نێچرڤان بارزانى ئه‌نجامدانى هه‌ردوو هه‌ڵبژاردنى په‌رله‌مانى عێراق و کوردستان دوو سه‌رکه‌وتنى گه‌وره‌ بوون

شوبات 01, 2019

جه‌ماوه‌رنیوز

 

نێچیرڤان بارزانى سه‌رۆک وه‌زیرانى هه‌رێم له‌ یادى شه‌هیدانى یه‌کى شووبات ووتارێکى پێشکه‌ش کردوو تیایدا ئاماژه‌ى به‌وه‌کرد که‌ شه‌هیدانى یه‌کى شووبات بۆ هه‌میشه‌ له‌ دڵى هه‌موو کوردستانییه‌کدا هه‌ر به‌ زیندوویى ده‌مێنێته‌وه‌ و جارێکى دیکه‌ سڵاو و دروودى نارد بۆ گیانى پاکى هه‌موو شه‌هیدانى یه‌کى شوبات و سه‌رى ڕێز و نه‌وازشى له‌به‌رده‌م گیانى پاکى ئه‌وان و سه‌رجه‌م شه‌هیدانى کوردستاندا، دانه‌واند.

هه‌روه‌ها ئه‌نجامدانى هه‌ردوو هه‌ڵبژاردنى په‌رله‌مانى عێراق و کوردستان له‌ ساڵى ڕابردووى به‌ دوو سه‌رکه‌وتنى گه‌وره‌ وه‌سف کرد که‌ سه‌ره‌ڕاى سه‌ختى و قه‌یرانه‌کان به‌ سه‌رکه‌وتوویى به‌ ئه‌نجام گه‌یشت و شانازیییه‌کى دیکه‌ى بۆ هه‌رێمى کوردستان تۆمار کرد.

ده‌قى وتارى سه‌رۆک وه‌زیران:

که‌سوکارى شه‌هیدان،
ئاماده‌بووانى به‌ڕێز به‌یانیتان باش و هه‌موولایه‌کتان به‌خێر بێن ...

به‌خێرهاتنتان ده‌که‌م بۆ پازده‌هه‌مین ساڵیادى شه‌هیدانى یه‌کى شوبات. به‌خێرهاتنى نوێنه‌رانى وڵاتانى بیانى له‌ هه‌رێمى کوردستان ده‌که‌م، هه‌موولایه‌کیان به‌خێربێن بۆ به‌شداریکردن له‌گه‌ڵ ئێمه‌ له‌م ڕێوڕه‌سمه‌دا. شه‌هیدانى ئه‌و ڕۆژه‌ ڕه‌ش و خه‌مناکه‌ى له‌لایه‌ن خه‌ڵکى کوردستانه‌وه‌ به‌ "کاره‌ساتى یه‌کى شوبات" ناسراوه‌.

پازده‌ ساڵ پێشتر وه‌ک ئه‌مڕۆ، ڕۆژى 1ى شوباتى ساڵى 2004، له‌ هێرشێکى هاوکاتدا، هه‌ردوو باره‌گاى لقى دووى پارتى دیموکراتى کوردستان و مه‌ڵبه‌ندى سێى ڕێکخستنى یه‌کێتیى نیشتیمانیى کوردستان له‌ هه‌ولێرى خۆشه‌ویستدا، کرانه‌ ئامانجى دوو هێرشى تیرۆریستى و له‌ ئه‌نجامدا 101 که‌س له‌ سه‌رکرده‌ و پێشمه‌رگه‌ و خه‌باتگێێ‌ و کادیران و هاووڵاتیانى هه‌رێمى کوردستان له‌ هه‌ولێر شه‌هید بوون.

