جەماوەر نیوز
وەزارەتی رۆشنبیریی هەرێمی کوردستان دەڵێت، کتێبخانە و ئەرشیڤ و دەستنووسەکانی مامۆستا عەزیز گەردی لەو میراتگرە کڕییەوە کە بە بڕیاری دادگە بەو درابوو. 

وەزارەتەکە دەڵێت، لەسەر راسپاردەی مەسرور بارزانی، سەرۆکوەزیرانی هەرێمی کوردستان، "سەرجەم دەستنووس، کتێبخانە و ئەرشیڤی مامۆستا عەزیز گەردییان کڕییەوە و بڕیارە لە داهاتوویەکی نزیکدا، بخرێتە خزمەتی سوودی گشتیی و دەستنووسەکانی چاپ و بڵاوبکرێنەوە".

دوێنێ بە بڕیاری دادگە کتێبخانەکە درا بە یەکێک لە میراتگرەکانی مامۆستا عەزیز گەردی. وەزارەتی رۆشنبیری دەڵێت، دواتر وەزارەتەکە سەرجەم کتێبخانە و ئەرشیڤ و دەستنووسەکانی لەو میراتگرە کڕییەوە.

وەەزارەتی رۆشنبیری ئاماژەی بەوە کردووە، کتێبخانە و ئەرشیڤی مامۆستا عەزیز گەردی، بە گەنجینەیەکی دەوڵەمەندی سەرچاوە و ناونیشانی دەگمەن و مێژوویی هەژمار دەکرێت، بەهایەکی گرنگی هەیە بۆ کایەی رۆشنبیری و مێژووی بزاوتی چاپ و بڵاوکردنەوەی کتێبی کوردی.

بەگوێرەی وەزارەتی رۆشنبیریی هەرێمی کوردستان، بڕیارە لە داهاتوویەکی نزیکدا، ئەو ئەرشیڤ و کتێبخانە دەوڵەمەندە، کە زیاتر لە 18 هەزار سەرچاوە و ناونیشانی جیا لەخۆدەگرێت، بخرێتە خزمەتی بەرژەوەندی گشتیی، کتێبخانەیەکی تایبەتیان بە ناوی "کتێبخانەی د. عەزیز گەردی" بۆ بکرێتەوە، هەروەها دەستنووسەکانیش چاپ و بڵاوبکرێنەوە.