ئه‌توانى له‌رێگاى ئیمه‌یڵ و ژماره ته‌له‌فۆنه‌کانمانه‌وه په‌یوه‌ندیمان پێوه‌بکه‌یت و راوسه‌رنج وپێشنیارو داواکاریه‌کانى خۆت بخه‌یته‌روو.
07705066052
جه‌بار یاوه‌ر: باشتره کورد له رزگارکردنى موسڵ به‌شدار بێت
12/19/2014 7:41:00 PM
جەماوەر نیوز
جه‌ماوه‌رنیوز
جه‌بار یاوه‌ر له دیمانه‌یه‌کدا له‌گه‌ڵ ئاژانسى ئانادۆڵو باسى دواپێشهاته سه‌ربازییه‌کانى ناوچه‌که و یارمه‌تى تورکیا و هێزه‌کانى هاوپه‌یمانانى دژى داعش و رۆڵى کورد له کۆنترۆڵکردنى موسڵدا ده‌کات.
ئه‌میندارى گشتیى وه‌زاره‌تى پێشمه‌رگه ده‌رباره‌ى ناردنى هێزى پێشمه‌رگه بۆ کۆبانێ و ئه‌وه‌ى ئایه ئامانجى خۆى پێکاوه یان نا، گوتی: "بێگومان ئه‌و هێزه‌ى که مانگ و نیوێکه له کۆبانێیه و جارێکیش ئاڵوگۆڕمان پێ کردن، توانیویانه ئامانجه‌کان بپێکن. دیاره ئامانجى سه‌ره‌کیمان له ناردنى هێزى پێشمه‌رگه بۆ کۆبانێ یارمه‌تى شه‌ڕڤانانى ئه‌وێیه که له‌گه‌ڵ داعش شه‌ێ ده‌که‌ن و هه‌وڵى ئه‌وه ده‌ده‌ن که کۆبانێ له داعش بپارێزن، له کاتێکدا سه‌ره‌تا ٧٥%ى شارى کۆبانێ به‌ده‌ست داعشه‌وه بوو، هه‌نووکه ٢٥%ى ئه‌و شاره به‌ده‌ست داعشه‌وه‌یه که به‌رده‌وامیش له پاشه‌کشه‌دایه".
"هیچ ماوه‌یه‌کى دیارى کراو نییه بۆ مانه‌وه‌ى پێشمه‌رگه و تا شه‌ڕڤانه‌کانى به‌رگریکارى کۆبانێ و په‌یه‌ده پێویستى بێت ئێمه پشتیوانیان ده‌بین."
جه‌بار یاوه‌ر له‌مه‌ڕ ئه‌وه‌ى که ئایه رێککه‌وتن هه‌یه له نێوان هێزى پێشمه‌رگه و یه‌په‌گه و تورکیا که ئه‌و هێزه بۆ ماوه‌ى سێ مانگ له‌وێ بێت؟ وتی: "هیچ ماوه‌یه‌کى دیاریکراو نییه بۆ مانه‌وه‌ى هێزه‌که له‌وێ و تا شه‌ڕڤانه‌کانى به‌رگریکارى کۆبانێ و په‌یه‌ده پێویستى بێت ئێمه پشتیوانیان ده‌بین. له دانیشتنى نێوان حکوومه‌تى هه‌رێمى کوردستان و نوێنه‌رى هاوپه‌یمانان و لایه‌نى تورکیا ته‌نیا مه‌رج ئه‌وه بووه، که ئه‌و پێشمه‌رگانه‌ى ده‌ڕۆنه کۆبانێ باج و ناسنامه‌ى پێشمه‌رگایه‌تى خۆیان پێ بێت که ئه‌وه‌ش شتێکى ئاساییه چونکه له هه‌موو وڵاتان که‌سێک که هاتوچۆ ده‌کات ده‌بێتت ناسراو بێت و خاوه‌نى ناسنامه‌ى خۆى بێت و ئه‌و چه‌که‌ى له‌گه‌ڵ خۆیدا ده‌یبات خۆى به‌کارى بێنێت و ئه‌گه‌ر دواڕۆژ له‌وێ نه‌مان چه‌که‌کانى خۆیان بێننه‌وه. چونکه ئه‌وه چه‌ک و ته‌قه‌مه‌نى هێزى پێشمه‌رگه و یه‌که‌ى خۆیه‌تی، ئێمه نه مه‌رج و نه کاتى دیاریکراومان بۆ مانه‌وه‌ى ئه‌و هێزانه‌مان له کۆبانێ دیارى کردووه و چه‌ند جارێکیش ته‌نانه‌ت سه‌رۆکى هه‌رێمى کوردستان گوتویه‌تى ئه‌گه‌ر پێویست بکات هێزى زیاتریش ده‌نێرین بۆ پشتیوانى کۆبانێ، ئێمه به ئه‌رکێکى نه‌ته‌وایه‌تى خۆمان بۆ پشتیوانى کردن له شه‌ڕڤانان و هاووڵاتییانى کۆبانێ هه‌ستاوین".
