4
7 حکومه‌تى هه‌رێم وه‌ڵامى هیومان رایتس وۆچ ده‌داته‌وه‌
6/12/2017
Increase text size Decrease text size

جه‌ماوه‌رنیوز








رێکخراوى هیومان رایتس وۆچ راپۆرتێکى بڵاوکردۆته‌وه‌  له‌ رێکه‌وتى 5-12-2017 به‌ ناوى (که‌م و کورتى دادوه‌ری، لێپرسراوێتى بۆ تاوانه‌کانى داعش) و تێیدا باس له‌ قۆناغه‌کانى هاتنى رێکخراوى تیرۆریستى ئه‌لقاعیده‌ و دواتریش داعش و ئه‌و هه‌نگاوانه‌ى که‌ دواترى له‌لایه‌ن حکومه‌تى هه‌رێمى کوردستان و حکومه‌تى ناوه‌ندى و هاوپه‌یمانى نێوده‌وڵه‌تییه‌وه‌ گیراونه‌ته‌ به‌ر، هه‌روه‌ها تیشکى خستۆته‌ سه‌ر به‌شێک له‌و رێوشوێنانه‌ى که‌ بۆ نه‌هێشتنى تیرۆریستان و ده‌ستگیر کردنى ئه‌و که‌سانه‌ى به‌ تۆمه‌تى تیرۆر تێوه‌گلاون و چۆنیه‌تى دادگایى کردنیان، تێکدانى ماڵى عه‌ره‌به‌کان و رێگانه‌دان به‌ گه‌ڕانه‌وه‌یان بۆ سه‌ر زێدى خۆیان.

کۆمیته‌ى راپۆرته‌ نێوده‌وڵه‌تییه‌کان له‌ وه‌ڵامى راپۆرتى رێکخراوى هیومان رایتس وۆچ به‌ پێویستى زانى چه‌ند روونکردنه‌وه‌یه‌ک بخاته‌ روو:

له‌ هه‌رێمى کوردستان یاساى ژماره‌ (٣)ى ساڵى 2006 که‌ به‌ یاساى به‌ره‌نگاربوونه‌وه‌ى تۆقاندن (تیرۆر) له‌ هه‌رێمى کوردستان ناسراوه‌ جێبه‌جێ ده‌کرا تا کۆتایى مانگى ته‌مموزى 2016، به‌ڵام دواى ئه‌وه‌ى کارکردن به‌م یاسایه‌ راگیرا و له‌ هه‌مان کاتدا کرده‌وه‌ تیرۆریستییه‌کان کۆتاییان پێنه‌هاتووه‌ و هه‌ڕه‌شه‌ن له‌ سه‌ر ئاسایشى هه‌رێم، له‌ ئێستادا له‌ هه‌رێمى کوردستان بۆ دادگایى کردنى ئه‌و که‌سانه‌ى به‌ کارى تیرۆریستییه‌وه‌ تێوه‌گلاون کار به‌ یاساى ژماره‌ (٢١)ى ساڵى 2003ى په‌رله‌مانى کوردستان و یاساى سزادانى عێراقى ژماره‌ (١١١)ى ساڵى 1969ى هه‌موار کراو ده‌کرێت. له‌ لایه‌کى تره‌وه‌ تا ئێستا سه‌دان له‌و که‌سانه‌ى که‌ په‌یوه‌ندییان به‌ داعشه‌وه‌ هه‌بووه‌ هێشتا ده‌ستبه‌سه‌رن و له‌ قۆناغى لێکۆڵینه‌وه‌دان، له‌وانه‌ (228) که‌ ته‌مه‌نیان له‌ خوارووى (18) ساڵه‌ و له‌ چاکسازییه‌کان ده‌ستبه‌سه‌رن. هه‌روه‌ها ئه‌و که‌سانه‌ى که‌ ته‌مه‌نیان له‌ ١٨ ساڵ که‌متره‌ و گومانیان لێده‌کرێت پێشتر په‌یوه‌ندییان به‌ داعشه‌وه‌ هه‌بووبێت، ئه‌وا وه‌ک قوربانى ده‌ستى داعش مامه‌ڵه‌یان له‌گه‌ڵدا ده‌کرێت نه‌ک تاوانبار و گرنگییه‌کى تایبه‌تییان پێده‌درێت ئه‌م پرۆسه‌یه‌ش به‌ هه‌ماهه‌نگى له‌نێوان حکومه‌تى هه‌رێمى کوردستان و رێکخراوه‌ ناحکومییه‌ بیانییه‌کان ئه‌نجام ده‌درێت.

