لە بەرواری ٢٠٢٥/٨/١٣ ئاگرێك زنجیرە چیاکانی سەگرمەو دەربەندی سەرکۆی گرتەوە بووە هۆی سووتانی نزیکەی ( ٨٠٠ ) هەشت سەد دۆنم پوش و پاوان و دارستانی سروشتی و ڕەز و باخی هاووڵاتیان

بەڕێوەبەرایەتی پۆلیسی دارستان و ژینگەی سلێمانی  لە بڵاوکراوەیەکدا ڕایگەیاند، دەستبەجێ مەفرەزەکانمان لە بەشی قەرەداغ و بنکەی سێوسێنان و خاڵی وەزیارە بە سەرپەرشتی بەڕێوەبەری بەشی پۆلیسی دارستانی قەرەداغ گەیشتنە شوێنی دیاریکراو ، دوای کوژاندنەوەی ئاگرەکە بەڵام بەهۆی سەختی شوێنەکەو بڵاوبونەوەی پاشماوەی ئاگرەکە چەندین جار سەری هەڵدایەوەو دواتر ئاگرەکە پەلی هاویشت بەرەو سنوری شاخی گۆشان و
شاخە دابڕاو پاشان بەرەو سنوری گوندی جافەران

ئاماژەی بەوەشکرد، سەرئەنجام دوای زیاتر لە ( ٥٠ ) کاتژمێر توانرا ئاگرەکە کۆنترۆڵ بکرێت .

جەختیشیکردەوە، ئەوەی شایەنی باسە هەریەکە لە بەشی پۆلیسی دارستانی سلێمانی و شارەزوور و دەربەندیخان و بنکەی سەنگاو هەروەها بەرگری شارستانی قەرەداغ و تیمی فڕۆکەوانی سلێمانی و هاووڵاتیانی سنورەکە بەشدار بوون لە کوژاندنەوە کۆنترۆڵکردنی ئاگرەکە .
پەڕاوی لێکۆڵینەوە ڕێکخراوە و بەدواداچوون لەهۆکاری کەوتنەوەی ئاگرەکە بەردەوامە .