رزگار سید کاکه‌ره‌ش  

ئه‌رستو ده‌ڵێت : "  ئه‌وه‌ى سروشت ناتوانێ ته‌واوى بکات ، هونه‌ر پێى ده‌گه‌ینێ و ته‌واوى ده‌کات ".

ده‌مێکى زۆر چاوه‌ڕێى ئه‌م هه‌ڤاڵه‌ دێرینانه‌ى هونه‌رمه‌ند و ئاوازدانه‌رى گه‌له‌که‌مان بووم ، ئه‌وانه‌ى له‌ نزیکه‌وه‌ هاوڕێ و دۆست و ئاشناى بوون ، هه‌م وه‌ک بیرهێنانه‌وه‌یه‌کى پڕ له‌ یاد و بیره‌وه‌رى ، هه‌م  وه‌ک وه‌فا و ڕێز و خۆشه‌ویستى  ... له‌ گۆشه‌ى ڕۆژنامه‌یه‌ک یان له‌وتارێکى رۆژنامه‌وانیدا  نووکه‌ قه‌له‌مێک له‌ ژیانى هونه‌رى و به‌رهه‌مه‌کانى که‌ خاوه‌نى زیاتر له‌ 100 هۆنراوه‌ و ئاوازدانه‌ر هونه‌رمه‌ند زیاد ئه‌سعه‌د بخه‌مه‌روو  تا هه‌واداران و  برا به‌رپرسه‌کانى نێو حکومه‌ت هه‌لێک و کاتێک  پێشنیارکه‌ن بۆ پێشکه‌شکردنى خه‌ڵاتى ڕێزلێنان پڕ به‌ شایسته‌ى ماندوبونى ئه‌و هونه‌رمه‌نده‌ بێ ... به‌ڵام به‌داخه‌وه‌ .
 بۆ بیرهێنانه‌وه‌ى مێژوو  سه‌یرى ووڵاتانى ده‌رووبه‌رکه‌ن هونه‌رمه‌ند ئوم که‌لسوم  دواى گه‌وره‌بوونى که‌سایه‌تى ئه‌و هونه‌رمه‌نده‌ له‌ بۆنه‌ و ئاهه‌نگه‌کاندا به‌هۆى ده‌نگه‌ تایبه‌ت و هه‌واداره‌کانییه‌وه‌ نازناوى هه‌ساره‌ى رۆژهه‌ڵات لێنراوه‌ .....!؟

مامۆستا هونه‌رمه‌ند خالقى ده‌ڵێت :" هونه‌ر ئه‌گه‌ر هى نه‌ته‌وه‌ بێت هونه‌رمه‌ند ده‌بێ هه‌ڵقولاوى ناو موعاناتى نه‌ته‌وه‌که‌ بێت " 

ئه‌ى ئه‌گه‌ر دارێک به‌ سێبه‌ر و پڕ به‌رهه‌م بێت ، ناخێک پڕ له‌ ئاواز و تێکست و گۆرانى بێ ، هونه‌رمه‌ندێکى گه‌وره‌ و ئوستازێک پڕله‌ ئاوازى ناسک و به‌جۆش بێ ، ده‌نگێکى مۆسیقى و سروشتى شار و گوند و پێ ده‌شته‌کانى کورده‌وارى بێ ، خوێندنێک پڕ له‌ جوانى نیشتیمان بێ ،  چێژێکى موزیک و هونه‌ر بۆ  هه‌وادارانى که‌ هه‌ست و تێگه‌یشتنى هونه‌ریان هه‌بێ ، ده‌بێت شایه‌نى چ نازناوێک بێ ...؟

