جەماوەر نیوز
دادگای ئەوروپا تانەیەكی توركیای بۆ مانەوەی دەمیرتاش لە زیندان رەتكردەوە، دەمیرتاشیش دەڵێت، بڕیارەكەی دادگای ئەوروپا بۆ 86 ملیۆن هاووڵاتی گرنگە.

دادگای مافی مرۆڤی ئەوروپا لە راگەیەنراوێكدا بڵاویكردەوە، تانەیەكی توركیای رەتكردەوە كە داوای پێداچوونەوەی بە بڕیاری ئازادكردنی سەڵاحەدین دەمیرتاش هاوسەرۆكی پێشوتری "هەدەپە" كردبوو، دادگاكە جەختیشیكردووەتووە، بنەماكانی بڕیاری دەستگیركردنی دەمیرتاش كۆنكرێتی نەبووە و هیچ پەیوەندییەك لە نێوان روداوەكانی 2014 و تۆمەتەكان لە دژی دەمیرتاش نەبووە، دەستگیركردنەكەش دەستوەردانێكی سیاسی بووە.

سەڵاحەدین دەمیرتاشیش لە پەیامێكدا رایگەیاندووە، بڕیارەكەی دادگای ئەوروپا نەك تەنها بۆ ئەو، بەڵكو بۆ 86 ملیۆن هاووڵاتی توركیا گرنگە.

وتیشی، دەركردنی یاسای برایەتی لە هەموو بابەتێك بەنرخترە و دەبێت دەركردنی یاساكەش ببێتە هۆی بەهێزكردنی ئەو كارە كۆمەڵایەتی و ئابوری و یاساییانەی ئەنجام دەدرێن.

پارتی یەكسانی و دیموكراسیی گەلان "دەم پارتی"ش لە راگەیەنراوێكدا ئاماژەی بەوەكردووە، دەستگیركردنی دەمیرتاش بە هۆكاری سیاسی بەردەوامە و بە لەبەرچاوگرتنی چەندین بڕیاری دادگای ئەوروپاش، دەبێت دەستگیركراوانی دۆسیەی كۆبانێ‌ ئازاد بكرێن.