جەماوەر نیوز
وەزارەتی پەروەردەی هەرێمی کوردستان بە پاڵپشتی ڕێکخراوی "یونیسێف" لە هەڵمەتەکانی گەڕاندنەوەی منداڵانی دابڕێنراو بۆ بەر خوێندن بەردەوامە، بەهۆیەوە ساڵانە بە هەزاران منداڵی دابڕاو لە خوێندن دەگەڕێنرێنەوە ناو خوێندن. 

 لەپێناو گەشەپێدان و بونیادنانی داهاتوویەکی گەش بۆ منداڵان، حکومەتی هەرێمی کوردستان بە هەماهەنگی لەگەڵ ڕێکخراوی "یونیسێف"، بەردەوام لە هەوڵی ئەوەدان ئەو منداڵانەی کە بە هەر هۆکارێک بێت لە خوێندن دابڕاون، جارێکی دیکە بگەڕێنرێنەوە ناو ناوەندەکانی خوێندن، دەرەنجامی ئەم هەڵمەتەش لەماوەی ساڵێکدا نزیکەی نۆ هەزار منداڵ گەڕێنراونەتەوە بەر خوێندن.

سامان سیوەیلی وتەبێژی وەزارەتی پەروەردەی حکومەتی هەرێمی کوردستان لە لێدوانێکی تایبەتدا ڕایگەیاند، لە سەرجەم بەڕێوەبەرایەتییە گشتییەکانی پەروەردەی پارێزگا و ئیدارەی سەربەخۆ و قەزاکان، تەنیا لە ساڵی 2025 توانراوە هەشت هەزار و 836 منداڵ بگەڕێنرێنەوە بۆ ناو ناوەندەکانی خوێندن، بەمەش لەماوەی شەش ساڵی تەمەنی کابینەی نۆیەمی حکومەتی هەرێمی کوردستان، کۆی گشتیی ئەو منداڵانەی گەڕێنراونەتەوە خوێندن گەیشتووەتە 42 هەزار و 107 منداڵ.