یاوه‌ر له وه‌ڵامى ئه‌وه‌ى ئایه ئامارێکى دیاریکراو هه‌یه له برینداره‌کانى هێزى پێشمه‌رگه‌ى له کۆبانێ وتی: "دوانزه که‌س بریندار بوونه که به‌شێکیان له کۆبانێ و هه‌ندێکیشیان له هه‌رێمى کوردستان چاره‌سه‌ر کران".
له باره‌ى هاوکارییه‌کانى تورکیاشه‌وه ووتی: "تورکیا له هه‌موو بواره‌کاندا یارمه‌تیده‌رمان بووه، رێگه‌ى داوه به ئاسانى ئه‌و هێزه بگاته کۆبانێ و پێداویستییه‌کانى پێشمه‌رگه‌ش له رێگه‌ى ئه‌وانه‌وه ده‌نێردرێن بۆ کۆبانێ، هه‌روه‌ها بۆ پرسى ناردنى هێزه‌کانیشمان له رێگه‌ى ئاسمانیى یان زه‌وییه‌وه تورکیا به ته‌واوى هاوکارمان بووه".
"گرتنه‌وه‌ى شنگال به‌هۆى شوێن و هه‌ڵکه‌وته‌ى جوگرافییه‌وه ده‌بێتت به وریاییه‌وه بۆى بڕوانین"
یاوه‌ر له وه‌ڵامى ئه‌وه‌ى که بۆچى تا ئێستا شنگال کۆنترۆڵ نه‌کراوه‌ته‌وه؟ گوتی: "به هۆى شوێن و هه‌ڵکه‌وته‌ى جوگرافییه‌وه ده‌بێتت به وریاییه‌وه بۆى بڕوانین، بۆ نموونه‌وه له دهۆکه‌وه ٨٠ - ٩٠ کیلۆمه‌تر دووره که هیچ گوندێکى کوردنشینى لێ نییه و گونده‌کانى عه‌ره‌ب زۆربه‌یان په‌یوه‌ندییان به گرووپى تیرۆریستى داعشه‌وه کردبوو. بۆیه ده‌بێت تا ده‌گه‌ینه شنگال ئه‌و رێگه‌یه پاک بکرێته‌وه، من هه‌موو جارێک هه‌ڵکه‌وته‌ى جوگرافى شنگال ده‌شوبهێنم به غه‌ززه له فه‌ڵه‌ستین واته دابڕانى له ناوچه‌ى که‌نارى رۆژئاوا، شنگال ده‌یشوبهێنم به کۆبانێ به نیسبه‌ت کانتۆنه‌کانى دیکه‌ى جزیره و ئه‌وانه‌وه. شنگال به‌هۆى ئه‌و گونده عه‌ره‌بانه‌وه دابڕاوه له هه‌رێمى کوردستان، دیاره داعش هێزه‌کى زۆرى هێنابوو بۆ شنگال و له هه‌مان کاتیشدا عه‌ره‌باکانى ناوچه‌که‌شى چه‌کدار کردبوو. له راستیدا له‌به‌ر ئه‌م هه‌ڵکه‌وته‌یه بوو که به‌رگریکردن له شنگال زه‌حمه‌ت بوو، بۆیه هێزه‌که تووشى کشانه‌وه بوو یان چووه چیا. له گرتنى شنگاله‌وه به‌ده‌ستى داعش تا ئێستا ١٢ هه‌زار که‌س که دوو هه‌زاریان چه‌کدارن له چیاى شنگالن و توانیویانه ئه‌و شاخه له داعش بپارێزن، له‌به‌ر ئه‌م هۆکارانه‌ن که ده‌بێت به وردییه‌وه بڕوانینه رزگارکردنى شنگال، با زۆریشى خایاندبێت پلانى سه‌ربازیى بۆ رزگارکردنى شنگال هه‌یه و بێگومان ئاشکرا ناکرێت".
