چاودێری‌و گه‌شه‌پێدانی کۆمه‌ڵایه‌تی: به‌رنامه‌ی باشتر به‌ڕێوه‌ ده‌به‌ین بۆ پێشخستنی په‌یمانگاکانی ڕاهێنانی منداڵانی خاوه‌ن پێداویستی تایبه‌ت

نیسان 30, 2019

جه‌ماوه‌رنیوز


ڕۆژی سێ شه‌ممه‌، 30ی 4ی 2019، به‌ ئاماده‌بوونی عومه‌ر گوڵپی، به‌ڕێوه‌به‌ری گشتی چاودێری‌و گه‌شه‌پێدانی کۆمه‌ڵایه‌تی له‌پارێزگای سلێمانی‌و ئاشتی ئیبراهیم، یاریده‌ده‌ری به‌ڕێوه‌به‌ری گشتی‌و ئاشتی نوری، به‌ڕێوه‌به‌ری چاودێری که‌مئه‌ندامانی سلێمانی‌و هیوا سه‌عید، سه‌رپه‌رشتیاری کۆمه‌ڵایه‌تی‌و هیوا ڕه‌حمان، سه‌رپه‌رشتیاری هۆبه‌ی به‌دواداچوون له‌ دیوانی به‌ڕێوه‌به‌رایه‌تی گشتی‌و ژماره‌یه‌ک له‌ به‌ڕێوه‌به‌ری دامه‌زراوه‌ کۆمه‌ڵایه‌تییه‌کان، په‌یمانگای ئاوات بۆ په‌روه‌رده‌ی مێشک پێشانگای ساڵانه‌ی خۆی بۆ سودمه‌ندانی کرده‌وه‌.

له‌و چالاکییه‌دا، خاتوو که‌ژاڵ عه‌لی، به‌ڕێوه‌به‌ری په‌یمانگای ئاوات‌و مامۆستاو توێژه‌رانی کۆمه‌ڵایه‌تی کاره‌کانی په‌یمانگایان بۆ ساڵی 2018 - 2019 خسته‌ڕوو، هه‌روه‌ک تواناییه‌کانی ستافه‌کانی په‌یمانگاو پێویستییه‌کانیان بۆ باشترکردنی ئه‌دا بۆ به‌ڕێوه‌به‌ری گشتی خسته‌ڕوو، له‌وباره‌یه‌وه‌ به‌ڕێز به‌ڕێوه‌به‌ری گشتی پاش بینینی به‌رهه‌می ده‌ستی منداڵان و سودمه‌ندانی په‌یمانگاو گوێبیستبوونی چۆنیه‌تی به‌ڕێوه‌چوونی کاره‌کانی ڕۆژانه‌ی په‌یمانگا، ده‌ستخۆشی خۆی ئاراسته‌ی به‌ڕێوه‌به‌رو مامۆستاو ستافه‌کانی په‌یمانگا کرد که‌ دڵسۆزانه‌ ئه‌رکه‌کانیان ڕاده‌په‌ڕێنن، هه‌روه‌ک ئه‌وه‌ی به‌ ئاماده‌بووان ڕاگه‌یاند که‌ به‌ پێی به‌رنامه‌ی به‌ڕێوه‌به‌رایه‌تی گشتی له‌ماوه‌ی شه‌ش مانگی داهاتوودا کاری ته‌واو ده‌کرێت بۆ ڕێکخستنه‌وه‌ی باشتری په‌یمانگاو سه‌نته‌ره‌کان له‌ڕووی کارگێڕی و دانانی پڕۆگرامی زانستی ئاست به‌رزو ڕاهێنانی زیاتر بۆ ستافه‌کان تا بتوانن له‌ ساڵی داهاتوودا به‌ به‌رنامه‌یه‌کی باشتره‌وه‌ ده‌ست پێ بکه‌نه‌وه‌ و له‌ ئاست چاوه‌ڕوانی و خواستی سودمه‌ندانیاندا بن له‌ منداڵانی خاوه‌ن پێداویستی تایبه‌ت و خانه‌واده‌کانیان.

په‌یمانگای ئاوات یه‌کێک له‌ په‌یمانگاکانی به‌ڕێوه‌به‌رایه‌تی چاودێری که‌مئه‌ندامانی سلێمانیه‌ له‌ سنوری کاری به‌ڕێوه‌به‌رایه‌تی گشتیماندا، و کارده‌کات بۆ ڕاهێنانی منداڵانی داون‌و ئه‌و منداڵانه‌ی له‌ ڕووی توانای ژیریی‌و هزرییه‌وه‌ پێویستیان به‌ پاڵپشتی هه‌یه‌.