جەماوەر نیوز
خواردنه‌وه‌یه‌ك له‌ بازاڕه‌كانی سلێمانیدا بڵاوبووه‌ته‌وه‌ هیچ مه‌رجێكی ته‌ندروستی تێدا نییه‌ و هۆشداری ده‌درێته‌ هاوڵاتیان خۆیانی لێ به‌دور بگرن و لایه‌نه‌ په‌یوه‌ندیداره‌كانیش رێكاری پێویستی به‌رامبه‌ر بگرنه‌ به‌ر.
به‌پێی نوسراوێكی به‌ڕێوبه‌رایه‌تی ئاسایشی پارێزگای سلێمانی/هۆبه‌ی زانیاری و به‌دواداچونی فه‌رمانگه‌كان كه‌ ئاراسته‌ی قائیمقامیه‌تی قه‌زای مه‌ڵبه‌ندی سلێمانی كردووه‌ ئاماژه‌ به‌وه‌ كراوه‌ كه‌ جۆرێك ئاوی لیمۆ له‌ بازاڕه‌كانی سلێمانیدا هه‌یه‌ به‌ناوی ئاوی لیمۆی (مه‌حشه‌ر)، دوای ئه‌وه‌ی پشكنینی فیزیای و كیمیایی له‌ تاقیگه‌دا بۆكراوه‌، ده‌ركه‌وتووه‌ نه‌گونجاوه‌ بۆ خواردنه‌وه‌. 
ئه‌و خواردنه‌وه‌یه‌ دروستكراوی وڵاتی ئێرانه‌ و هه‌رچه‌نده‌ به‌پی ئه‌و به‌رواره‌ی له‌سه‌رێتی به‌سه‌رچوو نییه‌" به‌ڵام به‌هۆی خراپی پێكهاته‌كه‌یه‌وه‌، ده‌ستبه‌جێ و دوای ئه‌و نوسراوی ئاسایشی سلێمانی، قائیمقامی سلێمانی لیژنه‌ هاوبه‌شه‌كانی راسپارد بۆ كاری پێویست و به‌په‌له‌ و بڕیاردرا له‌هه‌ر بازاڕ و شوێنێكدا ئه‌و جۆره‌ خواردنه‌وه‌یه‌ كه‌ به‌ناوی ئاوی لیمۆوه‌ ده‌فرۆشرێت بینرا ده‌ستی به‌سه‌ردا بگیرێت و ده‌ستبه‌جێ له‌ناوببرێت.
هه‌ربۆیه‌ لیژنه‌ هاوبه‌شه‌كانی قائیمقامیه‌تی سلێمانی هه‌ڵمه‌ته‌كانی بۆ ده‌ستبه‌سه‌راگرتنی ئه‌و جۆره‌ خواردنه‌وه‌یه‌ فراوان كردووه‌ و داواش له‌ هاوڵاتیان كرا له‌هه‌ر شوێنێك به‌رچاویان كه‌وت لیژنه‌كانی لێ ئاگاداربكه‌نه‌وه‌