ئه‌میندارى گشتیى وه‌زاره‌تى پێشمه‌رگه‌ى له باره‌ى ئه‌وه‌ى بۆ کۆنترۆڵکردنى شنگال کێ بڕیار ده‌دات و پێویستیان به چ هێز و لایه‌نێکه؟ ووتی: "بڕیار لاى سه‌رۆکى هه‌رێمى کوردستانه و ئه‌گه‌ر هه‌ماهه‌نگى هه‌بێت به تایبه‌ت له‌گه‌ڵ هێزى هاوپه‌یمانان که له رێى فڕۆکه جه‌نگییه‌کانه‌وه له ئاسمانه‌وه هاوکار بن پێویستیمان پێیان ده‌بێت. هه‌م خه‌ڵکى ناوچه‌که و ته‌نانه‌ت حکوومه‌تى ئیتحادیش ده‌توانن له‌م پڕۆسه‌یه‌دا به‌شدار بن و ناتوانم کاتێکى بۆ دیارى بکه‌م".
یاوه‌ر له وه‌ڵامى ئه‌وه‌ى له‌به‌رچى عه‌ره‌به‌کانى ناوچه‌ى شنگال که باستان کرد لایه‌نگریى داعشیان کرد، ئایه به‌هۆى ناڕازى بوون له حکوومه‌تى هه‌رێمى کوردستان یان پێچه‌وانه له داعش گه‌یشتن؟ ووتی: "کێشه‌یه‌کى سیاسى له عێراق له نێوان کۆتله سیاسییه‌کان هه‌یه، ئه‌م کێشه‌یه یه‌کێک له هۆکاره‌کان بوو که برا عه‌ره‌به سونه‌کانى ئه‌و ناوچه‌یه له‌به‌ر رقیان له حکوومه‌تى فیدراڵى عێراق ئیتر زۆربه‌یان وه‌ک تۆڵه‌سه‌ندنه‌وه‌یه‌ک لایه‌نگرى داعشیان کرد. هه‌روه‌ها هه‌ڵه تێگه‌یشتنى کۆنه به‌عسییه‌کانیش که پێیان وابوو به‌م جۆره ده‌گه‌نه مافى خۆیان و تۆڵه‌ى خۆیان له حکوومه‌تى فیدراڵى عێراق ده‌که‌نه‌وه به‌شێکى تره له هۆکاره‌کان. دیاره وه‌ک دوا هۆکاریش ده‌توانین باسى ئه‌وه بکه‌ین که داعش ئه‌و ناوچانه‌ى کۆنترۆل کرد و به زۆره‌ملێ خه‌ڵکى ناچار کرد چه‌ک هه‌ڵگرن".
