جەماوەر نیوز
وه‌زیری ناوخۆی حكومه‌تی هه‌رێمی كوردستان، له‌ كۆنفرانسێكی میدیاییدا رایگه‌یاند، قه‌ده‌غه‌ی ته‌واوه‌تی هاتوچۆ تا 12ی ئه‌مشه‌و درێژ ده‌كرێته‌وه‌ و رێنمایی و زانیاری پێویست له‌ باره‌ی دوای 12ی شه‌و به‌ هاووڵاتیان ده‌درێت.
پوخته‌ی وته‌كانی:
* ماوه‌ی 48 كاتژمێری قه‌ده‌غه‌ی ته‌واوه‌تی درێژ ده‌كرێته‌وه‌.
* كات دراوه‌ به‌ یه‌كه‌ ئیدارییه‌كان بۆ ئه‌وه‌ی تا 12ی شه‌و بۆ ئه‌وه‌ی پارێزگار و یه‌كه‌ ئیدارییه‌كان بتوانن رێنماییه‌ په‌سندكراوه‌كانی خۆیان رابگه‌یه‌نن. پێش كاتژمێر 12ی شه‌و هه‌موو ورده‌كارییه‌كان ده‌خرێنه‌ڕوو بۆ هاووڵاتیان.
* سووپاسی هاووڵاتیانی كوردستان ده‌كه‌ین، ئێمه‌ سه‌ربه‌رزین به‌ پابه‌ندبوونی ئێوه‌ به‌ بڕیار و رێنماییه‌كان. سوپاس بۆ تیمه‌كانی ئۆپراسیۆن و پارێزگاره‌كان و تیمه‌كانی ته‌ندروستی.
* 18 كاتژمێر هاتوچۆ ده‌بێت به‌ رێكخستن و رێكاری رێكخراوی تایبه‌ت به‌ پارێزگاكان.
* به‌ گشتی له‌ 12ی شه‌و تا 6ی ئێواره‌ به‌ گوێره‌ی تایبه‌تمه‌ندی و ئاسانكاری پارێزگاكان رێكده‌خرێت. به‌ڵام له‌ 6ی ئێواره‌ تا 12ی شه‌و هه‌موو جۆره‌ هاتووچۆیه‌ك جگه‌ بۆ ئاڵوگۆڕی بازرگانی و تیمه‌كانی ئه‌منی و ته‌ندروستی قه‌ده‌غه‌یه‌.
* به‌داخه‌وه‌ ژماره‌یه‌كی زۆری تووشبووان له‌ هه‌ولێر راگه‌یه‌ندرا، كه‌ به‌شداربووانی پرسه‌یه‌كی هه‌ولێر بوون.
* دوای چاكبوونه‌وه‌ی ئه‌و كه‌سانه‌ی به‌رپرسن له‌ پرسه‌گێڕانه‌كه‌، ئه‌و كه‌سانه‌ رووبه‌ڕووی دادگا ده‌كرێنه‌وه‌.
* 67 كه‌س له‌و پرسه‌یه‌ به‌شدار بوون و ته‌نانه‌ت یه‌كێكیان گه‌ڕاوه‌ته‌وه‌ سیده‌كان و له‌وێش خه‌ڵكی تووشكردووه‌.
* به‌داخه‌وه‌ هه‌ندێك له‌ هێزه‌كان ئاڵوگۆڕیان پێكراوه‌ و داوا ده‌كه‌م هه‌موو لایه‌ك پابه‌ند بن به‌ راگرتنی ئاڵوگۆڕی هێزه‌كان و ئه‌و كێشه‌یه‌مان له‌گه‌ڵ سوپای عێراق و هێزه‌ ئه‌منییه‌كانی عێراقیش هه‌یه‌، به‌ڵام به‌داخه‌وه‌ ئه‌وانیش هاوكار نه‌بوون و بۆ چه‌ند رۆژێك ئه‌و كه‌سانه‌ له‌ بازگه‌كان راگیراون و تیمه‌ پزیشكییه‌كان سامپڵی تێستیان لێ وه‌رگرتوون و به‌و شێوه‌یه‌ رێگه‌یان پێدراوه‌ بێنه‌ ناو هه‌رێمی كوردستانه‌وه‌.
* ئێمه‌ وه‌كو خه‌ڵكی كوردستان هه‌میشه‌ مه‌ترسیمان له‌سه‌ر بووه‌ و ئه‌و ترسه‌ له‌ ناخمان هه‌یه‌، كه‌ بارودۆخی له‌ناكاو هاته‌پێش پێداویستیمان هه‌بێت و كار بۆ دابینكردنی ده‌كه‌ین، ئێمه‌ خه‌ڵكمان دڵنیا كردووه‌ته‌وه‌، كه‌ كه‌مبوونی خۆراك و ترس له‌و باره‌یه‌وه‌ له‌ ئارادا نییه‌ و پێویست ناكات نرخ گران بكرێت و پێویست ناكات شت له‌ پێداویستی خۆتان زیاتر بكڕن.