 لایه‌نه‌ ئه‌منییه‌کانى حکومه‌تى هه‌رێم پابه‌ندن که‌ زانیارى بده‌نه‌ خانه‌واده‌ى ئه‌و که‌سانه‌ى ده‌ستگیر ده‌کرێن، چونکه‌ به‌پێى یاساى ژماره‌ ١٤ى ساڵى 2001 ى په‌رله‌مانى کوردستان ته‌مه‌نى یاسایى بۆ سه‌پاندنى سزا (١١) ساڵه‌ و سووکترین سزادانیش بۆ ئه‌و منداڵانه‌ (هۆشداریدانه‌) بۆ سه‌رپێچیه‌کان واتا که‌ سه‌رپێچى بکرێت هۆشدارى پێده‌درێت ئه‌گه‌ر تاوانه‌که‌ نه‌که‌وێته‌ چوارچێوه‌ى تیرۆر، و قورسترین سزاش سپاردنه‌ بۆ ماوه‌ى 5 ساڵ به‌ قوتابخانه‌یه‌کى پێگه‌یاندن، به‌ڵام له‌ هه‌ندێ حاڵه‌تیشدا نیازى په‌یوه‌ندیکردن به‌ گروپێکى چه‌کدارى تیرۆریستى هه‌بێت که‌ به‌پێى یاسا پێى ده‌گوترێت (شروع) به‌ڵام که‌ کۆتایى و ئه‌نجامى نه‌بووه‌ ئه‌وا لێره‌دا سزاکه‌ به‌پێى ته‌قدیرى دادوه‌ر ده‌بێت، به‌م جۆره‌ سزاى له‌ سێداره‌دانیش له‌سه‌ر نه‌وجه‌وانان جێبه‌جێ ناکرێت.

ده‌زگا په‌یوه‌ندیداره‌کان له‌ هه‌وڵى به‌رده‌وامدان بۆ چاره‌سه‌ر کردنى که‌یسى ئه‌و منداڵانه‌ و له‌ ساڵى 2016 له‌ دادگاى هه‌ولێر ده‌یان که‌یس یه‌کلا بووه‌ته‌وه‌ سزاکانیشیان له‌ نێوان یه‌ک ساڵ بۆ پێنج ساڵ  بووه‌. هه‌روه‌ها به‌ پشت به‌ستن به‌ مادده‌ى (٤٩) یاساى پاراستنى نه‌وجه‌وانان دادوه‌رى لێکۆڵینه‌وه‌ له‌ رووداوه‌کانى نه‌وجه‌وانان تایبه‌ته‌ به‌ بینینى ئه‌و داوایانه‌ و له‌ کاتى نه‌بوونى دادوه‌رى لێکۆڵینه‌وه‌ى نه‌وجه‌وانان، ئه‌وه‌ هه‌ر دادوه‌رێکى لێکۆڵینه‌وه‌ ئه‌و داوایه‌ ده‌بینێت و له‌ کاتى نه‌بوونى دادوه‌رى لێکۆڵینه‌وه‌ش لێکۆڵه‌ره‌وه‌ى دادوه‌رى ئه‌و کاره‌ ده‌کات و له‌ هه‌موو حاڵه‌ته‌کان ده‌ستگیرکراوه‌که‌ ده‌چێته‌ به‌رده‌م دادوه‌ر.

