پرۆژەی ئاوی ئاکرێ لەکۆتایی 2026 تەواو دەبێت

14.08.2025
جەماوەر نیوز
بەڕێوەبەری گشتی ئاو و ئاوەڕۆکی هەرێمی کوردستان ڕایدەگەیەنێت: ئەگەر هیچ گرفتێکی دارایی بۆ دروست نەبێت، پرۆژەی ستراتیژی ئاوی ئاکرێ، کۆتایی ساڵی 2026 تەواو دەبێت و کێشەی کەمئاوی ناوچەکە چارەسەر دەکات.
پێنجشەممە 14ـی ئابی 2025، ئەندازیار ئاری ئەحمەد قادر، بەڕێوەبەری گشتی ئاو و ئاوەڕۆی هەرێمی کوردستان ڕایگەیاند: لەچوارچێوەی ستراتیژییەتی کابینەی نۆیەمی حکوومەتی هەرێمی کوردستان بۆ کەمکردنەوەی کاریگەرییەکانی گۆڕانی کەشوهەوا و پاراستنی ئاوی ژێر زەوی، چەند پرۆژەیەکی ستراتیژی ئاو لە هەرێمی کوردستان دروستکراون و چەندی دیکەش لە ناوچە جیاوازەکان دروست دەکرێن، لەوانەش، پرۆژەی ستراتیژی ئاوی ئاکرێ کە کێشەی کەمئاوی ناوچەکە چارەسەر دەکات.
بەڕێوەبەری گشتی ئاو و ئاوەڕۆ ئاشکرای دەکات، 109 ملیار و دوو ملیۆن دینار لە بودجەی وەبەرهێنانی وەزارەتی شارەوانی بۆ پرۆژەی ئاوی ئاکرێ، لەلایەن حکوومەتی هەرێمی کوردستانەوە دابینکراوە، سەرباری ئەو کێشە ئابوورییانەی حکوومەتی فیدراڵ ڕووبەڕووی هەرێمی کوردستانی دەکاتەوە، ڕاشیدەگەیەنێت: پرۆژەی ئاوی ئاکرێ توانای پاڵاوتنی سێ هەزار مەترس سێجا ئاوی لە کاتژمێرێکدا هەیە و سەرچاوەکەشی ئاوی قەندیلە، بە تەوابوونی 200 هەزار هاووڵاتی سنووری 18 گوندی ناحیەی بجیل لێی سوودمەند دەبن.
بەڕێوەبەری گشتی ئاو و ئاوەڕۆ ڕایدەگەیەنێت، ئەگەر هیچ کێشەیەکی دارایی دروست نەبێت، کۆتایی ساڵی 2026 پرۆژەی ئاوی ئاکرێ تەواو دەبێت و دەکەوێتە خزمەتی هاووڵاتییان.

بابەتی هاوشێوە

زۆرترین خوێندراو

  • ڕۆژ
  • هەفتە
  • مانگ