سه‌رهه‌ڵدان و ده‌رکه‌وتنى زیاد ئه‌سعد
سه‌رهه‌ڵدان و ده‌رکه‌وتنى هونه‌رمه‌ند  زیاد ئه‌سعد له‌ هونه‌رى کوردى سه‌رده‌مێکى نوێ و نوێکردنه‌وه‌ بوو ، بۆیه‌ له‌وده‌مه‌وه‌  هه‌وادارێکى زۆر و ته‌واوى له‌ خۆى کۆکردبۆوه‌  له‌ بۆنه‌ و ئاهه‌نگه‌کانى به‌ ده‌نگ و ئاوازه‌کانى جار به‌ جار  له‌ هه‌ڵکشان دابوو ... نێوى  تازه‌گه‌رى له‌ تێکست و ئاوازه‌کانى گۆرانى کوردى ده‌رده‌که‌وت ، بۆیه‌ ده‌نگى ئه‌م هونه‌رمه‌نده‌ بێگومان  له‌گه‌ڵ مۆسیقا قسه‌ ده‌کات ... هێنده‌ى نه‌ماوه‌ بۆ نیو سه‌ده‌ بچێت  وه‌ک مامۆستا و ئاواز دانه‌ر و هۆنراوه‌ نووس ... هونه‌رمه‌نده‌ گه‌نجه‌کانى ئه‌و سه‌رده‌مه‌ زۆریان له‌ ئاواز و تێکستى ئه‌م هونه‌رمه‌ند و مامۆستایه‌ سوودمه‌ند بووینه‌  له‌وانه‌  " ئه‌یاد حسێن ، بڵند عبدڵا ، بڵند ئیبراهیم ، دڵێر گه‌رمیانى ، زه‌که‌ریا عبدڵا ، ئه‌ژده‌ر وهبى ، په‌یوه‌ند جاف ، ڕۆژ کریم ، محسین عبدلا ، چۆپى فتاح ... هتد ".

 زیاد ئه‌سعه‌د له‌ 1966 له‌ ته‌یراوه‌ له‌دایک بووه‌
هونه‌رمه‌ند زیاد ئه‌سعه‌د مجید ، له‌ ساڵى 1966 له‌ گه‌رکى ته‌یراوه‌ى شارى هه‌وڵێر له‌ دایک بووه‌ ،  مام ئه‌سعه‌دى باوکى کوڕى (مجید ئاغاى گه‌ردیى گوندى دێرێ ) ه‌ ، هونه‌رمه‌ند ده‌رچووى ئاماده‌یى پیشه‌سازى هه‌ولێره‌ ، خانه‌واده‌ى هونه‌رمه‌ند له‌ سێ براو پێنج خوشک پێک هاتووه‌ ، هونه‌رمه‌ند هاوتا ئه‌سعه‌د ى ره‌حمه‌تى و شه‌هید عبدلرزاق ، هونه‌رمه‌ند زیاد ئه‌سعه‌د له‌ ڕێگاى مامۆستیان ووریا احمد و ماموستاجه‌لال سه‌عیده‌وه‌ دوو گۆرانى له‌ ته‌له‌فزیۆنى که‌رکوک تۆمار کرد به‌ هاوکارى تیپى مۆسیقاى هونه‌رى میلى هه‌ولێر له‌ ساڵى 1983 ... دواتر له‌ ساڵى 1985 له‌ ووڵاتى ئێران بوو ، به‌ڵام له‌ ساڵى 1987 گه‌ڕایه‌وه‌ من له‌ ڕێگاى کاک احمدى  براى مامۆستا ڕزگار خۆشناو کاک زیادم ناسیوه‌ .
خانه‌واده‌ى هونه‌رمه‌ندکاک زیاد ئه‌سعه‌د له‌روى کۆمه‌ڵایه‌تیه‌وه‌ له‌گه‌ڵ خانه‌واده‌ى ماڵى کێخوا پیرۆتى براى شه‌هیدى سه‌رکرده‌ ڕه‌سوڵ مامه‌ند تێکه‌ڵاوى و نزیکبوونه‌وه‌یان هه‌یه‌ ، هه‌ر بۆیه‌ش شه‌هید عبدلرزاق براى له‌ هه‌رێمى شه‌ش لاى فه‌رمانده‌ موحسین بایز بۆته‌ پێشمه‌رگه‌ ، له‌ هاوینى ساڵى 1987 له‌ گوندى هه‌ڵشۆى لاى به‌رده‌پان ناوچه‌ى قه‌ڵادزێ شه‌هید بووه‌ و هه‌ر له‌وێش به‌ خاکیان سپاردوه‌ .
سه‌رده‌مانێک له‌ژێر سته‌مدا بووین ، خه‌باتى ڕێکخستن بیر و باوه‌ڕ و مه‌به‌ست و هه‌گبه‌ و په‌یامێکى له‌گه‌ڵ بوو ... له‌م کاته‌ ڕێکخستن بۆ ئازادى و دیموکراسى و داد و  یه‌کسانى و مافى گه‌ل و نیشتیمانێک ، ئیتر  بۆ به‌رانگه‌ر بوونه‌وه‌ و بیرکردنه‌وه‌ و ده‌ربازبوون و  سڵنه‌کردن له‌ مه‌رگ و دڵ ئازایانه‌ له‌م تاوان و سته‌مه‌ دژى زمان و ژیان و خاک و نه‌ته‌وه‌مان ده‌کرا ،  ته‌نیا کارى حیزبى و ئۆرگان و خۆڕێکخستن بوو ، له‌ نێو هه‌ر حیزب و بزوتنه‌وه‌ و جوڵانه‌وه‌یه‌کى نهێنى ،  لایه‌نه‌ کوردیه‌کان له‌ شاخه‌وه‌  بۆ شار  پڕ مه‌ترسیدار بوو کوڕى جه‌رگبڕ و فیداکار و پێشه‌نگى ده‌ویست ، ئازاره‌کانى گه‌له‌که‌مان ئه‌وه‌نده‌ زۆر بوو دوژمن  له‌ خوێن ڕشتن بێباک بوو .

