا .

له‌ کۆبوونه‌وه‌یه‌کدا له‌گه‌ڵ هێزه‌کانى پێشمه‌رگه‌ى کوردستان سه‌رۆکى هه‌رێمى کوردستان وته‌یه‌کى پێشکه‌ش کرد و ڕایگه‌یاند که‌ به‌ ئه‌رکى خۆم زانیوه‌ له‌ یه‌که‌م ڕۆژى جه‌ژنى ره‌مه‌زانى پیرۆزدا سه‌ردانتان بکه‌م و سوپاستان بکه‌م و له‌جیاتى هه‌موو خه‌ڵکى کوردستان جه‌ژنه‌پیرۆزه‌تان لێ بکه‌م. بارزانى باسى ڕۆڵى هێزه‌کانى پێشمه‌رگه‌ کرد و ئاماژه‌ى به‌وه‌دا که‌ پێشمه‌رگه‌ ئێستا مێژوو دروست ده‌کات و ئایینده‌یش بۆ گه‌له‌که‌ى بنیات ده‌نێت و ئه‌وه‌یش شه‌رفێکى گه‌وره‌یه‌، ووتی: " ئێوه‌ خۆتان فیدا ده‌که‌ن بۆ ئه‌وه‌ى گه‌لى کوردستان به‌ ئازادى و سه‌ربه‌ستى بژیێت". 

بارزانى له‌ درێژه‌ى قسه‌کانیدا سوپاسى ماندووبوون و قاره‌مانێتیى هێزه‌کانى پێشمه‌رگه‌ى کرد که‌ ئه‌و زه‌حمه‌ت و قاره‌مانییه‌تییه‌ واده‌کات نه‌وه‌کانى داهاتوو به‌ ئازادى و سه‌ربه‌ستى بژیین و ڕایگه‌یاند که‌ پێشمه‌رگه‌ ئاماده‌یه‌ له‌پێناو دۆزێکى ڕه‌وادا ڕووبه‌ڕووى مه‌رگ ببێته‌وه‌ و ئه‌وه‌ شکست و فه‌شه‌لهێنانه‌ به‌ هه‌موو هه‌وڵێک که‌ پێیوایه‌ کورد بڕواى به‌خۆى نییه‌. ئه‌رکى پێشمه‌رگه‌ ئه‌رکێکى پیرۆزه‌ و گه‌لى کوردستانیش گه‌ییشتووه‌ته‌ قۆناغێکى زۆر باش و سه‌رکه‌وتنى یه‌کجاره‌کیش نزیکه‌. 

سه‌رۆکى هه‌رێم ئه‌وه‌یشى خسته‌ڕوو که‌ حه‌زى ده‌کرد سه‌ردانى هه‌موو میحوه‌ره‌کان و سه‌نگه‌ر به‌ سه‌نگه‌رى هێزه‌کانى پێشمه‌رگه‌ى کردبا و دووپاتى ئه‌وه‌یشى کرده‌وه‌ که‌ به‌هه‌موو توانایه‌ک پاڵپشتى پێشمه‌رگه‌ن و ئه‌وه‌ى له‌ توانایان بێت بۆ هێزى پێشمه‌رگه‌ى کوردستان ده‌یکه‌ن.

هه‌ر له‌م به‌سه‌رکردنه‌وه‌یه‌دا فه‌رمانده‌ و به‌رپرسه‌ سه‌ربازییه‌کانى هێزى پێشمه‌رگه‌ سه‌رۆکى هه‌رێمیانیان له‌ دۆخى مه‌یدانیى به‌ره‌کانى ڕووبه‌ڕووبوونه‌وه‌ و بارودۆخ و گوزه‌رانى هێزه‌کانى پێشمه‌رگه‌ى کوردستان له‌ میحوه‌رى که‌رکووک ئاگادار کرده‌وه‌.


لۆگۆ
سەرپێچی

وتار

زۆرترین خوێندراو