جەماوەر نیوز
دوای ئەوەی شاندی پارتی و یەکێتی رایانگەیاند، سەرەتای مانگی داهاتوو کۆبوونەوەکانی پەرلەمانی کوردستان دەستپێدەکەنەوە، بەڕێوەبەری راگەیاندنی پەرلەمان دەڵێت: "ئامادەکاری کراوە و پەرلەمان ئامادەیە بۆ کۆبوونەوە".

دوای کۆبوونەوەی 14ـی ئەم مانگەی شاندی دانوستاندکاری یەکێتیی نیشتمانیی کوردستان و پارتی دیموکراتی کوردستان لە هەولێر، لە راگەیێندراوێکدا رایانگەیاند، هاوڕا بوون لەسەر ئەوەی، کە "پێویستە هەوڵی چڕ و جدی بدرێت بۆ ئەوەی ئەیلوولی داهاتوو، خولی شەشەمی پەرلەمانی کوردستان دەست بە کار و چالاکیی ئاسایی و یاسایی خۆی بکات".

سامان ئەحمەد، بەڕێوەبەری راگەیاندنی پەرلەمانی کوردستان، ئەمڕۆ یەکشەممە لە لێدوانێکدا ڕایگەیاند: "ستافی پەرلەمان هەموو ئامادەکارییەکی کردووە و ئامادەیە بۆ کۆبوونەوە لە سەرەتای مانگی داهاتوو".

سامان ئەحمەد وتی: "تەواوی دیوانی پەرلەمان ئامادەیە بۆ کۆبوونەوە، بەڵام ئەوەی گرنگە هاوهەڵوێستی لایەنەکانە بۆ ئەو کۆبوونەوەیەی باسی لێوەکراوە بۆ سەرەتای مانگی داهاتوو".