لێره‌دا جارێکى تر ڕێز له‌ گیانى پاکى یه‌ک به‌یه‌کى ئه‌و 101 شه‌هیده‌ ده‌گرین و به‌بیریان ده‌هێنینه‌وه‌. هه‌روه‌ها ڕێز له‌ خه‌باتى هه‌موو ئه‌و به‌رپرسانه‌ى حکوومه‌ت و پارتى و یه‌کێتى ده‌گرین که‌ له‌و ڕۆژه‌دا شه‌هید کران. یه‌کى شوبات ئه‌و ڕۆژه‌یه‌ که‌ خوێنى 101 سه‌رکرده‌ و پێشمه‌رگه‌ و هاووڵاتیى دیکه‌ى ئه‌م وڵاته‌ تێکه‌ڵى خاکى پیرۆزى کوردستان بوو. ڕۆژێک بوو که‌ تیرۆریسته‌ ڕه‌شبین و ڕه‌شبیره‌کان له‌ یه‌ک کاتدا له‌ هه‌ولێرى پایته‌ختى لێبوورده‌یى و میواندۆستى و ئایینپه‌روه‌ری، هه‌ردوو باره‌گاى سه‌ره‌کیى یه‌کێتیى نیشتمانیى کوردستان و پارتییان کرده‌ ئامانج.

ئه‌و ڕۆژه‌ که‌ جه‌ژنى قوربان بوو، خه‌ڵکى هه‌ولێر ده‌سته‌ ده‌سته‌ ده‌هاتن و پیرۆزباییى جه‌ژنیان له‌ کاربه‌ده‌ستانى حکوومه‌ته‌که‌یان و به‌رپرسه‌ حیزبییه‌کانیان ده‌کرد. هه‌موو لایه‌ک دڵخۆش بوون و گه‌ردن ئازادییان له‌ یه‌کتر ده‌کرد، به‌ڵام تیرۆریستان، خۆشیى جـه‌ژنى قوربان و هیچ خۆشییه‌ک به‌ خه‌ڵکى کوردستان ڕه‌وا نابینن و وه‌ک کاره‌ هه‌میشه‌ ناشیرینه‌کانیان، ئه‌مجاره‌ش جه‌رگى ده‌یان دایکیان سووتاند و دڵى سه‌دان دۆست و هاوڕێ و که‌سوکارى ئه‌و شه‌هیدانه‌یان ئێشاند.

ئه‌مڕۆ ئێمه‌ ‌یادى ڕووداوێکى ئاسایى ناکه‌ینه‌وه‌، به‌ڵکو یادى تێکه‌ڵبوونى خوێنى پێشمه‌رگه‌ و سه‌رکرده‌کانى پارتى دیموکراتی کوردستان و یه‌کێتیى نیشتمانیى کوردستان ده‌که‌ینه‌وه‌‌، که‌‌ له‌ ڕۆژه‌ سه‌خته‌کاندا و بۆ پارێزگاریکردن له‌ ده‌ستکه‌وته‌کانى گه‌لى کوردستان پێکه‌وه‌ له‌ یه‌ک سه‌نگه‌ردا بوون، تاکو له‌ کۆتاییدا‌‌ توانییان پێکه‌وه‌ کوردستان سه‌ربخه‌ن.

ئێمه‌ که‌ له‌ یه‌کى شوباتدا زۆر هاوکار و هاوخه‌بات و ئازیز و خۆشه‌ویستمان له‌ده‌ست دا، هه‌موومان له‌ ناخى دڵه‌وه‌ به‌و کاره‌ساته‌ دڵته‌زێنه‌ هه‌ژاین. له‌ هه‌مان کاتدا ئه‌و ڕاستییه‌ش جارێکى دیکه‌ که‌وته‌وه‌ به‌رچاوى هه‌موومان که‌ دوژمنان هیچ جیاوازییه‌کمان له‌نێواندا ناکه‌ن و له‌یه‌ک کاتدا دوژمنایه‌تیى هه‌موومان ده‌که‌ن، بۆیه‌ له‌م ڕۆژه‌دا ده‌بێ ئێمه‌ به‌بیرخۆمان بهێنینه‌وه‌ که‌ ده‌بێ ئێمه‌ش یه‌کگرتوو بین و هه‌میشه‌ یه‌کگرتووییى خۆمان له‌ پرۆسه‌ و پرسه‌ نیشتمانییه‌کاندا هه‌موولایه‌که‌مان به‌یه‌که‌وه‌ بیپارێزین.

