دەستەى دەروازە سنوورییەکانى عێراق پێشنیازى کردووە بۆ حکومەتى عێراق، ڕەزامەندى پیشان بدات، تاوەکو مەندەلی وەک دەروازەیەکى نێودەوڵەتى بە فەرمیى بناسێنرێت.

دەستەی دەروازە سنوورییەکانى عێراق، لە ڕاگەیێنراوێکدا دەڵێت، بە سەرپەرشتیى عومەر وائیلى، ئەنجوومەنى دەستەى دەروازە سنوورییەکان کۆبووەتەوە و تاوتوێى چەند دۆسییەیەکیان کردووە. ئاماژە بەوەشکراوە، بۆ کۆنترۆڵکردنی کوالیتیی ئەو ماددانەى دێنە عێراق، لە سەرتاسەرى دەروازە سنوورییەکان، تاقیگە بۆ پشکنینی ماددە کیمیایی و بایۆلۆجییەکان دادەنرین.

دەستەکە پێشنیازى بە نێودەوڵەتیکردنى دەروازەى مەندەلى دەکات، کە لەسەر داواکاریى وەزارەتى دەرەوەى عێراق بووە.

دەروازەى مەندەلى دەکەوێتە شارۆچکەى مەندەلی لە پارێزگاى دیالە و سنوورى بە کۆمارى ئیسلامى ئێرانەوە هەیە و دەکەوێتە سنوورى ماددەى 140ـەوە.