جەماوەر نیوز
بەڕێوەبەری كۆچ و كۆچبەران و وەڵامدانەوەی قەیرانەكانی دیوانی پارێزگای هەڵەبجە بڕی تێچوی كوژاندنەوەی ئاگرەكەی سنوری پارێزگاكەیانی راگەیاند.
فریاد نجم الدین بەڕێوەبەری كۆچ و كۆچبەران و وەڵامدانەوەی قەیرانەكانی دیوانی پارێزگای هەڵەبجە لە پرێس كۆنفرانسێكدا وتی: هەندێك پەیج و میدیا چەند زانیارییەكی نادروستیان بڵاوكردوەتەوە بەپشتبەستن بە لێدوانی چەند بەرپرسێكی ئیداریی كە وێنەیەكی ناڕاستی پیشانداوە، لەماوەی سێ رۆژی كەوتنەوەی ئاگر لەسنوری پارێزگای هەڵەبجە هەر داواكارییەك هەبوبێت جێبەجێكراوە، پارێزگاری هەڵەبجەش سەرپەرشتی كردوە چەندین تیمی پێكهێناوە دەستبەجێ تیمەكانیش بە ئەركی خۆیان هەستاون.
بەڕێوەبەری كۆچ و كۆچبەران و وەڵامدانەوەی قەیرانەكانی هەڵەبجە وتیشی: هاوكارییە لۆجستییەكان  وەك سوتەمەنی بڕی یەك ملیۆن دینار بوەو دەستبەجێ دابینكردوە، هەروەها خۆراك و پێداویستییەكانیش یەك ملیۆن و 500 هەزار دینار تێچوی هەبوە كە كۆی گشتی ئەو پێداویتسییانەی دابینكراون لەماوەی سێ رۆژی كەوتنەوەی ئاگرەكەدا 6 ملیۆن دینار بوە.
فریاد نجم الدین راشیگەیاند، هەر رێكخراو و لایەنێك هەر لێدوانێك بدات كە ئامانجدارو بەمەبەست بێت خۆی بەرپرسیار دەبێت.