لە کاتێکدا سەرمایەکی زۆر و بەفرێکی چڕ ناوچە شاخاوییەکانی هەرێمی کوردستانی گرتبووەوە، گوندی “بەرچی” لە سنووری قەزای ئامێدی دیمەنێکی ناوازەی بەخۆوە بینی.
لە نێوان بارینی بەفر و سپێتیی سرووشتدا، ئاهەنگی هاوسەرگیری “نێچیر حەجی” و “ڕێژین نهێلی” ئەنجامدرا؛ زەماوەندێک کە تێیدا گەرمی و خۆشی دڵەکان زاڵ بوو بەسەر سەرمای سەختی زستاندا.

ئەوەی ئەم ئاهەنگەی نێچیر و ڕێژینی لە زەماوەندە مۆدێرنەکانی شار جیا کردەوە، زیندووکردنەوەی کولتوورە دێرینەکان بوو. لە ژێر بارینی بەفرێکی چڕدا کە تەواوی ماڵ و ڕێگاکانی گوندەکەی سپیپۆش کردبوو، بووک و زاوا بە ئەسپ گوازرانەوە بۆ نێو ئامێزی خێزانەکانیان. ئەم دیمەنە کە یادەوەریی دەیان ساڵ لەمەوپێشی لای بەتەمەنەکانی گوندەکە ژیاندەوە، بووە جێی سەرنجی ئامادەبووان.

خەڵکی گوندەکە بە جلی کوردی ڕەنگاوڕەنگەوە، نەیانهێشت سەختی ڕێگاکان و کەشە ساردەکە ڕێگرییان لێ بکات. ئەوان بە پێ لە دوای ئەسپەکەی نێچیر و ڕێژینەوە دەڕۆیشتن و بە دەم چڕینی گۆرانی فۆلکلۆری و مەقامە ڕەسەنەکان، دیمەنێکیان خوڵقاند کە تێیدا مرۆڤ و سروشت ئاوێتەی یەکتر ببوون.
هەڵپەڕکێی بەکۆمەڵ لەسەر فەرشە سپییەکەی سروشت، جۆش و خرۆشێکی وای بە ئاهەنگەکە بەخشیبوو، کە ساردی تووندترین کڕێوەی زستانی لە بیر هەمووان بردبووەوە.

ئەم مەراسیمە تەنها ئاهەنگێکی هاوسەرگیری نەبوو، بەڵکو نمایشێکی کولتووری بوو، لە کاتێکدا ئامێدی یەکێکە لەو ناوچانەی بەفری زۆری لێ دەبارێت، بەڵام ئەنجامدانی زەماوەند بەم شێوەیە لەم کاتەدا، وەک پەیامێکی خۆڕاگری و بەردەوامی ژیان لای دانیشتووانی ناوچەکە دەبینرێت.
سپێتیی بەفرەکە نەک هەر سیمایەکی جوانی بە مەراسیمەکە بەخشیبوو، بەڵکو بووە هۆی ئەوەی وێنە و ڤیدیۆکانی ئەم زەماوەندە لە تۆڕە کۆمەڵایەتییەکاندا بە فراوانی بڵاو ببنەوە و وەک “زەماوەندە ئەفسانەییەکەی ئامێدی” ناوزەند بکرێت.