جەماوەر نیوز
پێنج وەزیری رێپێدراوی وەزارەتی دەرەوەی عێراق دوو سکاڵا لەبارەی دانانی 93 باڵیۆزی نوێ تۆمار دەکەن، کە لە ئەنجوومەنی وەزیرانەوە نێردران بۆ پەرلەمانى عێراق و پەسند کران.

ئەو وەزیرە رێپێدراوانەی وەزارەتی دەرەوە کە سکاڵایان تۆمار کردووە بریتین لە: تاریق عادل، دیاری ئەحمەد مەجید، فازڵ شوەیلی، حوسێن عەباس و مونیف عەلی.

سکاڵاکان لە دژی سەرۆکی پەرلەمان و سەرۆکوەزیرانى عێراقن. سکاڵاکارەکان داوا دەکەن بڕگەی سێ لە مادەی 9ی یاسای خزمەتی دەرەکی ساڵی 2008 بە نادەستووری بناسرێت و هەر رێکارێک لەسەر بنەمای ئەو مادەیە گیراوەتەبەر، هەڵبوەشێنرێتەوە، بە بەربژێرکردنی باڵیۆزەکانیشییەوە لە کۆبوونەوەی ئەنجوومەنی وەزیران لە 22ی تەمووزی ئەم ساڵ.

ئەم مادەیەی تانەی لێگیراوە ئاماژە بەوە دەکات کە 25%ی باڵیۆزان لە دەرەوەى وەزارەتى دەرەوە دەبێت بە پێشنیاری ئەنجوومەنی وەزیران، کە دەکرێت هەرکات ئەنجوومەنەکە ویستی رێژەکە بگۆڕێت.

سەرچاوەیەکی ئاگادار لەو سکاڵایانە بە رووداوی راگەیاند، یەکێک لە تێبینییەکانی سکاڵاکاران تایبەتە بە شێوازی دیاریکردنی بەربژێری باڵیۆزەکان، کە دەبوو بە گوێرەی یاسا 75%ی لەلایەن وەزارەتی دەرەوە و 25%ی لە دەرەوەی وەزارەت بێت، بەڵام ئەو 93 باڵیۆزەی ئێستا دیاریکراون بە گوێرەی رێژەی 50% دابەش کراون.

لە سکاڵاکەدا داوا کراوە رێکارەکانی پەسندکردن و دەستبەکاربوونی ئەو بەربژێرى باڵیۆزانە رابگیرێت.

دادگەی باڵای فیدراڵیی عێراق سێشەممە، 2ی ئەیلوول، یەکەم دانیشتن لەبارەی ئەو دوو سکاڵایەوە دەکات.

26ی ئابی 2025 پەرلەمانی عێراق متمانەی بە 93 باڵیۆزی نوێ دا، کە 17 یان کورد بوون.