دیاریەک بۆ نەورۆزی ئەمساڵ

22.03.2023

وێنەکان

جەماوەر نیوز

ئاری محه‌مه‌د هه‌رسین

نەورۆزێکی تر هاتەوەو و هێشتا بێ دەوڵەتی، پەرتەوازەیی نێو ماڵەکەمان، بەرزکردنەوەی دروشمی پۆپۆلیستی لەژێر چەتری درۆزنانەی ئۆپۆزسیۆن، دەست بادان و ڕقی بێ بنەما، لەگەڵ هەموو نەورۆزێکا بەردەوامە.
ئەزانم هەندێک کەس کە ئەم قسانە ئەخوێنێتەوە لەوانەیە بڵێن: سیاسەت بە ئایداڵیستی (مثالیات) ناکرێت. ئەم قسەیە ڕاستە. بەڵام سیاسەت لوتبەرزی وبێ موبالاتی و ڕق و کینەو بە درۆو دەلەسە و ساختەچێتیش ناکرێت. دواجار ئایا ئەم قسانەی ئێمە ئەیکەین میسالیاتن؟… یەعنی یەکتر قوبوڵکردن و یەک دەنگ و یەک هەڵوێست بوون لە پێناو بەرژەوەندی گەل و سەرفرازی خاکی پیرۆزی کوردستان میسالیاتە و ئەوە ندە ئیشێکی قورسە؟…
واز لە دابەشکردنی نەوتی سپی، نەبوونی کارەبای ٢٤ سەعاتی، ڕێگەوبانی باش و دواکەوتنی مووچەش بێنە. ئەوەی کە نە تەکنۆلۆژیا و نە پسپۆڕی و نە پارەشی پێویستە، یەکڕیزی نەتەوەییە لە هەرێمی کوردستان. پرسیاری ئەمساڵی نەورۆزیش وەک هەموو نەورۆزەکانی ڕابوردوە: ئەبێت چەند ساڵ بەسەر تەمەنماندا تێبپەڕێت؟… ئەبێت چەند نەوەی کورد دروست ببێت و دیسانەوە ئەم کۆمەڵگە دابەشبوەی هەرێمی کوردستان نەبێتە میللەتێکی یەکگرتوو؟… هەتا کەی ئەم چیرۆکە ڕەزاگرانە خۆی دوبارە و چەند بارە ئەکاتەوە؟…
ساڵی نوێی کوردەواری لە میللەتی کورد پیرۆز بێت، خاکی پیرۆزی کوردستان هەر ئاوەدان بێت.

گۆرانی (زام) کە بەرهەمی دیاری قەرەداخیە، دیاری منە بۆ نەورۆز و پێشکەشە بەو کەسانەی کە دژی داگیرکەرانی کوردستان و دووبەرەکی ناوخۆمانن… پێشکەشە بەو سیاسیانەی کە جورئەتی ئەوەیان هەیە شەیدای سەربەخۆیی بن و نەفرە ت لە دووبەرەکی بکەن.