له‌لایه‌کى تره‌وه‌ حکومه‌تى هه‌رێمى کوردستان ئاماده‌یه‌ هاوکارى له‌گه‌ڵ حکومه‌تى فیدراڵ بکات سه‌باره‌ت به‌ راده‌ستکردنه‌وه‌ى ده‌ستگیرکراوانى داعش و له‌م رووه‌وه‌ له‌سه‌ر داواى سه‌رۆکایه‌تى ئه‌نجومه‌نى وه‌زیران و به‌ هه‌ماهه‌نگى له‌گه‌ڵ لایه‌نه‌ په‌یوه‌ندیداره‌کان به‌تایبه‌تى وه‌زاره‌تى کار و کاروبارى کۆمه‌ڵایه‌تى و یۆنامى پێکه‌وه‌ به‌دواداچوون کراوه‌ سه‌باره‌ت به‌ چاره‌نووسى ئه‌و که‌سانه‌ى که‌ به‌ تۆمه‌تى تیرۆر ده‌ستگیر کراون و سزا دراون، به‌ڵام حکومه‌تى هه‌رێم بۆ راده‌ستکردنه‌وه‌یان داواى زه‌ماناتى کردووه‌ و خوازیاره‌ یۆنامى وه‌ک لایه‌نێکى راوێژکارى نێوده‌وڵه‌تى به‌شدار بێت له‌م پرۆسه‌یه‌ بۆ مه‌به‌ستى پاراستنى ژیانیان. سه‌باره‌ت به‌ لێبووردنى گشتیش ناکرێت له‌ کاتى شه‌ڕدا بڕیارى لێبووردنى گشتى ده‌ربچێت بۆ هیچ گیراوێک به‌تایبه‌تى ئه‌وانه‌ى له‌ کاتى جه‌نگدا ده‌ستگیر ده‌کرێن یان دیله‌کانى جه‌نگ.

سه‌باره‌ت به‌ دواکه‌وتن و رێوشوێنه‌کانى دادگایى کردنى گومانلێکراوان دیاره‌ له‌گه‌ڵ هاتنى راگوێزراوان بۆ ساتره‌کانى هێزى پێشمه‌رگه‌ وه‌ک رێوشوێنێکى ئه‌منى ته‌نیا پیاوه‌کان پشکنینێکى زۆر ئاساییان بۆ کراوه‌ به‌ مه‌به‌سى دڵنیابوون له‌ نه‌بوونى که‌سانى تیرۆریست و خۆکوژ له‌ نێویاندا، دواتر  ده‌گوازرانه‌وه‌ بۆ سه‌نته‌ره‌کانى پێشوازى. دواى گواستنه‌وه‌ى راگوێزراوان بۆ سه‌نته‌رى پێشوازى دووباره‌ پیاوه‌کان ده‌پشکێندرێن و به‌هیچ شێوه‌یه‌ک پشکنین بۆ ئافره‌تان ئه‌نجام نادرێت، ئه‌م رێوشوێنانه‌ زۆر جار بوونه‌ته‌ هۆى ئه‌وه‌ى که‌ ئاژانسه‌کانى نه‌ته‌وه‌یه‌کگرتووه‌کان گله‌یى ئه‌وه‌یان کردووه‌ که‌ بۆچى ئافره‌ته‌کان ناپشکێندرێن، به‌ڵام به‌هۆى ره‌چاوکردنى دابونه‌ریتى کۆمه‌ڵایه‌تى و حورمه‌تى خه‌ڵکه‌که‌ تا ئێستا  ئافره‌ته‌ راگورێزراوه‌کان پشکنینیان بۆ ئه‌نجام نادرێت له‌لایه‌ن دام و ده‌زگا ئه‌منییه‌کانه‌وه‌.

