جەماوەر نیوز
په‌یامی به‌ڕێز محمد حاجی مه‌حمود به‌بۆنه‌ی كۆتاییهاتنی بانگه‌شه‌ی هه‌ڵبژاردنی ئه‌نجومه‌نی نوێنه‌رانی عێراق

 جەماوەری خۆڕاگری کوردستان
هاووڵاتیانی ئازیز، كه‌سوكاری سه‌ربه‌رزی شه‌هیدان، پێشمه‌رگه‌ قاره‌مانه‌كان، سه‌رجه‌م هێزه‌كانی سه‌ربه‌ وه‌زاره‌تی ناوخۆ، ئه‌ندامان و ده‌نگده‌رانی لیستی 216 ی حزبی سۆسیال دیموكراتی كوردستان.

وا نزیك ده‌بینه‌وه‌ له‌ كۆتا ساته‌كانی بانگەشەی هەڵبژاردنی ئه‌نجومه‌نی نوێنه‌رانی عێراق، كه‌ بێگومان پرۆسەی هه‌ڵبژاردن خاڵێکی وەرچەرخانی گرنگە بۆ ده‌ستاو ده‌ستكردنی ده‌سه‌ڵات و هه‌نگاونان به‌ره‌و سیستمی دیموكراسی و ژیانێكی باشتر بۆ خه‌ڵك.

ئێمه‌ش هه‌ر له‌و سۆنگه‌یه‌وه‌ لیستی 216 ی حزبی سۆسیال دیموكراتی كوردستان ده‌كه‌ینه‌ سه‌نگه‌رێك بۆ به‌رگری له‌ مافی ڕه‌وای گه‌له‌كه‌مان و به‌هێزكردنی پێگه‌ی قه‌واره‌ی هه‌رێمی كوردستان.

 به‌دڵنیاییه‌وه‌ لیستی 216 و كاندیده‌كانی، پێشمه‌رگه‌ ئاسا خزمه‌ت به‌ دۆزی ڕه‌وای میلله‌ته‌كه‌مان و پاراستنی ده‌ستكه‌وته‌كان ده‌كه‌ن و هه‌رگیز سازش له‌ سه‌ر مافی خه‌ڵك و خاكی كوردستان ناكه‌ن.

پەیامی ئێمە پەیامی (ئاشتی و دیموکراسی خۆشگوزەرانییه‌) بۆ خەڵکی کوردستان، ئەوە ئێمەین خاوەنی نیو سەدە تێکۆشان و قوربانیدان و بەرگرین لە خاک و خەڵکی کوردستان. دەنگدان بەکاندیدەکانی لیستی 216 ی حزبی سۆسیال دیموکراتی کوردستان، دەنگدانە بە خوێنی شەهیدان و داهاتویەکی گەش بۆ میللەتەکەمان و جێبەجێکردنی دەستوری عێراقی وەک خۆی، لەپێناو دەستەبەرکردنی ئاشتی و عەدالەتی کۆمەڵایەتی و سەقامگیری سیاسی و ئابووری و بنبڕکردنی گەندەڵی و چەسپاندنی یاساو ده‌ستور و گه‌ڕاندنه‌وه‌ی پێگه‌ی به‌هێزی گه‌له‌كه‌مان بۆ ناوه‌ندی بڕیار له‌به‌غدا بۆ ئه‌وه‌ی چیتر كورد له‌عێراقدا وه‌ك كه‌مینه‌و ده‌ره‌جه‌ دوو مامه‌ڵه‌ی له‌گه‌ڵ نه‌كرێت ، ئه‌وه‌ ته‌نها لیستی 2016یه‌ كوردانه‌ ده‌چێته‌ به‌غداو سه‌رسه‌ختانه‌ به‌رگری له‌شوناس و زمان و كه‌لتوری ڕه‌سه‌نی میلله‌ته‌كه‌مان ده‌كات. 

له‌م ساته‌ مێژوویه‌دا داوا له‌ جەماوەری كوردستان و سه‌رجه‌م چین و توێژه‌كان ده‌كه‌ین له‌ پارێزگاكانی (سلێمانی و هه‌ولێرو دهۆك و كه‌ركوك و دیالی) ئازایانه‌ به‌شداری پرۆسه‌كه‌ بكه‌ن و له‌ ڕۆژی سێشه‌ممه‌ 11/11 بچنه‌ سه‌ر سندوقه‌كانی ده‌نگدان و ده‌نگ به‌ كاندیده‌كانی لیستی 216ی حزبی سۆسیال دیموكراتی كوردستان بده‌ن.

له‌كۆتاییدا هیوادارین پرۆسه‌یه‌كی پاك و بێگه‌رد دوور له‌هه‌ر خروقات و پێشێلكارییه‌ك به‌ڕێوه‌بچێت  تا متمانه‌ بۆ خه‌ڵك بگه‌ڕێته‌وه‌. 

داواش له‌هه‌موو هێزو لایه‌نه‌ سیاسییه‌كان ده‌كه‌ین (كوردایه‌تی پێش حزبایه‌تی) بخه‌ن، چونكه‌ ئه‌م هه‌ڵبژاردنانه‌ چاره‌نوسی میلله‌تێكی پێوه‌ به‌نده‌.
سه‌ركه‌وتن بۆ ئیراده‌ی به‌هێزی گه‌له‌كه‌مان و ده‌نگده‌رانی لیستی 216 ی حزبی شه‌هیدان.
هه‌رشادو سه‌ركه‌وتوو سه‌رفرازبن.

محمد حاجی مه‌حمود
گوڵه‌خانه‌/ 7ی تشرینی دووه‌می 2025