له‌ ناوه‌ڕاستى ساڵانى هه‌شتاکان  هونه‌رمه‌ند هاوتا ئه‌سعه‌دم ناسى
نابێت ئه‌وه‌ش له‌ بیرکه‌م  ، له‌ ناوه‌ڕاستى ساڵانى هه‌شتاکان  هونه‌رمه‌ند هاوتا ئه‌سعه‌دم ناسى که‌ خۆى له‌ ئه‌سڵ نێوى  ( کاکه‌ڕه‌شه‌)  ئه‌و زۆربه‌ى  پۆسته‌رى شه‌هیدان و بڵاوکراوه‌کان له‌ به‌شى تایب و کۆپى کردنى دائیره‌که‌ى کارى ده‌کرد دووباره‌ کۆپى ده‌کرده‌وه‌ بۆ هه‌ڤاڵه‌کانى ڕێکخستنى ده‌گه‌ڕانده‌وه‌ ،  جا نازانم له‌ نه‌هێشتنى تاوانى سیداوه‌ بوو یان له‌ دائیره‌که‌ى نفوسى هه‌ولێر  ... له‌ بیرمه‌  21/10/1988 له‌ هۆڵى ڕۆشنبیرى ڕێگاى که‌رکوک ساڵوه‌گه‌رى هونه‌رمه‌ندى ناسراوى گه‌له‌که‌مان ماموستا تایه‌ر تۆفیق کرایه‌وه‌ ... ئینجا زانیم ئه‌وه‌ هونه‌رمه‌نده‌ و نێوى هاوتا ئه‌سعه‌ده‌ ...!

دواى ڕاپه‌رین زیاد ئه‌سعه‌دم له‌ نێو ریزه‌کانى حزبى سوسیالست بینیه‌وه‌
دواى ڕاپه‌رینى خه‌ڵک و ئازادکردنى کوردستان ، کاک زیاد ئه‌سعه‌دم له‌ نێو ریزه‌کانى حزبى سوسیالستى کودستان بینیه‌وه‌ که‌ ئه‌و کات زۆر له‌گه‌ڵ مامۆستا و ڕووناکبیر عبدالرحمان بێلاڤ و کاک برزۆى شه‌هید على هه‌ژار  نزیک بوو دواتر تپى مۆسیقاى شه‌هید کاردۆ گه‌ڵاڵى یان دامه‌زراند  "  زیاد ئه‌سعه‌د سه‌رۆکى تیپه‌که‌ بوو هه‌ریه‌ک له‌ هونه‌رمه‌ندان  دانا غه‌نى ، نیزام شوکر ، ماموستاجه‌لال سعیدى ڕه‌حمه‌تى ، محمد عزیز ،   پایه‌دار ئۆرگژه‌ن ، جه‌لال شاکر  ساز ، مسته‌فا ڕه‌نجه‌ڕۆ کمان ژه‌ن ، ڕه‌حیم زوورنا ژه‌ن ، رزگار مه‌لا عزیز ساز ، زاگرۆز ـ مولود ... هتد  " ئه‌ندامى تیپه‌که‌ بوون ، سه‌رقاڵ بوون ڕۆژانه‌ پێکه‌وه‌ ساڵى یه‌که‌م و دووه‌مى دواى ڕاپه‌رین  به‌م جۆره‌ به‌رهه‌مه‌کانیان تۆمار ده‌کرد ، بۆ  خزمه‌تى خه‌ڵکى ڕاپه‌ڕیوى کوردستان به‌ سروود و په‌یامه‌کانیان ، کاک هه‌نگاو چۆمانى به‌رپرسى یه‌کێتى خوێندکار ولاوانى سوسیالستى کوردستان بوو ، مامۆستا ڕێبوار ئه‌ندامى لقى هه‌ولێر بوو به‌رپرسى باره‌گاو به‌شه‌کان بوو له‌نزیک نقابه‌ و هوتێل شیراتۆن ، چالاکیه‌کان زیاتر بۆ وشیارکردنه‌وه‌ى کۆمه‌ڵانى خه‌ڵکى کوردستان و پێکه‌وه‌ ژیانى لێبورده‌یى و ته‌بایى و ئاشتى ، جوانى ژیان و فراوانکردنى ئاسۆیه‌کى ڕوون و چه‌ندین په‌یامى ترى برایه‌تى و خۆشه‌ویستى ... !
ده‌توانین بڵێین "  دواى ڕاپه‌رین  یه‌که‌م هونه‌رمه‌ند بوو چه‌ند سووردێکى پێشکه‌شى هه‌وادارانى کرد له‌وانه‌ " شه‌هید نه‌مره‌ ... ، له‌ سایه‌ى هێزى پێشمه‌گه‌ ... ، دایکى شه‌هید ... ، بۆ کوێ ده‌ڕۆن ... هتد "

