دادگای سلێمانی رونكردنه‌وه‌یه‌ك بڵاوده‌كاته‌وه‌ له‌سه‌ر ڕاگرتنی كارمه‌ندێكی هاتوچۆ

نیسان 30, 2019

جه‌ماوه‌رنیوز

دادگای سلێمانی رونكردنەوە لەسەر راگرتنی كارمەندەكەی هاتوچۆی خورماڵ دەدات و ئاماژە بەوەدەكات، ئەو كارمەندە بەبێ دەسەڵاتی خۆی پسوڵەی سەرپێچی بۆ شۆفێران نوسیوە.

دەقی ڕونكردنەوەكەی دادگای سلێمانی:
لە چەند دەزگایەكی میدیایی و تۆڕە كۆمەڵایەتییەكان هەواڵێك بڵاوكراوەتەوە كە گوایە پۆلیسێكی هاتوچۆ لەسەر ئەوەی داوای مۆڵەتی لە دادوەرێك كردووە دەستگیر كراوە.. بۆئەوەی ڕاستییەكان نەشێوێندرێن ئەم ڕونكرندەوەیەمان بەپێویست زانی:
یەكەم: تۆمەتبار بەهیچ شێوەیەك لەسەر سكاڵای دادوەرێكی داواكاری گشتی ڕانەگیراوە بەڵكو دۆسیەی سكاڵای ئەو دادوەرە بەڕێزە ئەگەڕێتەوە بۆ ساڵی ٢٠١٧ و دواتر لێی خۆشبووە و دۆسیەكە داخراوە.. دواتر بەپێی نوسراوی بەڕێوەبەرایەتی پۆلیسی هاتوچۆی پارێزگای هەڵەبجە دەركەوتووە كە ئەو تۆمەتبارە دەسەڵاتی نەبووە كە پسوڵەی سەرپێچی بنوسێت بەڵام بەدەر لە دەسەڵاتی خۆی وەسڵی سەرپێچی بۆ شۆفێران كردووە.. بۆیە بەپێی ماددەی (٣٣١) لە یاسای سزادانی عێراقی بە (تجاوز الحدود الوڤیفی) دەستگیركراوە و دۆسیەكەی ئێستا لە دادگای لێكۆڵینەوەی دەستپاكییە بەژمارە (٢٠١٧/٢/٩٨).
دووەم: هەموولایەك و بەتایبەتی بەڕێزان لە پۆلیسی هاتوچۆ دڵنیا دەكەینەوە كە ئێمە بەتەواوی پشتگیریانین لە چەسپاندنی یاسا و وەرگرتنی ڕێكاری یاسایی بەرامبەر هەر كەسێك كە پێشێلی یاسای هاتوچۆ بكات، لەگەڵ ئەوەشدا ئەوانیش لەسەریان پێویستە كە سنوری ڕێز بپارێزن و تەنها یاسا جێبەجێ بكەن بەبێ تێكەڵاوكردنی ڕق یان هەستوسۆزی كەسیی خۆیان.
لەگەڵ ڕێزدا