Error: No articles to display

سه‌رۆک کۆمار : په‌رله‌مان ئه‌رکى قورسى ده‌که‌وێته‌ سه‌رشان که‌ ده‌بێت به‌ شێوه‌یه‌کى به‌رپرسیارانه‌ و به‌په‌له‌ رای بپه‌ڕ‌ێنێت

ئەیلول 03, 2018
ئه‌مڕ‌وَ دوشه‌ممه‌ 3 ى ئه‌یلولى 2018 به‌ڕ‌ێز سه‌رۆک کۆمار دکتۆر فوئاد مه‌عسوم له‌  کردنه‌وه‌ى یه‌که‌مین کۆبونه‌وه‌ى خولى چواره‌مى ئه‌نجومه‌نى نوێنه‌راندا وتارێکى هه‌مه‌ لایه‌نى گرنگى پێشکه‌ش کرد که‌ تیایدا ئاماژه‌یکرد بۆ گرنگیى کارکردنى ئه‌نجومه‌نى نوێى نوێنه‌ران له‌ پێکهێنانى حکومه‌تى نوێ و به‌جێهێنانى ئه‌رکه‌ قانونگوزاریى و چاودێرییه‌کانى و به‌ده‌نگه‌وه‌ چونى خواسته‌کانى گه‌ل.
 
ئه‌مه‌ش ده‌قى وتاره‌که‌یه‌:
 
“به‌ناوى په‌روه‌ردگارى به‌خشنده‌و میهره‌بانه‌وه‌ 
خوشک و برایانى به‌ڕ‌ێز، ئه‌ندامانى خولى چواره‌مى ئه‌نجومه‌نى نوێنه‌ران
میوانه‌ به‌ڕێزه‌کان،
سڵاوى خوداتان لێ بێت،
هه‌ست به‌ شانازیى و متمانه‌ى زۆر ده‌که‌م، له‌ میانى کردنه‌وه‌ى خولى په‌رله‌مانیى چواره‌مى ئه‌نجومه‌نى نوێنه‌راندا بۆتان ده‌دوێم که‌ به‌ پێى حوکمه‌کانى ده‌ستور بانگهێشتى ئه‌م کۆبونه‌وه‌یه‌مان کرد له‌ روانگه‌ى په‌رۆشى ته‌واومانه‌وه‌ بۆ ئه‌وه‌ى ئه‌نجومه‌نه‌ به‌ڕ‌ێزه‌که‌تان ده‌ست به‌کارى ئه‌رک و ده‌سه‌ڵاته‌ ره‌سمییه‌کانى ببێت له‌ واده‌ ده‌ستورییه‌ دیاریکراوه‌که‌وه‌که‌یدا دواى ئه‌وه‌ى دادگاى باڵاى فیدراڵیى ئه‌نجامه‌کانى کۆتایى هه‌ڵبژاردنه‌ په‌رله‌مانییه‌که‌ى ئه‌م دواییه‌ى په‌سه‌ند کرد.
 
بێگومان ئه‌مه‌ ساتێکى مێژوییه‌ که‌ کۆبونه‌وه‌که‌تان هاوکاتى یادى یه‌که‌مین ساڵڕ‌وَژى سه‌رکه‌وتنى وڵاته‌که‌مانه‌ به‌سه‌ر تیرۆردا دواى جه‌نگێکى قاره‌مانانه‌ى سه‌رکه‌وتوانه‌ که‌ قوربانیى مرۆیى و مادیى زۆرى به‌خشى و ناخۆشییه‌کانیشى هاوکات بو له‌گه‌ڵ روبه‌ڕ‌وبونه‌وه‌ى قه‌یرانى ئابوریى به‌هۆى نزم بزنه‌وه‌ى نرخى نه‌وت له‌ جیهاندا.. هه‌مو ئه‌وانه‌ وره‌ و تواناى گه‌له‌که‌مانى نه‌ڕ‌وخاند له‌ پاراستن و پابه‌ند بونى به‌ سیستمى دیموکراسیى و فیدراڵیى و ده‌ستاوده‌ستکردنى به‌ ئاشتیى ده‌سه‌ڵات و به‌هێزکردنى یه‌کڕ‌یزییه‌ نیشتمانییه‌که‌ى و قوڵکردنه‌وه‌ى گیانى دیالۆگ و لێکتێگه‌یشتن و ده‌ست له‌ناوده‌ستکردنى عێراقییه‌کان بۆ چاره‌سه‌رکردنى کێشه‌ و ئاسته‌نگه‌کانى که‌ روبه‌ڕ‌ویان ده‌بێته‌وه‌.
 