"پڕۆسه‌ى رزگارکردنى موسڵ پڕۆسه‌یه‌کى زه‌حمه‌ته و پێویستى به کارێکى یه‌کجار زۆر هه‌یه و ناکرێت بشوبهێنرێت به شنگال"
یاوه‌ر له‌مه‌ڕ ئه‌وه‌ى ئایه شه‌ڕى شنگال گرێدراوه به شه‌ڕى موسڵ؟ چاوه‌ڕێ ده‌که‌ن موسڵ کۆنترۆڵ بکرێت دواتر شنگال؟ ووتی: "پڕۆسه‌ى رزگارکردنى موسڵ پڕۆسه‌یه‌کى زه‌حمه‌ته و پێویستى به کارێکى یه‌کجار زۆر هه‌یه و ناکرێت بشوبهێنرێت به شنگال و هیچ په‌یوه‌ندییه‌کى به موسڵه‌وه نییه. موسڵ ئیشى زۆرى ده‌وێت، هه‌روه‌ها خه‌ڵکى ناوچه‌که‌ش رۆڵ ده‌بینن، ئه‌گه‌ر به‌س یه‌ک لایه‌ن بڕوات بۆ رزگار کردنى موسڵ بۆ نموونه به‌س کورد یان شیعه ئه‌وه ده‌بێته شه‌ڕێکى ناوخۆیى له نێوان کورد و عه‌ره‌ب یان شیعه و سونه، دیاره هه‌ر ناوچه‌یه‌ک بێگومان تایبه‌تمه‌ندى خۆى هه‌یه".
ناوبراو له وه‌ڵامى پرسیارى گرنگى کورد و به‌شدارى له پڕۆسه‌ى کۆنتڕۆڵکردنى موسڵ چۆن ده‌بینن؟ ووتی: "چه‌ند جارێک جه‌نابى سه‌رۆکى هه‌رێمى کوردستان له‌مباره‌یه‌وه رایگه‌یاندووه هه‌ر کاتێک پلانێکى گونجاو هه‌بوو بۆ رزگارکردنى موسڵ و خه‌ڵکى ناوچه‌که به‌شدار بوون و پشتیوانى نێوده‌وڵه‌تیشى له‌گه‌ڵ بوو و ئێمه پلانه‌که‌مان به گونجاو زانی، ئه‌و کاته به‌شدار ده‌بین وه‌ک لایه‌نێک به پێى ناوچه و تواناى خۆمان. کورد ده‌بێت رۆڵى هه‌بێت چونکه ناوچه‌یه‌کى یه‌کجار زۆرى هه‌یه که سه‌ر به موسڵه و کوردنشینن بۆ نموونه زوممار، شنگال، تلکێف، باشیک و قه‌ره‌قووش که ئیدارى سه‌ره به موسڵه. هه‌روه‌ها موسڵ له رووى جوگرافییه‌وه له باکوور سنوورى له‌گه‌ڵ سووریا هه‌یه له باشووریش له‌گه‌ڵ ناوچه‌کانى حکوومه‌تى فیدراڵ، به‌ڵام رۆژهه‌ڵاتى له‌گه‌ڵ حکوومه‌تى هه‌رێمى کوردستانه".
