Error: No articles to display

كۆسره‌ت ڕه‌سوڵ داوای یه‌ك ڕیزی له‌ به‌رهه‌م ساڵح ده‌كات

تشرینی یەکەم 02, 2018

جه‌ماوه‌رنیوز
کۆسره‌ت ڕه‌سوڵ، جێگری یه‌که‌می سکرتێری یه‌کێتی نیشتمانی په‌یامێک ئاراسته‌ی د. به‌رهه‌م ئه‌حمه‌د ساڵح ده‌کات له‌ په‌یامه‌که‌دا هاتووه‌ " لەکاتێکدا پیرۆزبایی لە ناخی دڵمەوە لە کاک دکتۆر بەرهەم دەکەم، لە هەمانکاتدا داوای لێدەکەم رۆڵی بەرچاو و کاریگەر و چالاکانە لە گشت بوارەکاندا ببینێ، هەروەها پاراستن و رێزگرتن لە یەکڕیزی گەلی کوردستان".
له‌په‌یامه‌که‌یدا کۆسره‌ت ڕه‌سوڵ ئه‌وه‌ی خستۆته‌ڕوو " ئەم پۆستە پۆستی هەموو خەڵکی عێراق و هەرێمی کوردستانە بە تایبەت کەسوکاری شەهیدە سەربەرزەکان".


دەقی پەیامەکە:

کەسوکاری شەهیدە سەربەرزەکان
پێشمەرگە قارەمانەکان
جەماوەری خۆڕاگری کوردستانی خۆشەویست
سڵاوێکی گەرمی کوردانەتان لێبێت

پیرۆزبایی لە گشت خەڵکی کوردستان دەکەم بەبۆنەی هەڵبژاردنی هەڤاڵ دکتۆر بەرهەم ساڵح بە سەرۆکی کۆماری عێراق لە هەڵبژاردنێکی دەستووری دیموکراسییانەی ئازاد لە پەرلەمانی عێراق.

هەڵبژاردنی هەڤاڵێکی دڵسۆزی یەکێتیی نیشتمانیی کوردستان بە سەرۆککۆمار جێگەی متمانە و خۆشەویستی خەڵکی عێراقە، هەر بەم بۆنەیەوە سوپاسی بێپایانی خۆم ئاراستەی سەرجەم لایەنە سیاسییەکانی عێراق دەکەم کە پشتگیری کاندیدی یەکێتیان کرد لە پرۆسەیەکی دیموکراسییانە هەڵیانبژارد بە سەرۆکی هەموو عێراق. لەکاتێکدا پیرۆزبایی لە ناخی دڵمەوە لە کاک دکتۆر بەرهەم دەکەم، لە هەمانکاتدا داوای لێدەکەم رۆڵی بەرچاو و کاریگەر و چالاکانە لە گشت بوارەکاندا ببینێ، هەروەها پاراستن و رێزگرتن لە یەکڕیزی گەلی کوردستان.

خۆشەویستان

ئەم پۆستە پۆستی هەموو خەڵکی عێراق و هەرێمی کوردستانە بە تایبەت کەسوکاری شەهیدە سەربەرزەکان، وەرگرتنی ئەم پۆستە بە هەڵبژاردن لە رۆژێک کە هاوکاتە لەگەڵ ساڵیادی کۆچی دوایی هەڤاڵ (مام جەلال)، بەم بۆنەیەوە یەکێتیی نیشتمانیی کوردستان کە هەردەم هەوێنی برایەتی و یەکڕیزی بووە تەئکیدی ئەوە دەکاتەوە کە ببێتە فاکتەری بەهێزبوونی ریزەکانی ناوماڵی کورد و بەتایبەت یەکێتیی نیشتمانی کوردستان و پارتیی دیموکراتی کوردستان.

هەربژی کورد
هەربژی کوردستان

کۆسرەت رەسول عەلی،
جێگری سکرتێری گشتی یەکێتیی نیشتمانیی کوردستان