له‌م قۆناغه‌ پڕ‌ له‌ ئومێده‌ى مێژوى گه‌له‌که‌ماندا که‌ عێراق به‌ متمانه‌ و واقیعیانه‌ پێگه‌ شیاوه‌که‌ى خۆى ده‌گه‌ڕ‌ێنێته‌وه‌ له‌هه‌ردو ئاستى ئیقلیمیى و نێوده‌وڵه‌تیى و متمانه‌ و رێزى هه‌مو جیهان به‌ده‌ست ده‌هێنێت به‌ گه‌ل و حکومه‌ته‌کان و دامه‌زراوه‌ ئابوریى و وه‌به‌رهێنه‌ر و ئه‌کادیمیى و روناکبیریى و وه‌رزشییه‌کانیانه‌وه‌.. ئه‌نجومه‌نه‌که‌تان ئه‌رکى قورسى ده‌که‌وێته‌ سه‌رشان که‌ ده‌بێت به‌ شێوه‌یه‌کى به‌رپرسیارانه‌ و به‌په‌له‌ و پڕ‌ به‌رهه‌مه‌وه‌ رایان بپه‌ڕ‌ێنێت.. ئومێدى زۆرمان هه‌یه‌ ئه‌م خوله‌ نوێیه‌ به‌شدارییه‌کى راسته‌قینه‌ى گه‌وره‌ بکات له‌ ده‌وڵه‌مه‌ندکردنى به‌کارهێنان و په‌ێڕ‌ه‌وکردنى دیموکراسیى له‌ وڵاته‌که‌مان و پاراستنى ده‌ستکه‌وته‌کانى و چاره‌سه‌رکردنى که‌موکورتیى و کۆسپه‌کان به‌و جۆره‌ى هێز و وزه‌ى زیاتر ببه‌خشێت به‌ ره‌وتى دیموکراسیى و فیدراڵیى و گه‌شه‌پێدانى سیستمه‌ سیاسییه‌که‌مان که‌ بناغه‌یه‌کى پۆڵاینى کۆڵه‌که‌کانى ده‌وڵه‌تى دیموکراسیى عێراقى نوێیه‌ که‌ هیوامان له‌سه‌رى هه‌ڵچنیوه‌، ده‌وڵه‌تى هاوڵاتیبون که‌ په‌رۆشى پێودانگه‌کانى فره‌یی، جیاوازییه‌کان، هاوبه‌شیى و یه‌کسانی، کرانه‌وه‌، دیالۆگ، ته‌وافق و هاوسه‌نگیى داهێنه‌رانه‌ بێت.
 
له‌کاتێکدا هیوایه‌کى به‌هێزمان هه‌یه‌ که‌ ئه‌م خوله‌ سه‌رکه‌وتوبێت له‌ دیاریکردنى حکومه‌تێکى نوێى به‌توانا و به‌هێز که‌ بتوانێت به‌رنامه‌یه‌کى حکومیى پێشکه‌وتوى سه‌رانسه‌ریى به‌دى بهێنێت داواکاریى و خواسته‌کانى گه‌ل جێبه‌جێ بکات له‌ ئاستى ویسته‌کانى گه‌لدا بێت بۆ ژیانێکى سه‌ربه‌رزانه‌.. داواى سه‌رکه‌وتنى ته‌واوتان بۆ ده‌که‌م له‌ ئه‌ستۆگرتنى ئه‌مانه‌ت و به‌ئاکام گه‌یاندنى به‌رپرسیارییى گه‌وره‌ى نیشتمانیتاندا، ئه‌وه‌ش ره‌چاو ده‌که‌ین که‌ نێوانى باشى هه‌ردو ده‌سه‌ڵاتى قانونگوزاریى و جێبه‌جێکردن و دادوه‌ریش ده‌بێت له‌ چوارچێوه‌ى رێزگرتنى ته‌واوى بڕ‌گه‌کانى ده‌ستوردا بن، هاوکات ده‌بێت هاریکاریى نێوانیشیان له‌ روانگه‌ى په‌رۆشیى هاوبه‌ش بێت بۆ رێزگرتنى ده‌سه‌ڵاتى هه‌ر دامه‌زراوه‌یه‌ک له‌ دامه‌زراوه‌کانى قانونگوزاریى وجێبه‌جێکردن و دادوه‌ریى و ئاسۆى کارى هاوبه‌ش و ته‌واوکه‌رى یه‌کتر بۆ خزمه‌تکردنى به‌رژه‌وه‌ندییه‌ باڵاکانى گه‌ل و وڵاتمان.
 