سه‌باره‌ت به‌وه‌ى که ئایه به‌غدا داواى لێ کردوون به‌شدار بن له کۆنتڕۆڵکردنى موسڵ؟ یاوه‌ر ووتی: "هێشتا پڕۆسه‌ى رزگارکردنى موسڵ ئاماده نه‌کراوه، دیاره زۆر ده‌نگوباسیش هه‌یه که ده‌ڵێت تا کۆتایى ساڵى داهاتووش موسڵ رزگار نابێت چونکه ده‌بێت ئاماده‌کارى بۆ بکرێت. ئه‌و هێزه‌ش لاى باشیک راهێنانى پێ ده‌کرێت هێزى پۆلیسى موسڵه که هێشتا به ته‌واوى کۆ نه‌بووه‌ته‌وه، ره‌نگه نزیکه‌ى پێنج تا شه‌ش هه‌زار بن و موسڵیش به‌و هێزه رزگار نابێت چونکه شارێکى گه‌وره‌یه و هێشتا گرووپى داعش لاى رومادییه و له سه‌ڵاحه‌دینه و له به‌له‌ده، چۆن ده‌کرێت هێزى حکوومه‌تى فیدراڵ ئه‌م ناوچانه رزگار نه‌کات و به‌ره‌و موسڵ بڕوات؟ هه‌موو شاره‌زایه‌کى سه‌ربازیى ده‌زانێت ئه‌مه ئاماده‌کارى ده‌وێت. ئه‌مه ده‌گه‌ڕێته‌وه سه‌ر پلانى حکوومه‌تى فیدراڵ که چۆن هێز بۆ رزگارکردنى موسڵ ئاماده ده‌کات، هێز ده‌بێت له خه‌ڵکى ناوچه‌که بێت، جاران موسڵ دوو فیرقه‌ى سه‌ربازیى لێ بووه بێجگه له فیرقه‌ى پۆلیسى حکوومه‌تى ئیتحادى و بێجگه له ٢٣ هه‌زار پۆلیس واته ٦٠ هه‌تا ٧٠ هه‌زار چه‌کدارى عێراقى نه‌یتوانیوه پارێزگارى له موسڵ بکات. بۆیه ده‌بێت رومادى و سه‌ڵاحه‌دین رزگار بکرێت خه‌ڵکى ناوچه‌که و هۆزه‌کان هاوکار بن، من له ماوه‌یه‌کى نزیکدا تواناى رزگار کردنى موسڵ نابینم".
"هیچ هێزێکى سه‌ربازیى تورکیا له کوردستان نییه و خه‌رجى ئه‌و راوێژکاره سه‌ربازییانه‌ى وڵاتانى بیانى که له کوردستانن له ئه‌ستۆى وڵاتى خۆیانه".
جه‌بار یاوه‌ر له وه‌ڵامى ئه‌وه‌ى ئایه هێزى سه‌ربازیى تورکیا له هه‌رێمى کوردستان هه‌یه؟ ووتی: "هیچ هێزێکى سه‌ربازیى تورکیا له کوردستان نییه بێجگه له‌و راوێژکارانه‌ى که له ناوه‌نده‌کانى را‌‌هێنان هه‌ن، وه‌ک راوێژکارانى وڵاتانى دیکه‌ى بیانی".
له وه‌ڵامى پرسیارى خه‌رجى ئه‌و راوێژکاره سه‌ربازییانه‌ى وڵاتانى بیانیم یاوه‌ر رایگه‌یاند که خه‌رجییه‌کانیان له ئه‌ستۆى وڵاتى خۆیانه.
ناوبراو ده‌باره‌ى هاوکارى تورکیا بۆ هێزى پێشمه‌رگه گوتی: "هه‌روه‌ک سه‌رۆکى هه‌رێمى کوردستان باسى کرد تورکیا به چه‌ک و ته‌قه‌مه‌نى یارمه‌تى هێزى پێشمه‌رگه‌ى کوردستانى داوه، که دیاره سوپاسى وڵاتانى هاوپه‌یمانان ده‌که‌ین هه‌روه‌ها تورکیاش که کاتێک هێزى پێشمه‌رگه‌مان نارده کۆبانێ سه‌ره‌ڕاى ناکۆکییه ناوخۆییه‌کانى تورکیا، به‌ڵام سنووریان کرده‌وه و یه‌که‌مین جاره هێزى پێشمه‌رگه‌ى کوردستان به درێژایى ئه‌و سنووره به چه‌کى خۆى و به‌و هه‌موو هه‌ڵڵایه‌ى که به سوپاسه‌وه ئاپۆراى خه‌ڵک خوڵقاندی، ئه‌مه شتێکى نوێ و گرنگ بوو و سوپاسى ئه‌م هاوکارییه‌ى تورکیا ده‌که‌ین".
