وه‌زاره‌تی كارو كاروباری كۆمه‌ڵایه‌تی حكومه‌تی هه‌رێم، ئاگاداری هاوڵاتیانی خاوه‌نپێداویستی تایبه‌ت ده‌كاته‌وه‌، ژماره‌یه‌كی نه‌ناسراو به‌فێڵ و به‌ناوی وه‌زاره‌ته‌كه‌یانه‌وه‌ په‌یوه‌ندیان پێوه‌ده‌كات، داوای كارتی مۆبایل ده‌كات به‌ناوی دامه‌زراندن و دابینكردنی موچه‌وه‌.

وەزارەتی كارو كاروباری كۆمەڵایەتی لە بڵاوکراوەیەکدا ڕایگەیاند، ماوەی چەند رۆژێكە ژمارەیەكی نەناسراو بەناوی چاودێری كۆمەڵایەتی و وەزارەتمانەوە پەیوەندی بەخانەوادەی خاوەن پێداویستی تایبەتەكان دەكات بەمەبەستی دابین كردنی مووچەی كەم ئەندامی و مووچەی چاودێری كۆمەڵایەتی و داوای ناردنی كارتی نیشتیمانی و زانیاری و پێدانی ژمارە و ناوی خەڵكی تر كە خاوەن پێداویستی تایبەت یان نەخۆش یان كەسانی بەساڵاچوویان هەبێت

ئاماژەی بەوەشکرد، دواتر بەناوی ئەوانەوە پەیوەندی بەو خانەوادانە دەكات و داوای كارتی مۆبایل و تحویل كردنی دەكات، كە بەداخەوە ژمارەیەك هاوڵاتی زەرەرمەندی ئەم فێڵ كردنە بوونەتەوە.

جەختیشیکردەوە، لێرەوە بە هەموولایەك رادەگەینین كە وەزارەتمان ئاگاداری ئەم بابەتە نیە و ئەمە بەشێكە لە فێڵ كردن و وەزارەتمان لەكاتی پێویست لە رێگا فەرمییەكانەوە خزمەتگوزاری و ئاگاداری یەكانی بڵاو دەكاتەوە، بەرامبەر بەم فێل كردنەی ئەم گروپانەش رێكاری یاسایی دەگرینە بەر.