له‌ ئه‌مساڵدا یه‌که‌م ڕۆژنامه‌وان کوژرا

کانونی دووەم 22, 2019

جه‌ماوه‌رنیوز


کاربه‌ده‌ستانى مه‌کسیک ڕایانگه‌یاند ته‌رمى ڕۆژنامه‌وان ڕافائێل موروا مارکیز دۆزراوه‌ته‌وه‌ که‌ به‌ڕێوه‌به‌رى ڕادیۆى کاشانا بوو له‌ شارى مولیگێ و پـێشتر هه‌ڕه‌شه‌ى کوشتنى لێکرابوو.

به‌پێى ڕاپـۆرته‌کانى پـۆلیس ته‌رمى ئه‌م ڕۆژنامه‌وانه‌ له‌ ناو چاڵێکدا له‌ شارى سانتا ڕۆسالیا دۆزراوه‌ته‌وه‌ که‌ زیاتر له‌ 60 کیلۆمه‌تر له‌ باکورى شارى مولیگێـیه‌وه‌ دوره‌. به‌مه‌ش ده‌بێته‌ یه‌که‌م ڕۆژنامه‌وان که‌ له‌ ئه‌مساڵدا له‌ مه‌کسیک بکوژرێت.

به‌پـێى ڕێکخراوى په‌یامنێرانى بێ سنوور، له‌ پاش ئه‌فغانستان و سوریا، مه‌کسیک مه‌ترسیدارترین وڵاته‌ بۆ کارى ڕۆژنامه‌گه‌ری.

ئیمانۆئێل کۆلۆمبى سه‌رۆکى ئۆفیسى په‌یامنێرانى بێ سنوور له‌ ئه‌مه‌ریکاى لاتین ده‌ڵێت ده‌بێت ده‌سه‌ڵاتدارانى مه‌کسیک لێکۆڵینه‌وه‌یه‌کى ته‌واوبکه‌ن له‌ باره‌ى ئه‌م کوشتنه‌ وه‌ ئه‌وه‌ش له‌به‌ر چاوبگرن که‌ زیاتر گومان ده‌کرێت ڕافائێل مارکیز له‌سه‌ر کارى ڕۆژنامه‌وانیـیه‌که‌ى کوژرابێت.

به‌پـێى ئاماره‌کان له‌وه‌تاى ساڵى 2000 وه‌ هه‌تا ئێستا 122 ڕۆژنامه‌وان له‌ مه‌کسیک کوژراون و زۆربه‌یان که‌یسه‌کانیان په‌یوه‌ندى به‌ لێکۆڵینه‌وه‌ سه‌ر مادده‌ هۆشبه‌ره‌کان و گه‌نده‌ڵى سیاسى نێو وڵاته‌که‌یانه‌وه‌ هه‌یه‌.

جگه‌ له‌ ڕۆژنامه‌وانان، له‌ ماوه‌ى ساڵى ڕابردوو زیاتر له‌ 33 هه‌زار که‌س له‌ مه‌کسیک کوژراون، واته‌ 5 هه‌زار که‌س زیاتر کوژراون به‌راورد به‌ ساڵى 2017 که‌ 28 هه‌زار که‌س کوژرابوون.

 

ده‌نگى ئه‌مه‌ریکا