Error: No articles to display

ئه‌نجومه‌نی ئاسایش: ڕێگه‌ ناده‌ین ده‌ستدرێژی بکرێته‌ سه‌ر موڵک و ماڵی گشتی و هاوڵاتیان

تشرینی یەکەم 18, 2018

جه‌ماوه‌رنیوز
ئه‌نجومه‌نی ئاسایشی هه‌رێمی کوردستان ڕاگه‌یه‌نراوێکی بڵاو کرده‌وه‌ له‌ باره‌ی نه‌هێشتنی ده‌ستیوه‌ردانی موڵکی گشتیدا و له‌ راگه‌یه‌نراوه‌که‌ ئه‌وه‌ی خستۆته‌روو " به‌پێی بڕیاری دادوه‌ر، له‌ ئۆپه‌راسیۆنێکی ده‌زگا ئه‌منییه‌کان و به‌ڕێوه‌به‌رایه‌تی ئاسایشی گشتی، گروپێکی دزین و به‌ قاچاخبردنی نه‌وت ده‌ستگیرکرا".

ئەمەش دەقی ڕاگەیاندراوەکەیە:
راگه‌یاندراوێک له‌ ئه‌نجومه‌نی ئاسایشی هه‌رێمی کوردستانه‌‌وه‌
له‌چوارچێوه‌ی هه‌ڵمه‌ته‌کانی جێبه‌جێکردنی یاسا، بۆ به‌ره‌نگاربوونه‌وه‌ی گه‌نده‌ڵی و نه‌هێشتنی ده‌ستێوه‌ردان له‌ موڵکی گشتی. به‌پێی بڕیاری دادوه‌ر، له‌ ئۆپه‌راسیۆنێکی ده‌زگا ئه‌منییه‌کان و به‌ڕێوه‌به‌رایه‌تی ئاسایشی گشتی، گروپێکی دزین و به‌ قاچاخبردنی نه‌وت ده‌ستگیرکرا، که‌ پێکهاتووه له‌ چوار هاوڵاتی و دوو کارمه‌ندی ئاسایش.
ده‌ستگیرکراوان به‌ پێی رێوشوێنه‌ یاساییه‌کان مامه‌ڵه‌یان له‌گه‌ڵدا ده‌کرێت و دوای ته‌واو بوونی لێکۆڵینه‌وه‌کانیش، له‌لایه‌ن دادگاوه‌ دۆسیه‌کانیان یه‌کلا ده‌کرێته‌وه‌.
ئێمه له‌ ئه‌نجومه‌نی ئاسایشی هه‌رێمی کوردستان، هه‌موو لایه‌ک دڵنیا ده‌که‌ینه‌وه، له‌ پێناو سه‌روه‌ری یاسا، ئه‌رک و شه‌ونخونی ده‌زگاکانمان به‌رده‌وام ده‌بێت و رێگه‌ ناده‌ین ده‌ستدرێژی بکرێته‌ سه‌ر موڵک و ماڵی گشتی و هاووڵاتیان، هه‌ر که‌س و لایه‌نێکیش یاساشکێنی بکات، رووبه‌رووی دادگا ده‌کرێته‌وه‌ و سزای یاسایی خۆی وه‌رده‌گرێت.
پێویسته ده‌زگا ئه‌منییه‌کان له‌ پارێزگا و ناوچه‌ جیاجیاکانی دیکه‌ی هه‌رێمی کوردستان‌، جێبه‌جێکاری یاسابن و به‌هه‌مانشێوه‌ مامه‌ڵه‌ له‌گه‌ڵ رێگر و یاساشکێنه‌کان بکه‌ن و داڵده‌ی قاچاخچی و گه‌نده‌ڵکاران نه‌درێت.

ئه‌نجومه‌نی ئاسایشی هه‌رێمی کوردستان
١٨ی ئۆکتۆبه‌ری ٢٠١٨