جەماوەر نیوز
چیرۆکی شێرکۆ کەریم و یانەی هەولێر کۆتایی هات، ئەم یاریزانە 29 ساڵییە ریزەکانی یانەی هەولێری جێهێشت و رووی لە یانەی زاخۆ کرد
ئەنجامی گفتوگۆکانی نێوان شێرکۆ کەریم و یانەی زاخۆ بۆ یانەکەی بادینان ئەرێنی بووە و گەیشتنە رێککەوتن.
ئەمڕۆ چوارشەممە نوێنەری یانەی زاخۆ لە هەولێر دانوستانی لەگەڵ شێرکۆ کەریم کردووە و یاریزانە کەرکووکییەکەی یانەی هەولێر وەکو پێشەکییەک بڕێک لە پارەی گرێبەستەکەی وەرگرتووە.
شێرکۆ کەریم هەواڵەکەی پشتڕاستکردەوە و بۆ کوردستان24 گوتی: "سبەی دەچمە زاخۆ بۆ پەیوەندیکردن بە یانەی زاخۆ" بڕیاریشە هەر سبەی یانەی زاخۆ گەورەترین گرێبەستی ئەم هاوینەی رابگەیەنێت.
جاری یەکەم نییە یانەی زاخۆ هەوڵبدات شێرکۆ بباتە ریزەکانی و لە هاوینی رابردووش بەتەواوەتی نزیک بوو لە گواستنەوەی ئەم یاریزانە 29 ساڵییە.
شێرکۆ بڕیاریشیداوە لە دوو رۆژی داهاتوو لە هەولێر  بەشداریی لە کۆنگرەیەکی رۆژنامەوانی بکات و باسی کۆمەڵێک رووداوی گرنگ تایبەت بە ماوەکانی رابردووی یانەی هەولێر بکات.
شێرکۆ کەریم لە ساڵی 2020 گرێبەستێکی بۆ ماوەی دوو وەرز لەگەڵ یانەی هەولێر واژۆ کرد، پێش ئەوەی بچێتە یانەی کوێتی کوێتی و دووبارە بگەڕێتەوە یانەی هەولێر.