به‌ڕێزان..
بزووتنه‌وه‌ى ڕزگاریخوازى کوردستان و سه‌رکرده‌کانى له‌ کوردستانى عێراق، هه‌میشه‌ ئامانجى توندڕه‌وان و تیرۆریستان بوون. له‌گه‌ڵ ئه‌وه‌شدا بزووتنه‌وه‌ى ڕزگاریخوازى کوردستان هیچ کاتێک په‌ناى نه‌بردووه‌ته‌ به‌ر تیرۆر و هه‌میشه‌ له‌ به‌ره‌ى به‌ره‌نگاربوونه‌وه‌ى تیرۆردا بووه‌.

شۆڕشى کوردستان له‌پێناو گه‌یشتنى گه‌لى کوردستان بووه‌ به‌ ئامانجه‌کانى له‌سه‌ر خاکى خۆی، بۆیه‌ هێرش و ده‌ستدرێژى و تیرۆر، کارى گه‌لى کوردستان نه‌بووه‌، به‌ڵکو به‌رگریکردن و ئازادیخوازى له‌سه‌ر خاکه‌که‌ی، ڕێگه‌ى خه‌باتى به‌رده‌وامى شۆڕشگێڕانى ئه‌م وڵاته‌ بووه‌. له‌به‌رئه‌وه‌ پاراستن و مانه‌وه‌ى پێکه‌وه‌ژیان و لێبوورده‌یى له‌ کوردستان، ڕێگرێکى گه‌وره‌ بووه‌ له‌ فراوانبوونى مه‌ترسیى تیرۆر و هزرى توندڕه‌وى له‌ ناوچه‌که‌دا.

ئه‌م تایبه‌تمه‌ندییه‌ و ڕۆڵى گه‌لى کوردستان و بزووتنه‌وه‌ سیاسییه‌که‌ى و حکوومه‌تى هه‌رێمى کوردستان، هه‌روه‌ها ڕۆڵى پێشمه‌رگه‌ له‌ به‌ره‌نگاربوونه‌وه‌ى تیرۆر و ڕێگرتن له‌ توندڕه‌وى و تیرۆر، زیاتر له‌ هه‌موو کاتێک، له‌ کاتى به‌ره‌نگاربوونه‌وه‌ى داعشدا بۆ جیهان به‌ ڕوونى و گه‌وره‌یى ده‌رکه‌وت.

ئێمه‌ له‌ کوردستان ئه‌مڕۆ له‌ هه‌موو کاتێک زیاتر شانازى به‌ بنه‌ماکانى فره‌یى و لێبورده‌یى و پێکه‌وه‌ژیانى ئایینى و نه‌ته‌وه‌یى ده‌که‌ین و سوورین له‌سه‌ر زیاتر به‌هێزکردنیان، چونکه‌ ئه‌وه‌ بووه‌ته‌ به‌شێک له‌ کولتوورى گه‌لى کوردستان و له‌ باوک و باپیرانمانه‌وه‌ بۆ ئێمه‌ ماوه‌ته‌وه‌. به‌ شانازییه‌وه‌ هه‌ر ئه‌مه‌ش به‌شێکه‌ له‌ پرۆگرامى په‌روه‌رده‌ و خوێندن له‌ وڵاته‌که‌ماندا.