له‌ پشکنینى یه‌که‌م زانیارى له‌ خودى ئه‌و که‌سانه‌ وه‌رگیراوه‌ که‌ ئاواره‌ ده‌بن و روو له‌ هه‌رێمى کوردستان ده‌که‌ن یاخود خۆیان ده‌رباره‌ى ئه‌و که‌سانه‌ قسه‌ بۆ لایه‌نه‌ ئه‌منییه‌کان ده‌که‌ن که‌ په‌یوه‌ندیان به‌ گروپى تیرۆریستى داعشه‌وه‌ هه‌بووه‌. له‌ ماوه‌ى ئه‌و چه‌ند کاتژمێره‌ى که‌ لێکۆڵینه‌وه‌ له‌گه‌ڵ که‌سه‌کان ده‌کرێت، ئه‌گه‌ر که‌سێک گومانلێکراو بوو ئه‌وه‌ به‌ پشتبه‌ستن به‌ زانیارى لایه‌نه‌ په‌یوه‌ندیداره‌کان وه‌ک موختارى گه‌ڕه‌ک و عه‌شایره‌کانى ناوچه‌که‌ ئه‌و زانیاریانه‌ى ده‌ست لایه‌نه‌ ئه‌منییه‌کان که‌وتوون جه‌ختیان له‌سه‌ر ده‌کرێته‌وه‌ و ئینجا گومانلێکراو ده‌ستگیر ده‌کرێت.

 پشکنین ته‌نها چه‌ند کاتژمێرێک ده‌خایه‌نێت و پاش پشکنین راگوێزراوه‌کان ده‌نێردرێنه‌ که‌مپه‌کان و ئه‌وه‌ که‌سانه‌ى گومانلێکراویشن ده‌ستگیر ده‌کرێن حاکم که‌یسیان بۆ ده‌کاته‌وه‌ و راسته‌وخۆ پاش ده‌ستگیرکردنى بنه‌ماڵه‌که‌ى ئاگادار ده‌کرێنه‌وه‌ له‌ هۆکارى ده‌ستگیر کردنی، هه‌روه‌ها مافى ئه‌وه‌شى ده‌بێت که‌ پارێزه‌ر بۆ خۆى بگرێت. له‌ کاتى ده‌ستگیر کردن و ئازادکردنیشیان ئه‌مانه‌ له‌ خێزانه‌کانیان جودا ناکرێنه‌وه‌ و پاش ئازادکردنیان ده‌گه‌یه‌ندرێنه‌وه‌ به‌ بنه‌ماڵه‌کانیان. له‌ دواى ئه‌وه‌ى له‌لایه‌ن حاکمه‌وه‌ که‌یس بۆ گومانلێکراوێک ده‌کرێته‌وه‌ ئینجا لێکۆڵینه‌وه‌ له‌گه‌ڵى ده‌ست پێده‌کات دواى ئه‌وه‌ى راگیراو حوکمى له‌ دادگاوه‌ بۆ ده‌ره‌دچێت ره‌وانه‌ى داموده‌زگاکانى وه‌زاره‌تى ناوخۆ ده‌کرێ بۆ سه‌پاندنى سزاکه‌ى به‌پێى رێوشوێنه‌ کارپێکراوه‌کان.