یاوه‌ر ده‌رباره‌ى په‌یوه‌ندى خۆیان له‌گه‌ڵ به‌غدا ووتی: "ئێمه وه‌ک خۆمان په‌یوه‌ندیمان له‌گه‌ڵ وه‌زاره‌تى به‌رگریى عێراقدا هه‌ر له سه‌ره‌تاى هاتنى داعشه‌وه بووه و له ناوچه‌کانى که‌رکووک، دوزخورماتوو، خانه‌قین، قه‌ره‌ته‌په، سه‌عدییه، جه‌له‌ولا و شنگال له‌گه‌ڵ هێلیکۆپته‌ر و فڕۆکه‌ى C130ى عێراقى هه‌ماهه‌نگیمان به یه‌که‌وه هه‌بووه و زۆریش یارمه‌تییان داوین. تا ئێستاش هاوکارییه مرۆییه‌کان بۆ چیاى شنگال له لایه‌ن هێلیکۆپته‌رى عێراقییه‌وه به‌رده‌وامه".
له وه‌ڵامى پرسیارى ئایه پێشمه‌رگه وه‌ک به‌شێک له سوپاى عێراق هه‌ژمار ده‌کرێت؟ یاوه‌ر ووتی: "هه‌ڵه‌یه‌ک هه‌یه له چۆنییه‌تى خانه‌خانه‌کردنى هێزه‌کان، به پێى ده‌ستوور حکوومه‌تى فیدراڵ و حکوومه‌تى هه‌رێمى کوردستان داموده‌زگاى خۆیان هه‌یه و ماف له لایه‌ن حکوومه‌تى فیدراڵه‌وه به حکوومه‌تى هه‌رێمى کوردستان داروه که حکوومه‌تێکى هه‌رێمیى و وه‌زاره‌تى هه‌بێت. هێزى پێشمه‌رگه که پێى ده‌ڵێن هێزى پاسه‌وانى هه‌رێم و سه‌ر به وه‌زاره‌تى پێشمه‌رگه‌ن و له چوارچێوه‌ى ده‌ستووردایه. ئێمه به‌شێکین له سیستمى به‌رگریى ده‌وڵه‌تى فیدراڵى عێراق بۆیه مافى خۆمان هه‌یه که داواى مووچه‌ى خۆمان بکه‌ین و له دوایین دانیشتنیشدا که شاندێک به سه‌رپه‌رشتى سه‌رۆکوه‌زیرانى هه‌رێمى کوردستان سه‌ردانى به‌غدایان کرد، بڕیاره له بودجه‌ى ٢٠١٥دا تریلیۆنێک و ٢٠٠ ملیار دینارى عێراقى مانگانه بۆ هێزى پێشمه‌رگه دیارى بکرێت".
جه‌بار یاوه‌ر ده‌رباره‌ى گله‌ییان له‌وه‌ى که فڕۆکه‌کانى هاوپه‌یمانان که چه‌ک و ته‌قه‌مه‌نى بۆ هه‌رێمى کوردستان دێنن له به‌غدا ده‌پشکێنرێن، ووتی: "گله‌ییه‌مان کردووه هه‌م له حکوومه‌تى فیدراڵى عێراق و هه‌میش وڵاتانى بیانى و له لایه‌ن باڵیۆزخانه‌ى ئه‌و وڵاتانه‌ى یارمه‌تییه‌کانمان بۆ ده‌نێرن داوامان کردووه که له رێى په‌یوه‌ندییه‌کانى خۆیان ئه‌وه به ده‌وڵه‌تى فیدراڵ بڵێن. ئێمه پێشنیارێکمان ئاڕاسته کردووه که ئه‌و شه‌ش ئه‌فسه‌ره‌ى وه‌زاره‌تى به‌رگریى که له هه‌رێمى کوردستانن با ئه‌وان به‌و ئیشه هه‌ستن، به‌ڵام تا ئێستا هیچ وه‌ڵامێک له به‌غداوه نه‌هاتووه".
جه‌بار له باره‌ى یارمه‌تى چه‌ک و ته‌قه‌مه‌نى به‌غدا بۆ هه‌رێم ووتی: "له سه‌ره‌تاى په‌لامارى داعشه‌وه بۆسه‌ر هه‌رێمى کوردستان بڕێکى زۆر که‌م، واته یارمه‌تییه‌کى زۆر که‌مى کردووه".
