جەماوەر نیوز
دوای کورد لە باکوور و دروزەکان لە باشوور، عەلەوییەکانیش کە لە ناوەڕاست و ڕۆژئاوای سووریا نیشتەجێن، داوای فیدڕاڵی و لامەرکەزی بۆ سووریا دەکەن و دەڵێن، بۆ کۆتاییهێنان بە جەنگ و هێنانەدی ئاشتی، باشترین بژاردەیە.

 کورد لە سەرەتای خۆپیشاندانەکانی ساڵی 2011ی سووریاوە داوای لامەرکەزی بۆ حکومڕانی وڵاتەکە دەکات، درووزەکانیش بەم دواییە بەفەرمی داوای هەرێمی سەربەخۆ و فیدڕاڵی یان جیابوونەوەی تەواوەتی لە سووریا دەکەن، هۆکارەکەشی بۆ سیاسەتی "پەراوێزخستنی" دەسەڵاتی نوێی دیمەشق دەگەڕێننەوە.

 بەشێک لە کەسایەتییەکانی پێکهاتەی عەلەوی لە سووریا لە ڕاگەیێنراوێکدا پێکهێنانی "ئەنجوومەنی سیاسیی ناوەڕاست و ڕۆژئاوای سووریا"یان ڕاگەیاند  و ئاماژە بەوە دەکەن، باشترین بژاردە بۆ حکومڕانی سووریا فیدڕاڵییە کە ڕێگە بە هەرێمەکان دەدات خۆیان سوود لە سەرچاوەکانیان وەربگرن و خۆیان بەڕێوەبەرن.

دەشڵێن، ئەو هەرێمەی ئەوان داوای دەکەن پارێزگاکانی لازقیە، تەرتووس، حمس و بەشێکی پارێزگای حەما لە خۆدەگرێت، جەختیش دەکەنەوە کە هەرچەندە ئەم ناوچەیە عەلەوییەکان تیایدا دەژین بەڵام لەم بوارەدا دەبێت هەموو پێکهاتەکانی دیکە هاوبەش بن.

هاوکات: ئەنجوومەنی سیاسیی ناوەڕاست و ڕۆژئاوای سووریا هێرشی توندیشی کردووەتەسەر دەسەڵاتی نوێی دیمەشق بە حکومەتی یەک ڕەنگ ناوی بردووە، داواشی کردووە هەموو گرووپە چەکدارییە بیانییەکان لە سووریا بچنە دەرەوە.