جەماوەر نیوز
ئەمڕۆ پێنجشەممە، 31ـی تەممووزی 2025، ئاژانسەکانی ڕووسیا ڕایانگەیاند، ئەسعەد شەیبانی، وەزیری دەرەوەی سووریا، لەگەڵ سێرگی لاڤرۆڤ، هاوتا ڕووسییەکەی لە مۆسکۆ کۆبووەوە. 
هاوکات ئەمە یەکەم سەردانی فەرمی وەزیری دەرەوەی سووریا بوو بۆ ئەو وڵاتە، کە تێیدا گفتوگۆی دوو قۆڵییان کردووە.
ئەمڕۆ پێنجشەممە، ماریا زاخارۆڤا، گوتەبێژی وەزارەتی دەرەوەی ڕووسیا بە ئاژانسی تاس-ی ڕووسیای ڕاگەیاند، سێرگی لاڤرۆڤ، وەزیری دەرەوەی ڕووسیا پێشوازی لە ئەسعەد شەیبانی، هاوتا سوورییەکەی دەکات بۆ گفتوگۆکردن لە مۆسکۆ.
لە بەیاننامەکەی زاخارۆڤادا هاتووە؛ هەردوولا پەیوەندیی دووقۆڵی تاوتوێ دەکەن، جگە لە "پرسە نێودەوڵەتی و ناوچەییەکان".
ڕووسیا یەکێک بووە لەو وڵاتانەی بەردەوام لایەنگری بەشار ئەسەدی دەکرد. هەروەها بە پاڵپشتییە سەربازییەکانی، یارمەتیی ئەسەدی دا بۆ ماوەی ساڵانێک لە دەسەڵاتدا بمێنێتەوە، تاوەکو لە 8ـی کانوونی یەکەمی 2024، هێزەکانی تەحریر شام توانیان دەست بەسەر دیمەشقی پایتەختی سووریادا بگرن و کۆتایی بە دەسەڵاتی 54 ساڵەی ڕژێمی ئەسەد بهێنن. دوای ڕووخانی كه‌وتنی دیمه‌شقیش، بەشار ئەسەد، سەرۆکی پێشووی سووریا، لەگەڵ خێزانەکەی بەرەو ڕووسیا هەڵات.