چین ژماره‌یه‌ك قوتابخانه‌ له‌ عێراق دروستده‌كات

25.05.2022
جەماوەر نیوز
لە چوارچێوەی رێککەوتنی عێراق و چین، دوو کۆمپانیای چینی دەستیان بە دروستکردنی هەزار قوتابخانەی نموونەیی کردووە و ئەندامێکی لیژنەی پەروەردە لە ئه‌نجومه‌نی نوێنه‌رانی عێراق دەڵێت، 34 قوتابخانە بۆ کەرکووک دروستدەکرێت و داواش دەکەن هەرێمی کوردستانیش بگرێتەوە.  
ئەمڕۆ چوارشەممە 25ی ئایاری 2022 نەجوە کاکەیی، ئەندامی لیژنەی پەروەردە لە ئه‌نجومه‌نی نوێنه‌رانی عێراق و نوێنەری پارێزگای کەرکووک راگەیاند، "ئەمانە قوتابخانەی نمونەیی چینین، لەو هەزار قوتابخانەیەی کە دروستدەکرێت، 34 قوتابخانە بۆ کەرکووک تەرخانکراون، بەپێی پێویستی و چڕی دانیشتووان، بەسەر قەزا و ناوچەکاندا دابەشدەکرێن، بەڵام ئەم ژمارەیە کەمە و داوا دەکەین ژمارەکە زیاتر بکرێت".
سەبارەت بە هەرێمی کوردستان، نەجوە کاکەیی گوتی، "تاوەکو ئێستا دروستکردنی ئەو قوتابخانانە هەرێمی کوردستان ناگرێتەوە، بەڵام ئێمە قسە لەگەڵ وەزیری پەروەردەی عێراق دەکەین و داوا دەکەین دروستکردنی ئەو قوتابخانانە هەرێمی کوردستانیش بگرێتەوە".
حەیدەر مەجید، گوتەبێژی ئەمیندارێتی گشتیی ئەنجوومەنی وەزیرانی عێراق رایگەیاند، لە چوارچێوەی رێککەوتنی عێراق و چین، دوو کۆمپانیای چینی دەستیان بە دروستکردنی هەزار قوتابخانەی نموونەیی کردووە لە عێراق. ئێستا کارەکانی دروستکردنی ئەو قوتابخانانە بە وردی و بە سەرپەرشتی راستەوخۆی ئەمیندارێتی گشتیی ئەنجوومەنی وەزیران بەڕێوەدەچن.
حەیدەر مەجید روونیکردەوە، نزیکەی سێ هەزار پارچە زەوی ئامادەکراوە، بۆ ئەوەی بخرێتە نێو بودجەی ساڵی 2022 و ئامادەکاریش دەکرێت بۆ دروستکردنی چوار هەزار قوتابخانەی دیکە لە پرۆژە یاسای بودجەی ساڵی 2023دا. 


زۆرترین خوێندراو