جەماوەر نیوز
ڕه‌جه‌ب ته‌یب ئه‌ردۆگان سه‌رۆك كۆماری توركیا ئه‌مڕۆ پێنجشه‌ممه‌ له‌ ڕێگه‌ی ته‌له‌فۆنه‌وه‌ له‌گه‌ڵ ڤۆڵۆدمیر زلێنسكی سه‌رۆكی ئۆكرانیا قسه‌ی كرد و په‌یوه‌ندییه‌ دوقۆڵییه‌كان و هه‌وڵه‌كانی ئاشتی و ڕێگاكانی كۆتاییهێنان به‌ كێشه‌ی ئۆكرانیایان تاوتوێكرد.

به‌گوێره‌ی راگه‌یه‌ندراوێكی سه‌رۆكایه‌تی كۆماری توركیا، ئه‌ردۆگان له‌ كاتی په‌یوه‌ندیه‌ ته‌له‌فۆنیه‌كه‌دا دڵنیایی دایه‌ زلێنسكی كه‌ توركیا له‌ نزیكه‌وه‌ به‌دواداچونی كۆبونه‌وه‌كانی ئه‌لاسكا و واشنتن كردوه‌ و به‌رده‌وامه‌ له‌ هه‌وڵه‌كانی بۆ كۆتاییهێنان به‌ ململانێكان.

ئاماژه‌ی به‌وه‌شكرد، "گه‌یشتن به‌ چاره‌سه‌رێكی دادپه‌روه‌رانه‌ بۆ شه‌ڕی ئۆكرانیا و ڕوسیا مومكینه‌ و ده‌بێت دانوستانه‌كانی نێوان هه‌ردولا به‌هێزتر و به‌رده‌وام بن".

جه‌ختیشیكرده‌وه‌ كه‌ توركیا ئاماده‌یه‌ هه‌مو شتێك له‌ توانای خۆیدا بكات بۆ ئاسانكاریی په‌یوه‌ندییه‌كانی ئاستی باڵا كه‌ ڕێگه‌ بۆ ئاشتی خۆش بكات.

ئه‌ردۆگان جه‌ختیكرده‌وه‌ كه‌ "توركیا به‌رده‌وام ده‌بێت له‌ به‌شداریكردن له‌ ئاسایش و ئاشتی ئۆكرانیا".