سه‌باره‌ت به‌و به‌ڵگانه‌ى له‌سه‌ر گومانلێکراو و تاوانباران کۆده‌کرێته‌وه‌، به‌ڵگه‌کان جیاوازن و هه‌ندێکیان له‌رێگه‌ى مۆبایلى تاوانباره‌کانه‌وه‌ ده‌ستده‌که‌وێت یاخود له‌ رێگاى به‌کارهێنانى مادده‌یه‌کى تایبه‌ت که‌ له‌ هێزه‌ ئه‌مریکییه‌کان ده‌ست لایه‌نه‌ ئه‌منییه‌کان که‌وتووه‌ که‌ به‌ هۆى ئه‌و مادده‌ کیمیاویه‌وه‌ که‌ له‌ ده‌ستى خه‌ڵکه‌که‌ ده‌درێت ئاشکرا ده‌بێت که‌ ئه‌و که‌سانه‌ ده‌ستیان به‌ر مادده‌ى ته‌قه‌مه‌نى وه‌کو (تى ئێن تی) که‌وتووه‌ یان نا. به‌شێوه‌یه‌کى گشتى ته‌نیا ئه‌و کاتانه‌ تۆمه‌تبار ده‌ستگیر ده‌کرێ که‌ زانیارى ته‌واو و به‌ڵگه‌ى به‌هێز له‌به‌رده‌ستدا بێت بۆ ده‌ستگیرکردنى ئه‌و که‌سانه‌، پاش ده‌ستگیرکردنیشیان ته‌نها بۆ چه‌ند کاتژمێرێکى که‌م له‌ ئاسایش ده‌مێننه‌وه‌ و پاش وه‌رگرتنى زانیارى سه‌ره‌تایى وه‌کو ئه‌گه‌رى هێرشى تیرۆریستان یان پلانى داهاتوویان راده‌ستى هێزه‌ ئه‌منییه‌ تایبه‌تیه‌کان ده‌کرێن.

دواى ئه‌وه‌ى لایه‌نه‌ ئه‌منییه‌کان زانیارى ته‌واو له‌سه‌ر گومانلێکراوان ده‌ده‌ن به‌ دادوه‌ر، دادوه‌ر ره‌زامه‌ندى ده‌دات به‌ ده‌ستگیرکردنى گومانلێکراوان، فه‌رمانى ده‌ستگیر کردنیان بۆ ده‌رده‌چێت به‌م پێیه‌ش رێگا به‌ هێزه‌کانى ئاسایش و پۆلیس ده‌درێت به‌ گرتن و پشکنین و به‌دواداچوونى گومانلێکراوان و ئه‌نجامدانى لێکۆڵینه‌وه‌ له‌گه‌ڵیان، له‌م قۆناغه‌دا بۆ ماوه‌ى (٢٤) کاتژمێر له‌لایه‌ن هێزه‌ ئه‌منییه‌کانه‌وه‌ ده‌مێننه‌وه‌ به‌ مه‌به‌ستى لێکۆڵینه‌وه‌ى سه‌ره‌تایی.

دواى ده‌ستگیرکردنى گومانلێکراوان په‌راوى تایبه‌تیان بۆ ده‌کرێته‌وه‌ و ده‌نێردرێن بۆ دادگاکانى لێکۆڵینه‌وه‌ که‌ به‌شێوه‌یه‌کى گشتى بۆ ماوه‌ى (٧٢) کاتژمێر که‌ له‌ژێر لێکۆڵینه‌وه‌دا ده‌بن، به‌ڵام هه‌موو مافێکى یاساییان پارێزراو ده‌بێت وه‌ک دابینکردنى پارێزه‌رى تایبه‌ت به‌ به‌رگری، ئه‌گه‌ر له‌و ماوه‌یه‌دا سه‌لمێنرا که‌ له‌ کارى تیرۆریسیت تێوه‌نه‌گلاوه‌ و بێتاوانه‌ ئه‌وا به‌ بڕیارى دادوه‌ر لێکۆڵینه‌وه‌ ئازاد ده‌کرێت، به‌ڵام به‌ پێچه‌وانه‌وه‌ رێوشوێنى یاسایى به‌رامبه‌ر ده‌گیرێته‌ به‌ر وه‌ک ئه‌وه‌ى ناردنى په‌راوى لێکۆڵینه‌وه‌کان بۆ دادگاى تاوان.

