جەماوەر نیوز
بەئامادەبوونی بەڕێز محەمەد حاجی مەحمود، مەراسیمی ساڵیادی کۆچیدوایی سەید عەبدولعەزیز حەکیم بەڕێوەچوو
ئەمڕۆ ۲۳ـی شوباتی ۲٠۲٦ لە هۆڵی هۆتێل ڕامادەی شاری سلێمانی، بەئامادەبوونی بەڕێز محەمەد حاجی مەحمود و شاندێکی حزبی سۆسیال دیموکراتی کوردستان و پارێزگاری سلێمانی و سەید مەهدی حەکیم و نوێنەری بەشێک لە هێز و لایەنە سیاسییەکان و دامودەزگاکانی حکومەت و ژمارەیەک کەسایەتی ئاینیی و کۆمەڵایەتی، مەراسیمی ۱۷هەمین ساڵیادی کۆچیدوایی سەید عەبدولعەزیز حەکیم بەڕێوەچوو، کە لەلایەن نووسینگەی ڕەوتی حیکمە لە هەرێمی کوردستان سازکرابوو.
سەرەتای مەراسیمەکە بە خوێندنەوەی چەند ئایەتێک لە قورئانی پیرۆز و مارشی نیشتمانی عێراق و کوردستان دەستیپێکرد. دواتر وتاری بنەماڵە لەلایەن سەید مەهدی حەکیم پێشکەشکرا، تەئکیدی لە هەڵوێستی بنەماڵەکەیان کردەوە بەرامبەر گەلی کورد و بزوتنەوە ئازادیخوازەکەی.
لە بەشێکی تری مەراسیمەکەدا، بەڕێز محەمەد حاجی مەحمود وتارێکی پێشکەشکرد و تێیدا ڕۆڵی بنەماڵەی بەڕێزی حەکیمی بەرزنرخاند لە ڕووبەڕووبوونەوەی سیاسەتی ڕەگەزپەرستانە و دیکتاتۆریەت لە عێراقدا لەو پێناوەشدا ژمارەیەک شەهیدیان بەخشیوە. سەرۆکی حزبی سۆسیال دیموکراتی کوردستان ڕایگەیاند کاتێک دەسەڵاتدارانی عێراق لە شەستەکانی سەدەی ڕابردوو لە هەوڵی قڕکردن و ڕشتنی خوێنی میللەتەکەماندا بوون، ئایەتوڵا سەید موحسین حەکیم، لەیەکەمین ئەو کەسایەتییانەبوو کە فەتوای حەرامکردنی ڕشتنی خوێنی کوردیدا، هەر ئەم بنەماڵە بەڕێزە گەواهیدەری تێکۆشانی پێشمەرگە و قوربانییەکانی میللەتەکەمانن بۆ هێنانەدی دیموکراسی و چەسپاندنی مافەکانی مرۆڤ، هەربۆیە داوایکرد ڕۆڵی خۆیان بگێڕن و کاریگەرییان هەبێت لەسەر دەسەڵاتدارانی ئێستای عێراق کەچیدیکە یاری بە قوت و ژیانی خەڵکی هەرێمی کوردستان نەکەن و با هەنگاوەکان بە ئاڕاستەی پاراستنی مافە یاسایی و دەستورییەکانی خەڵکی هەرێمی کوردستان بێت.