وه‌زیری كاره‌بای هه‌رێم : ڕۆژانە نزیكه‌ی 16 کاتژمێر کارەبا بە هاوڵاتیان ده‌درێت

26.07.2022
جەماوەر نیوز

وەزیری کارەبای هەرێم رایگەیاند له‌ ئێستادا رۆژانە نزیكه‌ی 16 کاتژمێر کارەبا بە هاوڵاتیان ده‌درێت، تا مانگی تشرینی یه‌كه‌می ئه‌مساڵیش چوار وێستگەی دیکە دەکەونە کار و به‌مه‌ش دەتوانرێت کارەبای زیاتر بۆ هاوڵاتیان دابینبكرێت.
کەمال محه‌مه‌د، وەزیری کارەبا له‌كۆنگره‌یه‌كی رۆژنامه‌وانی هاوبه‌شدا له‌گه‌ڵ عادل كه‌ریم، وه‌زیری كاره‌بای عێراق رایگه‌یاند، هێرشه‌كانی سه‌ر كێڵگه‌ی كۆرمۆر شەرمەزار دەکەن و به‌هیچ جۆرێك ئه‌و هێرشانه‌ جێگەی قبوڵکردن نین، پێویستە لایەنە ئەمنیەکان بەدواداچونی جدی له‌وباره‌یه‌وه‌ بکەن.

وتیشی "لە سەردانی سەرۆکی حکومەت بۆ بەغدا لەگەڵ سەرۆک وەزیرانی عێراق و وەزیری نەوتی عێراق گفتوگۆ لەسەر ئەم بابەتە کراوە به‌تایبه‌ت پاراستنی ئاسایشی ئەو كێڵگه‌ نه‌وتی و غازیه‌كان، بەرپرسیارێتی حکومەتی عێراقە كه‌ بەدواداچون بۆ ئەم هێرشانە بکات و کۆنتڕۆڵی ئەم کردارانە بکات".