راپۆرته‌که‌ باس له‌ قوربانیانى ده‌ستى داعش ده‌کات، له‌و باره‌وه‌ حکومه‌تى هه‌رێم گرنگییه‌کى زۆرى به‌ لایه‌نى یاسایى قوربانیانى ده‌ستى تیرۆریستانى داوه‌ به‌ تایبه‌تى ئه‌و ئێزیدیانه‌ى که‌ له‌لایه‌ن تیرۆریستانه‌وه‌ رفێندراوبوون، بۆ ئه‌م مه‌به‌سته‌ رۆژى 25/11/2014 لێژنه‌یه‌کى دامه‌زراند بۆ کۆکردنه‌وه‌ى زانیارى و به‌دواداچوون له‌ که‌یسى ئێزیدییه‌ رفێندراوه‌کان و بودجه‌یه‌کى تایبه‌تى ته‌رخان کردووه‌ بۆ رزگارکردنیان، دواى گه‌ڕانه‌وه‌شیان حکومه‌ت هه‌موو ئاماده‌کارییه‌ک ده‌کات بۆ حه‌واندنه‌وه‌یان ودووباره‌ گه‌ڕاندنه‌وه‌یان بۆ نێو کۆمه‌ڵگا. له‌ چوارچێوه‌ى ئه‌و هه‌وڵانه‌ى حکومه‌تى هه‌رێم توانراوه‌ ژماره‌یه‌کى زۆر له‌ رفێندراوه‌کان ئازاد بکرێن، به‌پێى دوایین سه‌رژمێرى ئێزیدییه‌ رفێندراوه‌کان ژماره‌یان (6417) که‌س بوو له‌وانه‌ (3547)یان  نێر و (2870)یان مێ بوو، تا رۆژى 1/12/2017 ئه‌وانه‌ى تا ئێستا رزگار کراون ژماره‌یان (3207) که‌سه‌ له‌وانه‌ (1137)یان ئافره‌ت و (335)یان پیاو و (904)یان منداڵى کچ و (831)یان منداڵى کوێ‌ بوون، ئه‌وانه‌ى تا ئێستا رزگار نه‌کراون (1507) ئافره‌ت و (1703) پیاون. له‌لایه‌کى دیکه‌وه‌ دواى ئاواره‌بوونیان ئێزیدییه‌کان پێویستیان به‌ یارمه‌تیدانى یاسایى هه‌بوو بۆ وه‌رگرتنه‌وه‌ى مافه‌کانى خۆیان، بۆیه‌ له‌ مانگى 12ى 2014 له‌لایه‌ن حکومه‌تى هه‌رێمى کوردستانه‌وه‌ زیاتر له‌ (33,029) که‌یس له‌ رووى یاساییه‌وه‌ پاڵپشتى کراون و ژماره‌ى ئه‌و که‌سانه‌ى سوودیان له‌م پاڵپشتییه‌ وه‌رگرتووه‌ و ته‌نیا له‌ مانگى 3ى ساڵى 2015 گه‌یشته‌ (60,000) که‌س و تا ئێستاش ئه‌و هاوکارییه‌ یاساییانه‌ى حکومه‌ت به‌رده‌وامن.

سه‌باره‌ت به‌ ره‌وشى ئاواره‌کان ئاشکرایه‌ یه‌کێک له‌ سه‌روه‌رییه‌کانى حکومه‌تى هه‌رێمى کوردستان که‌ له‌ هه‌موو جیهان به‌ شانازییه‌وه‌ باسى لێده‌کرێت ئه‌وه‌یه‌ که‌ هه‌رێمى کوردستان باوه‌شى کردۆته‌وه‌ بۆ نزیکه‌ى (2) ملیۆن ئاواره‌ و په‌نابه‌ر هاتنیان به‌رده‌وامه‌، سه‌ره‌ڕاى بارودۆخى ناله‌بار و قه‌یرانى ئابووری، به‌ڵام  حکومه‌تى هه‌رێمى کوردستان هه‌وڵیداوه‌ به‌ هه‌موو شێوه‌یه‌ک و به‌و توانا سنوورداره‌ى به‌رده‌ستى زۆرترین خزمه‌تگوزارى پێشکه‌ش به‌ ئاواره‌ و په‌نابه‌ران بکات ئه‌مه‌ له‌ کاتێکدا که‌ وڵاتانى ده‌وروبه‌رى عێراق و سوریا رایانگه‌یاندووه‌ ناتوانن چیتر په‌نابه‌ر وه‌ربگرن.