له‌ کاتێکدا داعش گه‌وره‌ترین و دڕنده‌ترین جینۆسایدى به‌رامبه‌ر خوشک و برا ئێزدییه‌کانمان ئه‌نجام دا و حکوومه‌تى عێراق له‌و کاته‌دا بودجه‌ى هه‌رێمى کوردستان و مووچه‌ى فه‌رمانبه‌رانى هه‌رێمى کوردستانى بڕیبوو، جێگه‌ى شانازییه‌ خه‌ڵکى هه‌رێمى کوردستان به‌وپه‌ڕى به‌رپرسیارێتیى مرۆڤانه‌وه‌، پێشوازى له‌ زیاتر له‌ دوو ملیۆن ئاواره‌ و په‌نابه‌ر کرد به‌بێ ئه‌وه‌ى به‌ درێژاییى مانه‌وه‌یان له‌ هه‌رێمى کوردستان هیچ ڕووداوێکى توندوتیژى به‌رامبه‌ر ئه‌و ئاواره‌ و په‌نابه‌رانه‌ تۆمار بکرێت.

داعش به‌شێکى زۆرى عێراق و سووریا و ناوچه‌ى دیکه‌ى وێران کرد، مه‌ترسییه‌کى زۆرى بۆ سه‌ر بنه‌ماکانى ئازادیى ژیان و ئاسایشى جیهان دروست کرد. ڕاسته‌ ئێستا هه‌بوون و مه‌ترسیى داعش که‌م بووه‌ته‌وه‌، به‌ڵام ده‌بێ ئه‌وه‌ بزانین که‌ له‌ناو نه‌چووه‌، له‌به‌ر ئه‌وه‌ش ده‌بێ هاوپه‌یمانیى دژى داعش و کۆمه‌ڵگه‌ى نێوده‌وڵه‌تى ئێستاش حیسابێکى سه‌ربازى و ئه‌منیى جددى بۆ ئه‌و مه‌ترسییه‌ بکه‌ن، هه‌روه‌ها ده‌بێ له‌ڕووى هزرییشه‌وه‌، به‌ به‌رنامه‌ و ستراتیژێکى ڕوونه‌وه‌، ڕووبه‌ڕووى تیرۆر و بیرى تیرۆر ببینه‌وه‌.

به‌رده‌وامبوونى جموجوڵ و هێرشه‌کانى داعش له‌ ناوچه‌ ناکۆکى له‌سه‌ره‌کان و چه‌ند پارێزگایه‌کى دیکه‌ى عێراق بۆ هه‌موو لایه‌کمان ئاشکرایه‌ و مایه‌ى مه‌ترسییه‌کى جددیه‌ بۆ ئاسایشى عێراق به‌گشتی. ئه‌گه‌ر به‌ جددى ڕێگه‌ى لێنه‌گیرێت، مه‌ترسیى زیاتر و فراوانتربوونى هه‌یه‌.

پێشمه‌رگه‌ قاره‌مانه‌کانى کوردستان به‌ 1726 شه‌هید و 42 بێسه‌روشوێن و 10 هه‌زار و 720 بریندار، به‌ ئیراده‌یه‌کى گه‌وره‌ و به‌ چه‌ک و توانایه‌کى یه‌کجار زۆر که‌م، هێزێکى هه‌ره‌ سه‌ره‌کیى به‌ره‌نگاربوونه‌وه‌ى تیرۆر بوو. هه‌ر له‌م بۆنه‌یه‌دا یادى ئه‌و شه‌هیدانه‌ به‌رز ڕاده‌گرین و له‌ به‌رامبه‌ر ڕۆحى گه‌وره‌ى ئه‌و شه‌هیدانه‌ سه‌رى ڕێز و نه‌وازش داده‌نه‌وێنین. ئێستاش پێویسته‌ ستراتیژێکى تازه‌ى هاوبه‌ش بۆ به‌ره‌نگاربوونه‌وه‌ی، له‌لایه‌ن هاوپه‌یمانیى دژى داعشه‌وه‌ به‌ به‌شداریى پێشمه‌رگه‌ و هێزه‌کانى ترى عێراقى دابنرێت.

