جەماوەر نیوز
زیاتر لە 800 هاووڵاتی عێراقی کەمپی هۆلیان بەجێهێشت و بەرەو عێراق بەڕێکەوتن، ئەمەش لە کاتێکدایە کە هێزەکانی هاوپەیمانی نێودەوڵەتی ڕێوشوێنی ئەمنی توندیان بۆ ئەو مەبەستە گرتووەتەبەر.
پێنجشەممە، 31ـی تەممووزی 2025، شوکری حەجی، بەرپرسی نووسینگەی دەرچوون لە کەمپی هۆل ڕاگەیاند، "لەسەرەتای ئەمساڵەوە ، ئەمە 11مین کاروانی گەڕاندنەوەی عێراقییەکانی کەمپی هۆلە بۆ وڵاتەکەیان، گوتیشی: کاروانی ئەمجارە پێکهاتووە لە 233 خێزان، کە ژمارەیان 812 کەسە."
ئاماژەی بەوەش کرد، "کارکردن بۆ گەراندنەوەی ئەو خێزانە عێراقیانەی ئارەزوو دەکەن بگەڕێنەوە وڵاتەکەیان بەهەماهەنگی ئیدارەی خۆسەر و حکوومەتی عێراق بەردەوامە."
زرێپۆش و فڕۆکە جەنگییەکانی ئەمەریکا یاوەری ئەو پاسانە دەکەن کە خیزانەکان دەگوازێتەوە، ئەمەش لە چوارچێوەی ڕێوشوێنە ئەمنییە توندەکانی هاوپەیمانان بۆ دڵنیابوون لە گەیشتنی پاسەکان بە سەلامەتی بۆ ناو خاکی عێراق.
ڕۆژی 22ـی حوزەیران، 236 خێزانی عێراقی کە ژمارەیان 935 کەس بوو، کەمپی هۆلیان جێهێشت، کاروانی عێراقییەکان کەمپی ئەلهۆڵیان بەرەو وڵاتەکەیان بەجێهێشت، ژمارەیان 935 کەس بوو (236 خێزان).
لە ناوەڕاستی مانگی نیساندا 241 خێزان کە لە 865 کەس پێکهاتبوون، کەمپی هۆلیان بەرەو عێراق بەجێهێشت.
کەریم نووری، بریکاریی وەزارەتی کۆچ و کۆچبەرانی عێراق بە میدیاکانی ناوخۆی عێراقی گوتووە، "پرۆسەی گەڕاندنەوەی ئاوارەکان لە کەمپی هۆل هێشتا بەردەوامە بۆ یەکخستنیان و گواستنەوەیان بۆ سەر ماڵ و حاڵی خۆیان."
ئاماژەی بەوەش کرد، "زۆرینەی عێراقییەکانمان لە کەمپی هۆڵ گەڕاندۆتەوە بۆ ناوچەکانی خۆیان، ئەمەش نیشانەیەکی ئەرێنییە و سەرکەوتوو بووین بە شیاندنەوەیان بۆ ناو کۆمەڵگە."
کەریم نووری گوتیشی، "15 هەزار عێراقی لە کەمپی هۆڵەوە گەڕێنراونەتەوە بۆ عێراق، 10 هەزاریان گەڕێنراونەتەوە ناوچەکانی خۆیان، پێنج هەزاریشیان لە کەمپی جەدعە ماونەتەوە بۆ ئەوە شیاندنەوەیان بۆ بکرێت و دواتر بگەڕێندرێنەوە بۆ ماڵەکانیان و تێکەڵ بە کۆمەڵگە بکرێنەوە."
بریکاریی وەزارەتی کۆچ و کۆچبەران باسی لەوەش کرد، "نزیکەی 18 هەزار کەس لە کەمپی هۆڵ ماونەتەوە و هەر دەرفەتیک بێتە پێشەوە دوای ئەوەی پشکنینی ئەمنیان بۆ دەکرێت، ئەوانیش دەگەڕێنینەوە."