كۆمپانیای سۆمۆ: تا ئێستا هەرێمی كوردستان نەوتی ڕادەست نەكردووین

13.08.2025
جەماوەر نیوز
کۆمپانیای سۆمۆی عێراقی ڕەتیدەكاتەوە كە تا ئێستا هیچ بڕەنەوتێكیان لە هەرێمی كوردستانەوە ڕادەست كرابێت.
عەلی نزار فایەق بەڕێوەبەری گشتیی كۆمپانیای سۆمۆ كە تایبەتە بە فرۆشتنی نەوتی عێراق لە لێدوانێكیدا ڕایگەیاند، سەرجەم ئەو ڕێكار و ئامادەكارییانەی پێویستن بۆ وەرگرتن و فرۆشتنی نەوتی هەرێمی كوردستان تەواوكراون، بەڵام تاوەكو ئێستا هیچ بڕە نەوتێكیان ڕادەستنەكراوە بۆ فرۆشتن.
لەبارەی هەناردەی نەوت لە ڕێگەی بۆری توركیاوە عەلی نزار باسی لەوەشكرد، خەریكی چاوخشاندنەوەین بەو پێشنیازانەی حكومەتی توركیا بۆ ڕێككەوتنی نوێ ناردوونی، بابەتەكە تەنیا پەیوەندی بە نەوتەوە نییە و چەندین وەزارەتی دیكەش پەیوەستن بەو ڕێككەوتنەوە كە پێویستە ئەوانیش سەرنجی خۆیانی لەسەر بڵێن، بەڵام بەدڵنیاییەوە پێش تەواوبوونی وادەكەی دەگەینە ڕێككەوتن.
سەبارەت بە فرۆشتنی نەوتی كەركووك، بەڕێوەبەری گشتیی سۆمۆ ڕایگەیاند، مانگانە بەشێكی نەوتی كەركووك هەناردەی ئوردن دەكرێ و نەوتی كێڵگەی گەیارەش لە نەینەوا لە ڕێگەی بەندەرەكانی باشوورەوە هاوشێوەی نەوتی بەسرە هەناردە دەكرێت.
عەلی نزار لەسەر داهاتی نەوت باسی لەوە كرد كە داهاتی نەوت ڕاستەوخۆ لەو كۆمپانیا و لایەنانە وەردەگرین كە لێیان دەكڕن و هیچ دواكەوتنێك لە وەرگرتنی داهاتەكەدا نییە.

بابەتی هاوشێوە

زۆرترین خوێندراو

  • ڕۆژ
  • هەفتە
  • مانگ