عێراقییه‌کان به‌ هه‌مو پێکهاته‌کانیانه‌وه‌ له‌سه‌ر خاکى عێراقى وڵاتیاندا ژیاون و له‌سه‌ر خاکه‌که‌ى نه‌ته‌وه‌ و گه‌ل و ئاین و ئاینزا و ره‌نگه‌کان تێکه‌ڵ بون، له‌ که‌ش و هه‌وایه‌کى ته‌بایى و برایه‌تیى و متمانه‌ به‌ خۆبوندا به‌ هاریکاریى و خۆش ویستنى یه‌کتر ژیاون.. مه‌زنترین شارستانییان له‌ رابردوییه‌کى دیاردا تۆمار کردوه‌.. تائێستاش گیانى یه‌کڕ‌یزیى و برایه‌تیى کرۆکى په‌یوه‌ندییه‌کانیانه‌. به‌ بێ زامنکردنى مافه‌ ده‌ستورییه‌کان بۆ هه‌موان و چه‌سپاندنى پێودانگه‌که‌نى هاوڵاتیبون و یه‌کڕ‌یزیى نیشتمانیى و هه‌وراز خستنى گیانى هاوکاریى و لێبورده‌یى و زامنکردن و پته‌وکردنى روبه‌ره‌کانى ئازادیى که‌ ده‌ستور ده‌سته‌به‌رى ده‌کات، به‌سه‌ر تێرۆر و دواکه‌وتویى و بێکاریى و هه‌ژاریى و نه‌زانیى و توندڕ‌ه‌ویى و فکره‌ ته‌کفیرییه‌کاندا سه‌رناکه‌وین. ده‌وڵه‌تى دیموکراسیى سه‌ربه‌خۆ و یه‌کگرتو و خاوه‌ن سه‌روه‌ریى به‌دى نایه‌ت به‌ بێ پێداگریى له‌سه‌ر کۆڵه‌که‌کانى ده‌وڵه‌تى قانون و ئازادییه‌کانى کۆمه‌ڵ و تاکه‌ که‌سیى و په‌ره‌پێدانى لایه‌نه‌کانى ئابوریی، کۆمه‌ڵایه‌تیی، روناکبیریى و زمان.
 
بێگومان ئێمه‌ پێویستى زۆرمان به‌ هه‌ڵوه‌سته‌یه‌کى ره‌خنه‌گرانه‌یه‌ بۆ هه‌مو ئه‌و لایه‌نانه‌ى که‌ تایبه‌تن به‌ سیستمه‌ سیاسیی، ئه‌منیی، ئابوریى و په‌روه‌رده‌ییه‌که‌مان نه‌ک هه‌ر به‌ ته‌نیا بۆ پیاچونه‌وه‌یان به‌ڵکو له‌ پێناوى گه‌شه‌ پێدانیان به‌وجۆره‌ى به‌دیهێنانى به‌رژه‌وه‌ندیى باڵاى نیشتمانیى زامن ده‌کات که‌ ئه‌وه‌ش به‌رژه‌وه‌ندیى هه‌مو عێراقییه‌کانه‌ نه‌ک به‌ ته‌نیا ده‌سته‌ و تاقمێک.
 
