جەماوەر نیوز
وتەبێژی یەكێتی خانەنشینانی كوردستان دەڵێت، لەگەڵ دەستكردن بە دابەشكردنی مووچەی مانگی شەش، لە سنوری پارێزگای سلێمانی زیاد لە دوو هەزار و 300 خانەنشین شەش مووچە پێكەوە وەردەگرن.
سادق شێخ عوسمان وتەبێژی یەكێتی خانەنشینانی كوردستان ڕایگەیاند: لەگەڵ دابەشكردنی مووچەی مانگی شەش كە وابڕیارە لەم هەفتەیەدا دابەشبكرێت لە سنوری سلێمانی زیاد لە دوو هەزار و 300 خانەنشین شەش مووچە پێكەوە وەردەگرن و لەهەرێمی كوردستانیش ژمارەكە دەگاتە نزیكەی15 هەزار خانەنشین كە شەش مووچە پیكەوە وەرگرن.
ئاماژەی بەوەشكرد، بۆ مووچەی مانگی حەوت، لە سلێمانی هەزار و 300 كەسی دیكە ناویان خراوەتە لیستی مووچەوە، هاوكات پێدەچێت لە مانگی هەشت ئەوەی دەمێنێتەوە لەو فەرمانبەرانەی ئەمساڵ خانەنشینكران ناویان بخرێتە لیستی مووچەی مانگی هەشت و كۆتایی بە پێدانی پارەی خانەنشینانی ئەمساڵ بهێندرێت.
ئاشكراشیكرد، بەگوێرەی ئەو داتایانەی لە بەردەستیاندایە لە سنوری پارێزگای سلێمانی لەگەڵ دابەشكردنی مووچەی مانگی پێنج بە گشتی لەهەرێمی كوردستانی نزیكەی پێنج هەزار خانەنشین پێنج مووچەیان پێكەوە وەرگرت.