جەماوەر نیوز
بزووتنەوەی حەماس جارێکی دیکە دەسەڵاتدارانی ئیسرائیلی بە بەربەست لەبەردەم هەوڵەکانی ئاگربەست تۆمەتبارکرد و رایگەیاند، دەسەڵاتدارانی ئیسرائیل نایانەوێت هەوڵەکانی ئاگربەست بە ئەنجامبگات و بارمتەکان ئازادبکرێن.
ئەبو عوبەیدە، گوتەبێژی لیواکانی عیزەدین قەسام، باڵی سەربازیی بزووتنەوەی حەماس لە پەیامێکی ڤیدیۆییدا تیشکی خستە سەر دۆخی هێزەکانیان و دواین هەوڵەکانی ئاگربەست.
بەگوتەی ئەبو عوبەیدە، حەماس پێشنیازێکی کردووە، بەهۆیەوە هەموو بارمتەکان بە یەک جار ئازاد دەکرێن، بەڵام ئیسرائیل تەواوی داواکاری و مەرجەکانی رەتکردووەتەوە و هیچ ئومێدێکی بۆ رێککەوتن نەهێشتووەتەوە.
گوتەبێژەکەی حەماس هۆشداریشی دایە ئیسرائیل، ئەگەر ئەم خولەی دانوستان شکستبهێنێت گرەنتی ئازادکردنی ئەو 10 بارمتەیە ناکەن کە وەک نیازپاکیی بەڵێنی ئازادکردنیان درابوو.