ئیمڕ‌وَ عێراقییه‌کان پێویستیان به‌ په‌ره‌پێدانى هاوسه‌نگ و به‌رده‌وامییه‌ که‌ سه‌ربه‌رزیى بۆ هه‌موان ده‌سته‌به‌ر ده‌کات و داهات و ده‌رفه‌تى کاریان بۆ ده‌ڕ‌ه‌خسێنێت به‌ تایبه‌تیى گه‌نجان و به‌شداریى ده‌کات له‌ هێنانه‌ کایه‌ى ئاشتیى کۆمه‌ڵایه‌تیى و ئۆقره‌یى و ئاوێزانى ژیانى پیشه‌یى و خێزانیى و کۆمه‌ڵایه‌تیى ده‌بێت که‌ ویستى هه‌مو هاوڵاتییه‌که‌ و چاوه‌ڕ‌ێى گشتگیرکردنى ده‌سته‌به‌رى خوێندن و ته‌ندروستییش ده‌که‌ن.
به‌رپرسیاریه‌تى پێویستى به‌وه‌یه‌ که‌ ئه‌وه‌نده‌ى ده‌کرێت کار بکه‌ین و ده‌ستپێشخه‌ریى بکه‌ین. وڵاته‌که‌مان ئێستا روبه‌روى مه‌ترسیى پشت به‌ستن به‌ تاکه‌ سه‌رچاوه‌یى ده‌بێته‌وه‌ که‌ نه‌وته‌ بۆیه‌ ده‌خوازرێت بایه‌خ و په‌رۆشیى بۆ نوێکردنه‌وه‌ و گه‌شه‌پێدانى ئابوریى نیشمانییمان هه‌مه‌ جۆرکردنى سه‌رچاوه‌کانى داهات بێت له‌ هه‌مو که‌رته‌کانى به‌رهه‌م هێنانى تردا به‌ تایبه‌تیى کشتوکاڵ، پیشه‌سازیی، بازرگانیى و گه‌شتیارییدا، ئه‌وه‌ش به‌ بێ پلانێکى زانستیى و پرۆژه‌ى دیراسه‌تکراو سه‌رناگرێت که‌ سود وه‌ربگیرێت له‌ شاره‌زایى و ئه‌زمونى ده‌وڵه‌تانى دۆست و برا که‌ ئه‌زمونه‌کانى په‌ره‌پێدانیان له‌گه‌ڵ ئه‌کمون و هه‌لومه‌رجى وڵاتماندا نزیکه‌ که‌ ده‌بێته‌ مایه‌ى سه‌رنج راکێشان و هاندانى وه‌به‌رهێنان و په‌ره‌پێدان کارا و خێرا ده‌کات له‌ هه‌مو بواره‌کاندا.
 
ئه‌مه‌ش دیسانه‌وه‌ پێویستى به‌ ره‌تکردنه‌وه‌ى دیارده‌کانى گه‌نده‌ڵییه‌ به‌ هه‌مو شێوه‌کانیه‌وه‌ و، ره‌تکردنه‌وه‌ى به‌کار هێنانى ئسلوبى تائیفیى و دوبه‌ره‌کیى و رق له‌یه‌کتر بونه‌ له‌ نێو عێراقییه‌کان خۆیان و تێکشکاندنى هه‌ر هه‌وڵێکى ته‌کفیرى له‌ به‌رگى ئاینیدا و به‌کارهێنانى هێما و فکره‌کانیان بۆ زیان گه‌یاندن به‌ گه‌ل و وڵاته‌که‌مان.
هه‌ر ئه‌م دۆخه‌ پێویستى به‌ رێزگرتنى ژنانه‌ که‌ ده‌ستور بڕ‌یارى له‌باره‌وه‌ داوه‌ له‌رێى نه‌هێشتنى هه‌مو جۆره‌ شێوه‌کانى جیاوازیگه‌ریى دژى ژن و زامنکردنى ته‌واوى مافه‌کانى هاوڵاتیبونیان له‌وانه‌ مافى یه‌کسان بونى له‌گه‌ڵ پیاودا به‌ گرتنه‌ ده‌ستى پۆسته‌کانى سه‌رکردایه‌تیى له‌ بواره‌ سیاسیی، ئابوریی، روناکبیریى کۆمه‌ڵایه‌تییه‌کاندا.
خوشک و برایانى به‌ڕ‌ێز،
ئه‌م خولى چواره‌مه‌ى ئه‌نجومه‌نى نوێنه‌ران به‌ له‌ هه‌لومه‌رجێکى ورد و ناسکدایه‌ که‌ هاوکاته‌ له‌گه‌ڵ به‌روپێشچونى هه‌نگاوى عێراقییه‌کان بۆ ته‌واوکردنى بنیاتنانى ده‌وڵه‌ته‌ نوێ و پێشکه‌وتوه‌که‌یان که‌ هه‌وڵ ده‌دا وه‌ک هه‌ر ده‌وڵه‌تێکى دیموکراسیى ته‌واوى خزمه‌تگوزارییه‌کان دابین بکات که‌ ده‌ستور و قانون ده‌سته‌به‌ریان کردوه‌ بۆ هه‌مو هاوڵاتییان. به‌ تایبه‌تیى چاومان له‌وه‌یه‌ مافه‌کانى هاوڵاتییان له‌ ناوچه‌ رزگارکراوه‌کان و هه‌مو ئاواره‌ بوه‌کان و دیله‌کان بپارێزین شانبه‌شانى ده‌سبه‌کاربون بۆ ئاوه‌دانکردنه‌وه‌ى ناوچه‌ رزگار بوه‌کان و هه‌مو وڵات.
 