ئاواره‌ و په‌نابه‌ران به‌ دوو قۆناغ روویان له‌ هه‌رێمى کوردستان کردووه‌:  یه‌که‌میان له‌ ساڵى 2006 له‌ ئاکامى شه‌ڕى تایفه‌گه‌رى له‌ شاره‌کانى ناوه‌ڕاست وباشوورى عێڕاق و دووه‌میشیان له‌ دواى هێرشه‌کانى تیرۆریستانى داعش بۆ سه‌ر ناوچه‌ جیاجیاکانى عێڕاق که‌ له‌ ئه‌نجامدا بووه‌ هۆى ئاواره‌بوونى ژماره‌یه‌کى زۆرى هاووڵاتیانى عێڕاقى و په‌نابردنیان بۆ هه‌رێمى کوردستان.

ئه‌و رێوشوێنانه‌ى که‌ له‌ بازگه‌کاندا په‌یڕه‌و ده‌کرێن کارێکى ئاساییه‌ و په‌یوه‌ندى به‌ ئاسایشى و سه‌قامگیریى هه‌رێمه‌وه‌ هه‌یه‌ و نه‌ک ته‌نیا له‌ هه‌رێمى کوردستان به‌ڵکو له‌ هه‌موو جیهان رێوشوێنى تایبه‌ت ده‌گیرێته‌ به‌ر بۆ پاراستنى ئاسایش بۆ وردبینى و دڵنیا بوون له‌ ناسنامه‌ى ئاواره‌ و په‌نابه‌ران له‌گه‌ڵ ئه‌و زانیاریانه‌ى هه‌یه‌ ده‌رباره‌ى لیستى ناوى تیرۆریستان لاى دام و ده‌زگا ئه‌منییه‌کان، ئه‌م رێوشوێنانه‌ش ته‌نیا بۆ پاراستنى سه‌لامه‌تى دانیشتوانى هه‌رێمى کوردستانه‌ به‌ ئاواره‌کانیشه‌وه‌ و ته‌نیا ئاواره‌ و په‌نابه‌ران ناگرێته‌وه‌، به‌ڵکو هه‌ر که‌سێک به‌ بازگه‌کان تێپه‌ێ‌ بێت داواى ناسنامه‌ى لێده‌کرێت، چونکه‌ کۆنتڕۆڵکردنى ئه‌م ژماره‌ زۆره‌ى ئاواره‌ ئاسان نییه‌ و پێویسته‌ رێوشوێنى تایبه‌ت له‌ بازگه‌کان بگیرێته‌ به‌ر.

سه‌باره‌ت به‌ رووخاندنى خانووى خه‌ڵکى ئه‌و ناوچانه‌ى که‌ مه‌یدانى شه‌ێ‌ بوون بۆیه‌ له‌ ئه‌نجامى شه‌ێ‌ و بۆردومانى فڕۆکه‌ جه‌نگییه‌کان و مینڕێژکردنیان له‌لایه‌ن داعشه‌وه‌ تێک ده‌درێن، لێره‌دا پێویسته‌ ئاماژه‌ به‌وه‌ بکرێت که‌ به‌شى هه‌ره‌ زۆرى خانووه‌ تێکدراوه‌کان خاوه‌نه‌کانیان کورد بوون و دواى ئه‌وه‌ى ئاواره‌ بوون و شوێنه‌کانى خۆیان جێهێشت تیرۆریستانى داعش خانووه‌کانیان مینڕێژ کردووه‌، هه‌روه‌ها لایه‌نه‌ په‌یوه‌ندیداره‌کانى حکومه‌تى هه‌رێمى کوردستان دووپات ده‌که‌نه‌وه‌ که‌ هه‌ر که‌سێک له‌ ئاواره‌کان سکاڵا به‌رز بکاته‌وه‌ دژى پێشمه‌رگه‌ و کارمه‌ندانى سه‌ر به‌ وه‌زاره‌تى پێشمه‌رگه‌ و به‌ڵگه‌ى سه‌لمێنه‌رى هه‌بێت له‌و رووه‌ که‌ مافى پێشێل کراوه‌  له‌ رێگاى فه‌رمانگه‌ى یاسایى وه‌زاره‌ته‌وه‌ لێکۆڵینه‌وه‌ له‌گه‌ڵ ئه‌نجامده‌رانى ئه‌م ره‌فتارانه‌ ده‌که‌ن و هاریکارى ئه‌و که‌سانه‌ ده‌که‌ن که‌ داواى مافى خۆیانه‌ بکه‌ن.

