بەڕێوەبەرایەتیی هاتوچۆی سلێمانی رایگەیاند، کامێراکانی تۆمارکردنی سەرپێچیی تیژڕەوی لەسەر رێگاکانی سلێمانی - تاسڵوجە و سلێمانی - وارماوا کارا دەکرێن و دەست بە تۆمارکردنی سزا دەکەن، هاوکات میکانیزمی کارکردنی کامێراکان و رێژەی لێبووردنیشی ئاشکرا کرد.

ئەمڕۆ سێشەممە 26ـی ئاب، بەڕێوەبەرایەتیی هاتوچۆی سلێمانی لە راگەیێندراوێکدا ڕایگەیاند: رۆژی پێنجشەممە 28ی ئابی 2025، کاتژمێر 10:00ـی بەیانی، کامێراکانی رێگەی نێوان سلێمانی - تاسڵوجە (هاتن و چوون) دەکەونە کار. ئەم کامێرایانە بە سیستمی "One Point"  یەک خاڵ کاردەکەن و سەرپێچیی تیژڕەوی بەپێی ئەو خێراییانەی لە هێماکانی هاتوچۆی تەنیشت رێگاکە دیاریکراون تۆمار دەکەن.

هەر لە راگەیێندراوەکەدا هاتووە، سەبارەت بە رێگەی نێوان سلێمانی - وارماوا، کامێراکان لە هەمان رێکەوت و کاتژمێردا کارا دەکرێن، بەڵام بە سیستمی "Point to Point" خاڵ بۆ خاڵ سزای سەرپێچیی خێرایی تۆمار دەکەن.

هاتوچۆی سلێمانی میکانیزمی کارکردنی سیستمی "Point to Point"ـی روونکردووەتەوە و دەڵێت: "تێکڕای خێرایی لە نێوان دوو کامێرادا هەژمار دەکرێت. پێویستە شۆفێر بە خێرایی رێگەپێدراو شۆفێری بکات، بە پێچەوانەوە سزا دەدرێت. ئەگەر شۆفێر لە نێوان کامێراکانی دیکەشدا لەسەر تیژڕەوی بەردەوام بێت، هەمان سزا دووبارە دەیگرێتەوە".

سەبارەت بە رادەی لێبووردن لە خێرایی (حدود التسامح)، بۆ ئۆتۆمبێلی بچووک 5 کیلۆمەتر لە کاتژمێرێکدا و بۆ بارهەڵگر 3 کیلۆمەتر لە کاتژمێرێکدا دەبێت.
هاتوچۆی سلێمانی جەختی لەوەش کردووەتەوە کە میکانیزمی تۆمارکردنی سەرپێچییەکان بەپێی فەرمانی وەزارەتی ناوخۆ رێکخراوە و سەرجەم بەڕێوەبەرایەتییەکانی هاتوچۆی هەرێمی کوردستان بە یەک سیستەم کاردەکەن.