جەماوەر نیوز
پرۆسەی دابەشکردنی زەوی فەرمانبەران بەردەوام دەبێت و سەرۆکی گشتیی شارەوانی هەولێریش باس لەوە دەکات، تاوەکو ئێستا 17 هەزار پارچە زەوی بەسەر فەرمانبەران دابەش کراوه‌.
كارزان هادی، سەرۆکی گشتیی شاره‌وانی هه‌ولێر ڕایگه‌یاند: تیمه‌كانی شاره‌وانی و نه‌خشه‌دانان سه‌رقاڵی كاركردنن له‌سه‌ر زه‌وی فه‌رمانبه‌ران و پلان وایه‌ ڕۆژی پێنج شه‌ممه‌ تیروپشك بۆ زه‌وی فه‌رمانبه‌ران ئه‌نجام بدرێت، بەڵام  له‌ ئه‌گه‌ری ته‌واونه‌بوونی كاره‌كانیان تیروپشك له‌ سه‌ره‌تای هه‌فته‌ی داهاتوودا دەکرێت.
ئاماژەی بەوە کرد، له‌ قۆناغی یه‌كه‌م و دووه‌مدا 17 هەزار پارچە زه‌وی دابه‌ش كراوه‌ و تیمه‌كاننیشیان له‌ ڕۆژانی پشوو و كاتژمێره‌كانی دوای ده‌وامی فه‌رمیش به‌رده‌وامن له‌ كاركردن بۆ ئه‌وه‌ی گشت فه‌رمانبه‌رانی شایسته‌ زه‌وییان پێ بدرێت.
لە 27ـی ئاداری 2024، لە کۆبوونەوەی ئەنجوومەنی وەزیرانی هەرێمی کوردستان، لەسەر فەرمانی مەسرور بارزانی، سەرۆک وەزیران، بڕیار درا بە دابەشکردنی زەوی بەسەر هەموو ئەو فەرمانبەرانەی سوودمەند نەبوونە لە وەرگرتنی زەوی.