ڕاستییە تاڵەکان ( 6 )
ئاشتی گەرمیانی .. هۆڵەندا

بێ متمانەیی و دوو بەرەیی لە
ئەمڕۆدا
هیچ کات خەڵکی کوردستان وەکو ئەمڕۆ نەکەوتونەتە ئەو بیرو هزرو باوەڕەوە کە دەبێت بە جیا بیر بکاتەوە ! ئایا خەڵك بۆچی باوەڕی بەو تەبایی و یەکڕیزی و یەك ماڵی و یەك دەستەییە نەماوە کە پارتە کوردییەکان بانگەشەی بۆ دەکەن ، ئایا تاکی کوردستان باوەڕی بە نیشتیمان پەروەری و یەکدەنگی و نەتەوەیی ماوە ؟ هۆکارەکان چین کە میللەتی کورد لە ئەمڕۆدا ناتوانێت پشتگیری لە مافەکانی خۆی بکات یان پشتگیری لە حوکمڕانی بکات ! بۆچی دۆخی میللەتی خۆمان گەیشتۆتە ئەو ئاستە !
لە پاش ساڵانی ١٩٩١ بەدواوە هۆکارەکان زۆرن وە حوکمرانی یەك لەدوای یەکی کابینەکان لەسەر ئەساسی خزمەت کردنی خەڵك و بنەمای دادپەروەری دروست نەبوو ، بەڵکو بیرو هزری حزبایەتی و بەقەڵەو کردنی حزبەکان و کەسایەتی شان و شەوکەت و بێ پسپۆڕی لە موعادەلەی کارگێڕی و دەست بردن بۆ کەسانێك کە شایستەی پلەو جێگەو بەڕێوەبردن نین ، لەکاتێكدا کە خزمەتگوزارییەکان نەکرا ..کە کرا بوو بە باج و پارەیەکی زۆر لەسەر شانی خەڵك ، نەبوونی کارەباو باجەکان بەشیوەیەك هاتە کایەوە کە باری ژیانی خەڵك گرانترو زەحمەت تر بێت ، دۆزینەوەی هەلی کار و کارگەو پلانی ستراتیژی و ڕاگرتنی موعادەلەی داهات و سەرف کردن و گونجاندیان لەگەڵ بازاڕدا ، پرۆژەی ئاودێری و بە براند کردن و سوود لە توانا زانستی و ئابووری و علمییەکان ، هۆکاری تر گەلێك زۆرن هەمومان ئەو ڕاستی یە دەزانین ، حەق و ناحەق پێکەوە لەقاڵب دران ، لە تێڕوانینی سیاسیشەوە نەیانتوانی بە کۆدەنگی لایەنە سیاسییەکان لەسەر یەك بەرنامەی درێژ خایەن بۆ داهاتووی ئەو میللەتە کۆك بن وە بتوانن بە گفتوگۆو لێك حاڵی بوون ئەو هەرێمە بگەیەننە کەناری ئارامی .. دوور کەوتنەوەی خەڵك لە دەسەلات و حزب وەکو دوو ژیانی جودا وایە ، حکومەت بۆ خۆی دەژی خەڵکیش بۆ خۆی ، دوور کەوتنەوەی خەڵك بەهۆی ئەو هەموو وەعدو پەیام و کارە ناڕاستانە بوو کەلە ڕابردوودا درا بەو خەڵکەو لەکۆتادا ئەوە نەبوو کە خەڵك چاوەڕوانی دەکرد.
دوور خستنەوەی خەڵکی ڕۆشنبیرو زانستی و لێهاتوویان یان ئەو کەسانەی کە دەیانویست ووڵات و نیشتیمان دروست بکەن ، بەڵام گوێیان لێیان نەگرتن و زانستی خراپ و لا ڕێیان هێناو کردیان بەکارگێڕی ، وەکو باسم کرد هۆکار زۆرن ، هەربۆیە لەئەمڕۆدا خەڵك بێ هیوا بوە ، زویر نییە کە ئاشتی بکەیتەوە ، بەڵکو بێ هیوا بوە لە دەسەلات ، فۆکس کردن لەسەر بەشێکی ژیان و پشتگوێ خستی جومگەکانی تر هۆکارێکی ترە ، بار گرانی خەڵك .. خەڵك سیاسەت و دوور بینی نازانێت ! بەڵکو ژیان گوزەرانی سادەیی دەوێت ! خەڵك وەکو فیلیم تەماشا دەکات نەوەکو پاڵەوانگێڕی بکات .
راستییەکان تاڵن وە قووڵ و پڕ لەئازارو بێ هیوایی و تاریکن ، دەکرێت زۆر شتی ڕۆژانە هەیە بگۆڕن ، بەڵام هۆکارە تایبەتەکان وەکو سەرمایە و ژیان لەنێو دەوڵەمەند بوون ڕێگا بە ژیانی سادەیی خەڵك نادات .

ئەم وتارە گوزارشتە لە رای نوسەر و جەماوەر نیوز لێی بەرپرس نیە