وەزارەتی دارایی و ئابووری حکوومەتی هەرێمی کوردستان ڕایدەگەیەنێت: بڕیاری لێخۆشبوون بۆ خاوەن پێداویستیە تایبەتەکان لە پێشینەی هاوسەرگیری دەرچووە.
سێشەممە 26ـی ئابی 2025، وەزارەتی دارایی و ئابووری حکوومەتی هەرێمی کوردستان وێنەی بڕیارێکی خۆی کە لە 20ـی ئابی ئەمساڵ دەرچووە، بڵاوکردەوە، بەپێی بڕیارەکە کە پاڵپشتی کراوە بە بڕیاری ئەنجوومەنی وەزیرانی هەرێمی کوردستان، لە پێشینەی هاوسەرگیریی (ماوە)ـی خاوەن پێداویستی تایبەت خۆش دەبێت.
وەزارەتی دارایی ڕایەگەیاندووە، ئەو لێخۆشبوونە بۆ سوودمەندانی کەمئەندامە، ئەوانەی پێش ساڵی 2013 هاوسەرگیرییان کردووە و پێشینەیان وەرگرتووە، دەشڵێت: ئەم ڕێنماییە لەڕۆژی دەرچوونی بڕیاری ئەنجوومەنی وەزیرانەوە جێبەجێ دەکرێت، هەروەها لە ڕۆژنامەی وەقایعی کوردستان بڵاودەکرێتەوە.