له‌ باره‌ی گه‌ڕانه‌وه‌ی پێشمه‌رگه‌ بۆ كه‌ركوك ڕونكردنه‌وه‌ ده‌درێت

22.05.2021

وێنەکان

له‌ باره‌ی گه‌ڕانه‌وه‌ی پێشمه‌رگه‌ بۆ كه‌ركوك ڕونكردنه‌وه‌ ده‌درێت

جەماوەر نیوز

وتەبێژی فەرماندەی ئۆپەراسیۆنە هاوبەشەکانی عێراق ئاشکرای کرد، سبەی لە کەرکووک ژووری هاوبەش لەنێوان پێشمەرگە و سوپای عێراق دروست دەکرێت.
لیوا تەحسین خەفاچی، وتەبێژی فەرماندەی ئۆپەراسیۆنە هاوبەشەکان راگەیاند: "بڕیارە سبەی یه‌ك شه‌ممه‌ ژووری هاوبەش لەنێوان سوپای عێراق و هێزەکانی پێشمەرگە لە کەرکووک دروست بکرێت و کۆبوونەوەکانی دەست پێ بکات، کە ئامانجی سەرەکی بۆ پڕکردنەوەی بۆشایی ئەمنیە لە ناوچەکەدا".
وتیشی: "ئێمە لە دیالە ژووری هەماهەنگیمان دروست کردو و سەرکەوتوو بووین، لە کەرکووکیش سبەی کۆبوونەوە دەکەین، نوێنەری پێشمەرگەش لە ژوورەکە ئامادە دەبێت".
لیوا تەحسین، ئاماژەی بەوەشکرد: "کاری ژوورەکە لەسەرەتادا ئاڵوگۆڕی زانیارییە و قسەکردنە لەسەر زانیاری هەواڵگری لەبارەی چەکدارانی داعشەوە، کە ئامانجی هەمووانە پێکەوە رووبەڕوویان ببینەوە".

له‌لایه‌كی كه‌وه‌ لیوا قارەمان کەمال جێگری سوپا سالاری پێشمەرگە دەنگۆی گەڕانەوەی پێشمەرگەی بۆ شاری کەرکوک رەتکردەوە و دەربارەی جموجوڵەکانی ئەم دواییەش وتی، "ئەوەی هەیە لە پێشووتر بریار درابوو شەش ژووری ئۆپراسیۆن درووست بکرێت کە دوانیان لە بەغداد و هەولێربن، هەر ئەوکات درووستکرا بەس چوارەکەی دیکەیان لە خانەقین و کەرکوک و موسڵ و مخمور درووست نەکرا بوون".
وتیشی، "ئەم هەفتەیە دەست بەکار دەبن و لەو چوارچێوەیەشدا ژمارەیەک لە ئەفسەرەکانی پێشمەرگە دەچنە کەرکوک و مەخمور و موسڵ و لە دیالەش ڕۆشتوون".
سەبارەت بە هۆکار بەدروستکردنی ئەم ژورەهاوبەشانەش وتی، "مەبەست لێی پڕکردنەوەی ئەو بۆشاییە ئەمنیەیە کە هەیە و داعش چالاکی ئەنجامدەدات".