جەماوەر نیوز
وتەبێژی وەزارەتی پەروەردەی هەرێم دەڵێت، تا ئێستا وادەی دەستپێكردنی وەرزی نوێی خوێندن دیاری نەكراوە و وابڕیارە تا پێش کۆتایی ئەم مانگە کاتەکەی دیاریبکرێت.
سامان سیوەیلی، وتەبێژی وەزارەتی پەروەردەی هەرێم رایگەیاند، تا ئێستا حەوت هەزار و ٥٠٠ مامۆستا لە هەرێمی کوردستان خانەنشین بوون و تا کۆتایی ئەمساڵ ژمارەکە دەگاتە ١١ هەزار مامۆستا.
وتیشی، تا ئێستا وادەی دەستپێکردنی وەرزی نوێی خوێندن دیارینەکراوە، لە کۆتایی مانگی هەشت لە کۆبوونەوەی ئەنجومەنی وەزارەت ساڵنامەی خوێندن پەسند دەکرێت و بڕیاری دەستپێکی دەوام لە قوتابخانەکان دەدرێت و دەستبەکاربوونی مامۆستایان دیاریدەکرێت.
ئاماژەی بەوەشکرد، پەروەردەی شارۆچکەکان میلاکی مامۆستایانیان رێکخستووەتەوە، بەهۆی خانەنشینبوونی مامۆستایان هیچ گرفتێکی کەمی میلاک دروست نابێت، لە ئەگەری دروستبوونی بۆشایشیدا نووسراوی فەرمی ئاراستەی حکومەت دەکەن، بۆ ئەوەی گرفتی کەمی مامۆستایان بۆ چارەسەربکات.