به‌شێک له‌ میدیاکان ، گوێ ناده‌نه‌ ئیتیک و پرنسیبه‌کانى  ڕاگه‌یاندن
ده‌زگاکانى ڕاگه‌یاندن و میدیاکان له‌م هه‌رێمه‌ ، هه‌ندێک وه‌خت به‌شێک له‌ میدیاکان ، گوێ ناده‌نه‌ ئیتیک و پرنسیبه‌کانى  ڕاگه‌یاندن ،بۆ ڕاکێشانى زۆرترین  گوێگر و بینه‌ر و خوێنه‌ر  په‌نا ده‌به‌نه‌ به‌ ته‌شهیر و شکانى که‌سایه‌تى تاکى کۆمه‌ڵگا ، هێنده‌  خۆ بچوک ده‌که‌نه‌وه‌  له‌ خزمه‌تى که‌سانێک ، هێنده‌ له‌ خزمه‌ت  تاکى کورد و پرسه‌ نیشتیمانى و نه‌ته‌وایه‌تیه‌کان نین ، وه‌ک ئامرازێک بۆ ده‌رخستن و گه‌وره‌کردنى خۆیان ده‌پێکن و ده‌یانه‌وێ .

  ئه‌رستو ده‌ڵێت "  ئه‌وه‌ى سروشت ناتوانێ ته‌واوى بکات ، هونه‌ر پێى ده‌گه‌ینێ و ته‌واوى ده‌کات "
بیرمه‌ندێک ده‌ڵێت "  سیاسه‌تمه‌داران بۆ شاردنه‌وه‌ ڕاستیه‌کان درۆ ده‌که‌ن ، به‌ڵام هونه‌رمه‌ندان بۆ ده‌رخستنى ڕاستییه‌کانن

هونه‌ر له‌م هه‌رێمه‌ و له‌ کۆمه‌ڵگاى ئێمه‌دا به‌ره‌ و ئاڵۆزى و کزبوون ده‌ڕوات ، بۆیه‌ ده‌ڵێن " گه‌ر هونه‌ر نه‌بێت ژیان ده‌وه‌ستێت  خۆشى وشادى تێدا نابینرێ . "  لاى ئێمه‌ ئه‌م سیى ساڵه‌ ڕق و قینه‌ زیاتر باڵى کێشاوه‌  به‌ سه‌ر کۆمه‌ڵگاى کوردا زۆر به‌داخه‌وه‌ ،که‌هونه‌ریش بێبه‌ش نه‌بووه‌ و پڕشکى بێئومێدى و ئاڵۆزى و شێواندنى به‌رکه‌وتووه‌ ، به‌هیواى گه‌شاوه‌بونى هونه‌رو رێزو شکۆ بۆ هونه‌رمه‌ندانى نه‌ته‌وه‌که‌مان له‌پاى خزمه‌تکردنیان به‌هونه‌رى میله‌ته‌که‌مان.

ئەم وتارە گوزارشتە لە رای نوسەر و جەماوەر نیوز لێی بەرپرس نیە