لێره‌دا دوپاتکردنه‌وه‌ى نه‌گۆڕ‌مان نوێ ده‌که‌ینه‌وه‌ بۆ پێویستیى چاره‌سه‌رکردنى دیارده‌کانى بێکاریى و هه‌ژاریى و قوڵکردنه‌وه‌ى هوشیاریى کۆمه‌ڵایه‌تیى و گه‌شه‌پێدانى پرۆگرامه‌کانى خوێندن و په‌روه‌رده‌ و دابینکردنى خزمه‌تگوزارییه‌کان.. له‌ پاڵ به‌هێزکردنى ئاشتیى کۆمه‌ڵایه‌تیى و په‌ره‌پێدانى هاریکاریى ئه‌منیى ئیقلمیى و نێوده‌وڵه‌تیى و چڕ‌کردنه‌وه‌ى هه‌وڵى تایبه‌ت بۆ چاره‌سه‌رکردنى دۆسیه‌ى ئاو له‌ ئاستى ستراتیژیى پاش ئه‌وه‌ى نزمبونه‌وه‌ى ئاستى ئاوه‌کان کاریگه‌ریى ترسناکى دروستکردوه‌ له‌سه‌ر ژینگه‌ى کشتوکاڵ و سامانى ئاژه‌ڵ و ئابوریى له‌ هه‌مو وڵاتدا، ده‌بێت جموجۆڵه‌کان له‌ ئاستى نێوده‌وڵه‌تیدا چالاک بکرێن له‌ پێناوى زامنکردنى مافه‌کانى عێراق له‌ سه‌رچاوه‌ ئاوییه‌کان و چاره‌سه‌رکدرنى کێشه‌کانى تر، پێویسته‌ هوشیاریى قوڵ بکرێته‌وه‌ بۆ چاره‌سه‌ر کردنى هه‌مو کێشه‌کان و تێپه‌ڕ‌اندنى هه‌ڵه‌کان و کارکردن بۆ به‌شداریى پێکردنى هه‌مو توانا نیشتمانییه‌کان و چالاکییه‌ جدییه‌کان هه‌مو هێز و توانا زیندوه‌کانى گه‌ل به‌ ئامانجى به‌دیهێنانى پێشکه‌وتنى سه‌رتاسه‌ریى که‌ گه‌ره‌کمانه‌.
 
خوشک و برایانى ئه‌ندامانى ئه‌نجومه‌نى نوێنه‌ران،
ئێوه‌ به‌رپرسیارێتیتان له‌ ئه‌ستۆدایه‌ له‌به‌رده‌م خودا و گه‌ل و ده‌ستوردا بۆ داواکاریى و خواسته‌کانى عێراق و عێراقییه‌کان. پێویسته‌ به‌و په‌ڕ‌ى راستگۆیى و لێپرسراوێتییه‌وه‌ به‌شداریى بکه‌ن له‌ هه‌وڵه‌ نیشتمانییه‌کاندا بۆ گۆڕ‌اندنى ئه‌م بارودۆخه‌ دور له‌ هه‌ر لێکدانه‌وه‌یه‌کى شه‌خسیى و حزبیی، چونکه‌ عێراق وڵاتى هه‌موانه‌ مافى هه‌مو عێراقییه‌کانه‌ سود وه‌ربگرن له‌ پێشکه‌وتن و به‌رهه‌مه‌کانى گه‌شه‌ کردن.
 
نه‌مریى بۆ شه‌هیدانى ئازادیى عێراق و ئاینده‌ دیموکراسییه‌که‌ی.
 
سه‌رکه‌وتنى هه‌میشه‌یى و ئاشتیى و پێشکه‌وتن بۆ گه‌له‌که‌مان.. هه‌مو هیوایه‌کمان سه‌رکه‌وتنتانه‌ له‌ به‌ ئاکام گه‌یاندنى لێپرسراویه‌تى نیشتمانیى زۆر که‌ که‌وتۆته‌ سه‌رشانتان به‌و جۆره‌ى که‌ که‌ له‌ به‌رژه‌وه‌ندیى نیشتمان و هاوڵاتیاندایه‌.
 
 
به‌خوداتان ده‌سپێرم و خواتان له‌گه‌ڵ”.