ناوبراو له باره‌ى ئه‌و هێزه‌ى که جه‌له‌ولا و سه‌عدییه‌ى کۆنترۆڵ کرده‌وه، ووتی: "جه‌له‌ولا به‌ده‌ستى هێزى پێشمه‌رگه رزگار بوو، به‌ڵام ئه‌و هێزه‌ى که سه‌عدییه‌ى رزگار کرد سوپاى عێراق بوو له‌گه‌ڵ هێزه‌کانى خۆبه‌خشى شیعه و هێزى پێشمه‌رگه‌ش به‌شدار بوون".
یاوه‌ر له وه‌ڵامى ده‌نگۆى به‌شداریکردنى فڕۆکه‌ى جه‌نگیى ئێرانى له ئۆپه‌ڕاسیۆنى ئاسمانیى له جه‌له‌ولا و مه‌خموور؟ ووتی: "ئێمه له کوردستان سیستمى رادارمان نییه و ده‌یان جۆر فڕۆکه‌ى جه‌نگیى بیانى له ئاسماندا هه‌ن".
ئه‌میندارى گشتیى وه‌زاره‌تى پێشمه‌رگه‌ى هه‌رێمى کوردستان جه‌بار یاوه‌ر له وه‌ڵامى پرسیارى ئه‌وه‌ى ئایه ئه‌و ناوچه جێناکۆکانه‌ى پێشمه‌رگه کۆنترۆڵى کردوون دووباره راده‌ستى سوپاى عێراق ده‌کرێته‌وه؟ ووتی: "ئێمه وه‌ک هه‌رێمى کوردستان به‌شێکین له حکوومه‌تى فیدراڵى عێراقى و هێزه‌کانیشمان هه‌روه‌ها به‌شێکن له سیستمى به‌رگریى ئه‌م وڵاته، خۆ ئێمه دوو وڵاتى جیا نین که دژى یه‌کتر شه‌ڕمان هه‌بێت. سه‌رۆکوه‌زیرانى عێراقى فیدراڵ عه‌بادى خۆى ده‌ڵێت که هێزى پێشمه‌رگه به‌شێکه له سیستمى به‌رگریى نیشتمانیى عێراق".
ناوبراو له وه‌ڵامى ئه‌وه‌ى ئایه هیچ هێزێکى هاوپه‌یمان به‌ڵێنى دانى چه‌کى قورسى به هێزى پێشمه‌رگه داوه؟ ووتی: "ئێمه ئه‌و داوایه‌مان بۆ هێزى هاوپه‌یمانان و حکوومه‌تى عێراق کردووه، هه‌ندێک چه‌کى قورسیش له ئه‌ڵمانیاوه هاتووه به‌ڵام هه‌رچه‌ند وه‌ڵامه‌کان ئه‌رێنى بوون، هێشتا بڕیارێک نه‌دراوه و باوه‌ێ ناکه‌م زه‌حمه‌ت بێت هه‌رێمى کوردستان له ئاینده‌دا ببێته خاوه‌نى چه‌کى قورس".
وتار
-
ڕه‌وشى ڕۆژنامه‌نوسى کوردى یان جیهانی
07.02.2024 -
ره‌گه‌ز گۆڕین کارێکى قێزه‌وه‌ن و شووره‌ییه
29.01.2024 -
سوکایه‌تى و بێڕێزى له‌پاى چی؟
10.01.2024
زۆرترین خوێندراو
- ڕۆژ
- هەفتە
- مانگ
-
پارتی و یه‌كێتی له سه‌ر دوو وه‌زاره‌ت ڕێكنه‌كه‌وتوون
27.10.2022
-
دوورخستنەوەی سەرۆککۆماری پێشووی چین ئاشكرا ده‌كرێت
23.10.2022
-
له كفری پارتی سۆسیال دیموكرات خولێكی تۆپی پێ ده‌كاته‌وه
22.10.2022
-
پارتی سۆسیال دیموكرات گۆڕانكاری ئه‌نجامده‌دات
23.02.2023