سه‌رۆكی حكومه‌ت : له‌ زانیارییه‌ سه‌ره‌تاییه‌كان ده‌ركه‌وتووه‌ چ لایه‌نێك له‌ پشت هێرشه‌كه‌ی سه‌ر هه‌ولێر بووه‌‌

27.02.2021
جەماوەر نیوز
مه‌سرور بارزانی، سه‌رۆكی حكومه‌تی هه‌رێمی كوردستان رایگه‌یاند گومانی تێدا نییه‌، هێرشه‌ مووشه‌كییه‌كه‌ی سه‌ر بنكه‌ی سه‌ربازی ئه‌مه‌ریكا له‌ فڕۆكخانه‌ی نێوده‌وڵه‌تی هه‌ولێر، په‌لامارێكی تیرۆرستی بوو.
ئه‌م وتانه‌ی مه‌سرور بارزانی له‌میانه‌ی دیمانه‌یه‌كدا له‌گه‌ڵ ته‌له‌ڤزیۆنی فرانس24 هاتوون و وتی: ئه‌و هێرشه‌ی شه‌وی 15ی ئه‌م مانگه‌ كرایه‌ سه‌ر بنكه‌ی ئاسمانی هێزه‌ ئه‌مه‌ریكییه‌كان له‌ فڕۆكه‌خانه‌ی نێوده‌وڵه‌تی هه‌ولێر، كه‌ تێیدا ژماره‌یه‌ك كه‌س شه‌هید و بریندار بوون، گومانی تێدا نییه‌ كه‌ په‌لامارێكی تیرۆریستی بوو و وتیشی: لێكۆڵینه‌وه‌كان له‌باره‌ی ئه‌و هێرشه‌ هه‌نگاوی باشی ناوه‌ و له‌ زانیارییه‌ سه‌ره‌تاییه‌كان ده‌ركه‌وتووه‌، كه‌ چ لایه‌نێك له‌ پشت ئه‌نجامدانی ئه‌و هێرشه‌ بووه‌‌، به‌بێ ئه‌وه‌ی ناسنامه‌كه‌ی ئاشكرا بكات.
سه‌رۆكی حكومه‌تی هه‌رێمی كوردستان ئاماژه‌ی به‌وه‌شدا، رێكخراوی تیرۆریستی داعش هه‌ڕه‌شه‌ی به‌رده‌وامی له‌ ناوچه‌كه‌ دروستكردووه‌ و داعش خه‌ریكی خۆ ڕێكخستنه‌وه‌یه‌.
سه‌رۆكی حكومه‌ت هێمای بۆ ئه‌وه‌ كرد رێكخراوی داعش سوود له‌و بۆشاییه‌ ئه‌منییه‌ وه‌رده‌گرێت، كه‌ له‌ ناوچه‌ كوردستانییه‌كانی ده‌ره‌وه‌ی ئیداره‌ی هه‌رێمی كوردستان درووست بووه‌ و توانیویه‌تی‌ چه‌كداری زیاتر بباته‌ ناو ریزه‌كانی رێكخراوه‌كه‌ی و تا ئێستا چه‌ندین كرده‌وه‌یان له‌ دژی هێزه‌ ئه‌منییه‌كانی عێراق ئه‌نجامداوه‌، له‌ هه‌ندێك حاڵه‌تیشدا هاووڵاتیانی سڤیلیش ده‌كه‌نه‌ ئامانج، بۆیه‌ داعش تائێستاش كێشه‌یه‌كی سه‌ره‌كییه‌.
جه‌ختیشی كرده‌وه‌، پێویسته‌ كۆمه‌ڵگه‌ی نێوده‌وڵه‌تی به‌ وردی چاودێری چالاكی و به‌ره‌وپێشچوونه‌كانی داعش بكات.
سه‌باره‌ت به‌ سه‌ردانه‌كه‌ی پاپای ڤاتیكانیش بۆ هه‌رێمی كوردستان، كه‌ بڕیاره‌ له‌ هه‌فته‌ی داهاتوودا ئه‌نجامی بدات، ئه‌و سه‌ردانه‌ی به‌ مێژوویی وه‌سف كرد و گوتی: ئه‌و سه‌ردانه‌ی پاپا رێزلێنانێكه‌ نه‌ك ته‌نیا بۆ مه‌سیحییه‌كانی ناوچه‌كه‌، به‌ڵكو بۆ پێكه‌وه‌ ژیانی ئاشتیانه‌ له‌ هه‌رێمی كوردستان. مه‌سرور بارزانی هیوای خواست، ئه‌و سه‌ردانه‌ی پاپا فرانسیس ببێته‌ هۆی پشتیوانییه‌كی زیاتری نێوده‌وڵه‌تی بۆ ئاواره‌كانی ناوخۆ.