له‌ هه‌مان کاتدا ده‌بێ دابینکردنى مافى هه‌موو گه‌لان و پێکهاته‌کان به‌ شێوه‌یه‌کى یه‌کسان و بڵاوکردنه‌وه‌ى بنه‌ماکانى پێکه‌وه‌ژیانى ئاشتیانه‌ و به‌ره‌نگاربوونه‌وه‌ى توندڕه‌وه‌ى به‌ شێوه‌یه‌کى سیستماتیک و په‌روه‌رده‌یى و یاسایی، بکرێنه‌ بنه‌ماى ستراتیژێکى درێژمه‌وداى به‌ره‌نگاربوونه‌وه‌ى تیرۆر له‌ هه‌موو عێراق و ناوچه‌که‌دا، ئه‌مه‌ش بۆ ئه‌وه‌ى ئاسایش و دیموکراسیى جیهان پارێزراو بن.

به‌ڕێزان،
پێشمه‌رگه‌ى کوردستان که‌ بۆ یه‌که‌مجار هێرشه‌کانى تیرۆرى له‌سه‌ر زه‌وى وه‌ستاند و له‌ شنگال و مه‌خموور و له‌ که‌رکووک و گه‌رمیان به‌ هاوکاریى هاوپه‌یمانیى نێوده‌وڵه‌تى داعشى تێکشکاند، ئێستاش ئاماده‌یه‌ هه‌موو هاوکارییه‌کى هێزه‌کانى عێراق و هاوپه‌یمانانیى نێوده‌وڵه‌تى بکات له‌پێناو نه‌هێشتنى هه‌بوون و مه‌ترسیى تیرۆرستان له‌ عێراقدا به‌ته‌واوی. زه‌مینه‌ى ئه‌و هاوکارییه‌ش ئێستا له‌ هه‌موو کات باشتره‌، به‌تایبه‌تى که‌ ئێستا که‌شێکى باشى ئه‌رێنى له‌نێوان حکوومه‌تى هه‌رێمى کوردستان و حکوومه‌تى فیدرالیى عێراقدا هه‌یه‌.

هه‌روه‌ها ده‌مه‌وێ لێره‌دا ڕایبگه‌یه‌نم که‌ ئێستا خۆشبه‌ختانه‌ لێکگه‌یشتنێکى باش له‌گه‌ڵ سه‌رۆک وه‌زیران به‌ڕێز د. عادل عه‌بدولمه‌هدى هه‌یه‌ له‌پێناو چاره‌سه‌رکردنى هه‌موو ئه‌و کێشانه‌ی که‌ له‌ نێوان هه‌رێمى کوردستان و به‌غدا هه‌یه‌.

ئێمه‌ ئه‌و هاوکاریکردنه‌ زۆر به‌ گرنگ ده‌بینین له‌پێناو نه‌هێشتنى هه‌بوون و مه‌ترسیى داعش به‌ته‌واوی، چونکه‌ داعش و هاوشێوه‌کانی، سوود له‌ ناکۆکى و کێشه‌کانى نێوان به‌غدا و هه‌ولێر ده‌بینن، له‌به‌رئه‌وه‌ش به‌هێزکردنى هاوکاریى نێوان هه‌ولێر و به‌غدا و چاره‌سه‌رکردنى هه‌موو کێشه‌کان، له‌و بواره‌شدا له‌لایه‌ن حکوومه‌تى هه‌رێمى کوردستانه‌وه‌ زۆر به‌ گرنگ سه‌یر ده‌کرێت.

به‌ڕێزان،
وێڕاى ئه‌و شه‌ڕه‌ى به‌سه‌ر هه‌رێمى کوردستاندا سه‌پێنرا و سه‌ره‌ڕاى هه‌موو ئه‌و قه‌یران و سه‌ختییانه‌ى بۆ هه‌رێمى کوردستان دروست کران،‌ خه‌ڵکى هه‌رێمى کوردستان توانیان دوو هه‌ڵبژاردن له‌ ساڵى ڕابردوو به‌ سه‌رکه‌وتوویى ئه‌نجام بده‌ن ئه‌وانیش هه‌ڵبژاردنى په‌رله‌مانى عێراق و هه‌ڵبژاردنى هه‌رێمى کوردستان بوون. به‌ ڕاستى ئه‌نجامدانى دوو هه‌ڵبژاردن به‌و ئارامییه‌ له‌و بارودۆخه‌دا جێگه‌ى شانازیى ئێمه‌یه‌، جێگه‌ى شانازیى هاووڵاتیانى هه‌رێمى کوردستانه‌‌.

