جەماوەر نیوز
وتەبێژی هاتوچۆی هەولێر ڕایگەیاند، شۆفێرانی ژێر كاریگەری خواردنەوە كحولییەكان یان ماددە هۆشبەرەكان تووشی سزای قورس دەبنەوە.
عەقید هێمن ئەمین وتەبێژی هاتوچۆی هەولێر لە لیدوانێكدا ڕایگەیاند، بەگوێرەی یاسای هاتوچۆ، شۆفێرانی ژێر كاریگەری خواردنەوە كحولییەكان یان ماددە هۆشبەرەكان تووشی سزای قورس دەبنەوە. ئاماژەی بەوەشدا، سزاكە بریتییە لە زیندانیكردن بۆ ماوەیەك كە لە سێ مانگ كەمتر نەبێت و لە ساڵێك زیاتر نەبێت، یان پێبژاردنێك كە لە 300 هەزار دینار كەمتر نەبێت و لە 500 هەزار دینار زیاتر نەبێت، یان هەردوو سزاكە پێكەوە، هەروەها، ئۆتۆمبێلەكە بۆ ماوەی ساڵێك دەستی بەسەردا دەگیرێت و مۆڵەتی لێخوڕینیش بۆ ماوەیەك لە دوو مانگ كەمتر نەبێت و لە ساڵێك زیاتر نەبێت، لێ وەردەگیرێتەوە.
وتەبێژی هاتوچۆ باسی لەوەشكرد، لە حاڵەتی دووبارەبوونەوەی ئەم پێشێلكارییە لە ماوەی سێ ساڵدا، سزاكە توندتر دەبێت، سزاكە بریتی دەبێت لە زیندانیكردن بۆ ماوەیەك كە لە سێ مانگ كەمتر نەبێت و لە ساڵێك زیاتر نەبێت، یان غەرامەیەك كە لە 500 هەزار دینار كەمتر نەبێت و لە یەك ملیۆن دینار زیاتر نەبێت، یان هەردوو سزاكە پێكەوە، جگە لەوانەش، مۆڵەتی لێخوڕینەكە بۆ ماوەیەك كە لە شەش مانگ كەمتر نەبێت و لە ساڵێك زیاتر نەبێت، هەڵدەگیرێتەوە.