کرێی کارمه‌ندو کرێکاری دایه‌نگه‌کان دیارى ده‌کرێت

جه‌ماوه‌رنیوز


به‌پێی گشتاندنێک که‌ ژماره‌ (2085)ی له‌سه‌ره‌و له‌ به‌رواری (13ی 5ی 2019) ده‌رچووه‌، به‌شی دایه‌نگه‌کان له‌ به‌ڕێوه‌به‌رایه‌تی گشتی چاودێری‌و گه‌شه‌پێدانی کۆمه‌ڵایه‌تی له‌ پارێزگای سلێمانی دایه‌نگه‌کان ئاگادار ده‌کاته‌وه‌ به‌وه‌ی نابێت کرێ و مووچه‌ی کارمه‌ندو کرێکارو داده‌ی دایه‌نگه‌کان له‌ (285,000 - دوو سه‌دو هه‌شتاو پێنج هه‌زار) دینار که‌متر بێت.

هه‌ر له‌و گشتاندنه‌دا که‌ له‌ چوار خاڵ پێکهاتووه‌، به‌ڕێوه‌به‌رایه‌تی ناوبراو دایه‌نگه‌کان پابه‌ند ده‌کات به‌ دابینکردنی ده‌سته‌به‌ری کۆمه‌ڵایه‌تی بۆ کارمه‌ندانیان، به‌ پێچه‌وانه‌وه‌ هه‌ر دایه‌نگه‌یه‌ک پابه‌ند نه‌بێت لێپێچینه‌وه‌ی به‌رانبه‌ر ده‌گیرێته‌ به‌ر.

گشتاندنه‌که‌ پشتی به‌ نووسراوێکی سه‌رۆکایه‌تی ئه‌نجومه‌نی وه‌زیران به‌ستووه‌ که‌ ژماره‌ (12334)ی له‌سه‌ره‌و له‌ به‌رواری (22ی 11ی 2012) ده‌رچووه‌، و تیایدا جه‌خت ده‌کاته‌وه‌ وه‌ک لانی که‌می کرێی کارکردن بۆ هه‌ر کارێکارێک، سه‌باره‌ت به‌ ده‌سته‌به‌ری کۆمه‌ڵایه‌تیش ئه‌وه‌ به‌ پێی یاسای کار پێویسته‌ کارمه‌ندانی که‌رتی تایبه‌ت مانگانه‌ ده‌سته‌به‌ری کۆمه‌ڵایه‌تییان له‌لایه‌ن خاوه‌ن کاره‌وه‌ بۆ بکرێت بۆ ئه‌وه‌ی وه‌ک هه‌ر کارمه‌ندێکی که‌رتی گشتی له‌ کاتی ته‌واوکردنی خزمه‌ت و مه‌رجه‌ یاساییه‌کان خانه‌ نشین بکرێت.

 

ئەلبوومی وێنەکان