ئێمه‌ له‌ هه‌رێمى کوردستان هه‌موو کاره‌سات و شانازییه‌کانمان پێکه‌وه‌ بوونه‌. ئه‌مڕۆ که‌ یادى یه‌کى شوبات ده‌که‌ینه‌وه‌، پێش هه‌موو شتێک ده‌بینین که‌ خوێنى به‌رپرس و کادیرانى هه‌ردوو پارتى سه‌ره‌کیى هه‌رێمى کوردستان، پارتى دیموکراتى کوردستان و یه‌کێتیى نیشتمانیى کوردستان پێکه‌وه‌ ڕژاوه‌، له‌به‌ر ئه‌وه‌ش ئه‌مڕۆ و هه‌موو کاتێکیش، ده‌بێت پارتى و یه‌کێتى پێکه‌وه‌ کار بکه‌ن و چاره‌سه‌ر بۆ پرسه‌ جیاجیاکان بدۆزنه‌وه‌. کاتى ئه‌وه‌یه‌ پارتى و یه‌کێتى و حیزبه‌کانى دیکه‌ش له‌ هه‌رێمى کوردستان، پێکه‌وه‌ له‌ پرس و پرۆسه‌ سیاسییه‌کاندا کار بکه‌ن و لێکگه‌یشتنیان زیاد بکه‌ن له‌سه‌ر ئاستى هه‌رێمى کوردستان و عێراق، بۆ ئه‌وه‌ى حکوومه‌ت و ئیداره‌ى داهاتووى هه‌رێمى کوردستان به‌ شێوه‌یه‌کى هاوبه‌ش و به‌بێ کێشه‌ به‌ڕێوه‌ ببه‌ین و هێز بده‌ینه‌ چاره‌سه‌رى هه‌موو ئه‌و کێشانه‌ى که‌ له‌ هه‌رێمى کوردستاندا هه‌بووه‌.

له‌ کۆتاییدا، جارێکى دیکه‌ سڵاو و دروود بۆ گیانى پاکى هه‌موو شه‌هیدانى یه‌کى شوبات ده‌نێرین و سه‌رى ڕێز و نه‌وازش له‌به‌رده‌م گیانى پاکى ئه‌وان و ته‌واوى شه‌هیدانى کوردستاندا، داده‌نه‌وێنین.

یادى ئه‌و ئازیزانه‌ بۆ هه‌میشه‌ له‌ دڵى هه‌موو کوردستانییه‌کدا هه‌ر به‌ زیندوویى ده‌مێنێته‌وه‌. یه‌کى شوبات سیمبۆلێکى دیکه‌ى ئه‌و کاره‌سات و نه‌هامه‌تیانه‌یه‌ که‌ به‌ درێژاییى مێژوو به‌سه‌ر گه‌لى کوردستاندا هاتوون، به‌ڵام هه‌میشه‌ ئیراده‌ى گه‌لى کوردستان بۆ مانه‌وه‌، بۆ ژیان، له‌ هه‌موو هێرش و تیرۆر و دوژمنکارییه‌ک به‌هێزتر بووه‌ و هه‌میشه‌ دواى هه‌ر که‌وتنێک، به‌هێزێکى زۆر گه‌وره‌ته‌ره‌وه‌ هه‌ڵساوه‌ته‌وه‌.

نه‌مرى بۆ شه‌هیدان و سه‌رکه‌وتن و سه‌رفرازى بۆ که‌سوکارى سه‌ربه‌رزیان.
ئێوه‌ش هه‌موو لایه‌کتان دووباره‌ به‌خێر بێن بۆ ئه‌م ڕێوڕه‌سمه‌ و زۆر سوپاس.