جەماوەر نیوز
میدیاکانی ئیسرائیل بڵاویانکردەوە، بنیامین نەتانیاهوو، سەرۆکوەزیرانی ئیسرائیل نێوەندگیریی رووسیا و ئەمریکا دەکات و لە هەوڵدایە بۆ کەمکردنەوەی گرژییەکانی نێوان ڤیلادیمیر پوتن سەرۆکی رووسیا و دۆناڵد ترەمپی سەرۆکی ئەمریکا.
پێگەی هەواڵی کان لە راپۆرتێکدا ئاماژەی بۆ ئەوە کردووە، پوتن و نەتانیاهوو لەماوەی چەند رۆژی رابردوودا دوو پەیوەندیی تەلەفۆنییان ئەنجامداوە و ئامانجی سەرەکیی پەیوەندییەکەش ئاساییکردنەوەی پەیوەندییەکانی نێوان رووسیا و ئەمریکایە بۆ گەیشتن بە رێککەوتن لەبارەی جەنگی ئۆکرانیا.
میدیا ئیسرائیلییەکان زانیاریی وردیان لەبارەی ناوەرۆکی هەوڵەکانی نەتانیاهوو و ئەنجامی هەوڵەکانی بڵاونەکردووەتەوە، بەڵام زانیارییەکان جەخت لەوە دەکەنەوە، پەرەسەندنی گرژییەکان لەنێوان واشنتن و مۆسکۆدا لە بەرژەوەندی ئیسرائیل نییە و نەتانیاهوو هەوڵەکانی بۆ ئەو مەبەستە چڕکردووەتەوە. 
ئەوە لەکاتێکدایە، هەفتەی رابردوو، ترەمپ فەرمانی بە جێگیرکردنی دوو ژێردەریایی هەڵگریی ئەتۆمی لە ناوچەکانی نزیک لە رووسیا کرد، وەک پەیامێک بۆ گوتەکانی دیمیتری مێدڤیدیڤ سەرۆکی پێشووی رووسیا.