حکومه‌تى هه‌رێمى کوردستان بۆ پاراستنى گیان و سه‌رو ماڵى ئه‌و هاووڵاتیانه‌ى که‌وتبوونه‌ نزیک هێڵه‌کانى ته‌ماس، خه‌ڵکه‌که‌یان گواسته‌وه‌ بۆ که‌مپه‌کان، به‌ڵام رێگا نه‌گیراوه‌ له‌ هاتوچۆى خه‌ڵکى ناوچه‌که‌، له‌لایه‌کى دیکه‌وه‌ ئه‌م ناوچانه‌ له‌ ئه‌نجامى شه‌ێ‌ و و بۆردوومانى به‌رده‌وامه‌وه‌ دووچارى وێرانکارییه‌کى بێ وێنه‌ بوونه‌ته‌وه‌ و له‌ زۆربه‌ى خزمه‌تگوزارییه‌ سه‌ره‌تاییه‌کان بێبه‌ش بوون، ئه‌مه‌ سه‌ره‌ڕاى بوونى ژماره‌یه‌کى زۆرى مین و ته‌قه‌مه‌نى که‌ تیرۆریستانى داعش له‌ دواى خۆیان له‌و ناوچانه‌ دایاننابوو، ژیان تێیدا سه‌خت بوو، بۆیه‌ خه‌ڵکه‌که‌ى سه‌ره‌تا نه‌گه‌ڕانه‌وه‌ سه‌ر ماڵ و حاڵى خۆیان، به‌ڵام دواتر به‌ هه‌وڵ و کۆششه‌کانى حکومه‌تى هه‌رێمى کوردستان به‌شێکى زۆرى خه‌ڵکى ئه‌و ناوچانه‌ به‌تایبه‌تى له‌ رۆژئاواى موسڵ گه‌ڕانه‌وه‌ سه‌ر زێدى خۆیان.

کۆمیته‌ى راپۆرته‌ نێوده‌وڵه‌تییه‌کان

سه‌رۆکایه‌تى ئه‌نجومه‌نى وه‌زیران

حکومه‌تى هه‌رێمى کوردستان

6-12-2017


ناو
کۆمێنت



hizb
5
ئایا کورد ده‌توانێ سود له‌بارودۆخى دواى داعش وه‌ربگرێ ؟


به‌ تاوانی ژن بوون
توێژەری سیاسی یان عەبــە شەکەنە !؟
نێچرڤان بارزانى : گه‌لى کوردستان ئاشتیخوازه‌و کراوه‌ و به‌خشنده‌یه‌
هه‌رێمى کوردستان سیسته‌مى په‌روه‌رده‌ى له‌ پێشینه‌ى کاره‌کانى داناوه‌
هه‌نگاوه‌ نوێیه‌کانى ڕووسیا له‌ ڕۆژهه‌ڵاتى ناوه‌ڕاست
ئاواره‌کانى جه‌رف ئه‌لسه‌خر گه‌ڕانه‌وه‌یان لێ قه‌ده‌غه‌ ده‌کرێ‌
Created by AVESTA Group