جەماوەر نیوز
وەزارەتی كشتوكاڵ و سەرچاوەكانی ئاوی حكومەتی هەرێمی كوردستان، بڕیاریدا بودجە بۆ پرۆژەی بەنداوی چەقچەق لە سلێمانی زیاد بكات.

بەگوێرەی راگەیەندراوێكی وەزارەتی كشتوكاڵ ‌و سەرچاوەكانی ئاو، بێگەرد تاڵەبانی، وەزیری كشتوكاڵ ‌و سەرچاوەكانی ئاو، لەگەڵ بەڕێوەبەری كۆمپانیای جێبەجێكاری بەنداوی چەقچەق، تاوتوێی هەنگاوەكانی دەستبەكاربوونەوەیان لە پرۆژەكە كردووە، بەتایبەت دوای ئەوەی رەزامەندی فراوانكردنی بەنداوەكە و زیادكردنی بودجەكەی دراوە.

ئاماژە بەوەشكراوە، سەرەڕای خستنەڕووی بایەخ ‌و گرنگی بەنداوەكە بەتایبەت لە بارودۆخی كەمبوونەوەی ئاو و گۆڕانكارییەكانی كەشوهەوا، دەبێتە هۆی كۆگاكردنی ئاو و بوژانەوەی ئاوی سەرچنار ‌و پڕۆژەی گەشتیاری ‌و ئاوەدانی بەدرێژی زیاتر لە 15 كیلۆمەتر.

بێگەرد تاڵەبانی، پشتیوانی وەزارەتی كشتوكاڵی دەربڕی بۆ چارەسەركردنی كێشەكان ‌و دابینكردنی مافە داراییەكانی لایەنی جێبەجێكار بۆ ئەوەی لە كاتێكی گونجاودا پڕۆژەی بەنداوی چەقچەق تەواوبكرێت ‌و بخرێتە خزمەتی هاووڵاتیانەوە.

لە هەرێمی كوردستان، 23 بەنداو هەن كە بۆ مەبەستی بەرهەمهێنانی كارەبا، ئاودێری، گەشتیاری و چەندین بواری دیكە سوودیان لێ وەردەگیرێت.